ប៉ូលិសការិយាល័យព្រហ្មទណ្ឌកម្រិតធ្ងន់នៃស្នងការដ្ឋានខេត្ត សហការជាមួយប៉ូលិសស្រុកទ្រាំង បានចាប់ខ្លួនស្ត្រីម្នាក់ក្នុងចំណោមបក្សពួក៤នាក់ រួចកសាងសំណុំរឿងបញ្ជូនទៅសាលាដំបូងកាត់ទោសតាមច្បាប់ ដោយជាប់ចោទពីបទនាំបក្សពួកមកវាយសម្លាប់ប្តីរបស់ខ្លួនដល់ក្នុងផ្ទះ និងចាប់ចងកូនប្រុសរបស់ខ្លួនចាក់សោទុកក្នុងផ្ទះយ៉ាងព្រៃផ្សៃ ។
ការចាប់ខ្លួនស្ត្រីជាប្រពន្ធដែលនាំឃាតករមកវាយសម្លាប់ប្តីនេះ បានធ្វើឡើងកាលពីថ្ងៃទី១៧ មិថុនា វេលាម៉ោង៥និង៥០នាទីល្ងាចនៅភូមិព្រៃផ្អាវ ឃុំរនាម ស្រុកទ្រាំង ។
លោកវរសេនីយ៍ទោ សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តបានឱ្យដឹងថា ស្ត្រីជាប្រពន្ធដែលប៉ូលិសស្រាវជ្រាវចាប់ខ្លួនបាននេះឈ្មោះ ជួន សុភាព អាយុ៣៦ឆ្នាំ ចំណែកប្តីឈ្មោះ បូ ណូន អាយុ៤៣ឆ្នាំ ។ បុរសជាប្តីត្រូវបានស្ត្រីជាប្រពន្ធនាំប្អូនធម៌ម្នាក់ និងបុរស២នាក់ផ្សេងទៀតមកវាយសម្លាប់ដល់ផ្ទះ រួចចាប់កូនប្រុសម្នាក់ចងស្លាបសេកយកក្រណាត់ចុកមាត់ និងចាក់សោទ្វារផ្ទះ ហើយនាំគ្នារត់គេចខ្លួនបាត់។ គ្រួសារមួយនេះមានកូនទាំងអស់៣នាក់ ប៉ុន្តែស្លាប់អស់២នាក់ នៅតែម្នាក់ ។
ក្រោយពេលសម្លាប់ប្តីរួច ស្រ្តីជាប្រពន្ធនិងបក្សពួកបានចាប់ចងកូនប្រុសរបស់ខ្លួនឈ្មោះ ស៊ុន វណ្ណៈ អាយុ១៤ឆ្នាំ រួចយកក្រណាត់ចុកមាត់មិនឱ្យស្រែកទុកទៅក្នុងផ្ទះ ដោយចាក់សោទ្វារពីក្រៅ រួចនាំគ្នាជិះម៉ូតូគេចខ្លួនបាត់ ។ បើតាមកុមារា ស៊ុន វណ្ណៈ ដែលជាសាក្សីយ៉ាងសំខាន់ក្នុងហេតុការណ៍នេះនិយាយថា ឪពុក និងម្តាយរបស់គេតែងតែឈ្លោះគ្នាជានិច្ចអត់ដែលចុះសម្រុងគ្នាទេ ដោយឪពុករបស់គេខឹងនឹងម្តាយដែលតែងតែនិយាយទូរស័ព្ទជាមួយប្រុសផ្សេងរាល់ថ្ងៃមិនដែលខាន ហើយពេលនោះម្តាយរបស់គេបានសុំឪពុកទៅធ្វើការនៅរោងចក្រនៅឯភ្នំពេញ ។ នៅពេលបានទៅធ្វើការនៅរោងចក្រ ម្តាយអត់ដែលមកលេងផ្ទះទេ បើទោះបីជាឪពុករបស់គេទូរស័ព្ទទៅរកក៏ម្តាយអត់ដែលលើក សូម្បីតែលុយក៏អត់ដែលផ្ញើមកផ្ទះដែរ ។
លុះកាលពីថ្ងៃទី១២ មិថុនា កន្លងទៅឪពុករបស់គេរួមជាមួយយាយម្នាក់ បាននាំគ្នាជិះរថយន្តឈ្នួលទៅរកម្តាយដល់ផ្ទះជួលនៅភូមិព្រៃទាឯភ្នំពេញ តែនៅពេលទៅដល់ផ្ទះជួលនោះម្តាយគេបានចាកចេញទៅនៅកន្លែងផ្សេងបាត់ទៅហើយ ហើយដោយពេលល្ងាចទៅហើយ ក៏នាំគ្នាដេកនៅទីនោះមួយយប់ ។
កុមារា ស៊ុន វណ្ណៈ រៀបរាប់ថា នៅយប់នោះឪពុករបស់គេបានផឹកស្រាស្រវឹងរួចចូលទៅក្នុងបន្ទប់លេបថ្នាំកណ្តុរអស់៤កញ្ចប់ លុះមួយសន្ទុះក្រោយមករូបគេចូលទៅមើលឃើញឪពុកលែងដឹងខ្លួនទៅហើយ ទើបមានការឆោឡោផ្អើលអស់អ្នកជិតខាងមកចោមរោមមើល និងឱ្យលុយ រួចបញ្ជូនឪពុកទៅមន្ទីរពេទ្យព្រះកុសុមៈ ។ នៅព្រឹកថ្ងៃទី១៣ មិថុនា ពេលឪពុករបស់គេបានធូរស្បើយហើយ ក៏ចេញពីមន្ទីរពេទ្យត្រឡប់ទៅផ្ទះយាយនៅភូមិត្រពាំងអណ្តើក ស្រុកត្រាំកក់ ដេកនៅទីនោះ១យប់ លុះនៅថ្ងៃទី១៤ មិថុនា ក៏ត្រឡប់មកផ្ទះឯភូមិព្រៃផ្អាវវិញ ។ នៅថ្ងៃទី១៥ មិថុនា វេលាម៉ោង១១ព្រឹក ស្រាប់តែឃើញម្តាយរបស់ខ្លួនទៅដល់ផ្ទះដោយនាំបុរស៣នាក់មកជាមួយផង ។ ក្នុងចំណោមមនុស្ស៣នាក់នោះ រូបគេស្គាល់បុរសម្នាក់ឈ្មោះ ភ័ណ រស់នៅក្នុងស្រុកគិរីវង់ ធ្វើជាទាហាននៅបន្ទាយស្វាយទំនប់ និងត្រូវជាប្អូនធម៌ម្ដាយរបស់ខ្លួន ។
នៅពេលសួរសុខទុក្ខគ្នារួច ឪពុករបស់គេដើរចូលក្នុងផ្ទះ ស្រាប់តែឃើញឈ្មោះភ័ណ នោះយកដំបងវាយឪពុកពីក្រោយចំកញ្ចឹងក បណ្តាលឱ្យដួលលើដី រួចពួកគេបាននាំគ្នាលើកឪពុកដាក់លើគ្រែ ហើយយកខ្សែអង្រឹងចងកគាត់ព្យួរទៅនឹងមេដំបូលផ្ទះ ។ ចំណែកម្ដាយរបស់ខ្លួនបានចាប់ខ្ទប់មាត់ខ្លួនជាប់មិនឱ្យស្រែករួចចងដៃទៅក្រោយ និងយកក្រណាត់ចុកមាត់ទុកក្នុងផ្ទះចាក់សោទ្វារជិត បន្ទាប់មកក៏គេចខ្លួនបាត់អស់ទៅ៕