សំណុំរឿងឈ្មួញរកស៊ីដឹកឈើក្រញូង បើករថយន្តបំបុករថយន្តអ្នកកាសែត ប៉ុនប៉ងមនុស្សឃាតដោយចេតនា តាំងពីឆ្នាំ២០១៣នោះ ត្រូវបានតុលាការ ខេត្តសៀមរាបធ្វើការតម្កល់ឥតចាត់ការនេះបើយោងតាម លិខិតជូនដំណឹងមួយច្បាប់របស់ អយ្យការអមសាលាដំបូងខេត្តសៀមរាប លេខ៤៥៨ ចុះហត្ថលេខាដោយលោក កើត វណ្ណារ៉េត ព្រះរាជអាជ្ញាសាលាដំបូងខេត្ត។
នៅក្នុងលិខិតនោះសរសេរថា ˝ យើង កើត វណ្ណារ៉េត ព្រះរាជអាជ្ញា ជាតំណាងអយ្យការអម សាលាដំបូងខេត្តសៀមរាប។ ជម្រាបមកឈ្មោះ សិញ ស៊ុនឡី ភេទប្រុសអាយុ ៣៦ឆ្នាំ ជាតិខ្មែរ មានទីលំនៅសព្វថ្ងៃនៅ ភូមិគោគឬស្សី ឃុំកែវពណ៍ ស្រុកពួក ខេត្តសៀមរាប។ ត្បិតពាក្យបណ្តឹងចុះថ្ងៃទី០៨ ខែវិច្ឆិកា ឆ្នាំ២០១៣ របស់លោក ដែលបានប្តឹងពីឈ្មោះ អ៊ាឆៃយិន ពីបទៈ ប៉ុនប៉ងមនុស្សឃាត ប្រព្រឹត្តនៅភូមិវត្ត ឃុំស្រែណូយ ស្រុកវ៉ារិន ខេត្តសៀមរាប កាលពីថ្ងៃទី០៧ ខែវិច្ឆកា ឆ្នាំ២០១៣ បទល្មើសព្រហ្មទណ្ឌមានចែងអោយផ្តន្ទាទោសតាមបញ្ញតិ្តមាត្រា២៧ និងមាត្រា ២០៧ នៃក្រមព្រហ្មទណ្ឌនោះ អយ្យការអមសាលាដំបូងខេត្តសៀមរាប បានសម្រេច តម្កល់រឿងទុកឥតចាត់ការ តាមដីការតម្កល់រឿងទុកឥតចាត់ការលេខ ៤៥០ ពស.ព្រទ/១៥ ចុះថ្ងៃទី០៦ ខែមេសា ឆ្នាំ២០១៥។ លោកមានសិទ្ធិប្តឹងឧទ្ធរណ៍នឹង ដីកាសម្រេចតម្កល់រៀងទុកឥតចាត់ការ រយៈពេល០២(ពីរ)ខែ គិតចាប់ពីថ្ងៃបានទទួលលិខិតជូនដំណឹងនេះតទៅ (សៀមរាប ថ្ងៃទី០៩ មេសា ឆ្នាំ២០១៥)។
សូមរំលឹកផងដែរថា លោកអៀ.ឆៃយិន មេឈ្មួញរកស៊ីដឹកឈើក្រញូងខុសច្បាប់ដ៍សកម្មម្នាក់បានបើកឡានម៉ាកលុចស៊ិស៤៧០ពណ៍ខ្មៅគ្មានផ្លាកលេខបុករថយន្តអ្នកកាសែតជាច្រើនដងប៉ុងប៉ងធ្វើមនុស្សឃាតដោយចេតនា យ៉ាងកំរោលហាក់បីដូចជានៅក្នុងឆាកប្រយុទ្ធស៊ីសាច់ហុតឈាម ក្នុងរឿងហុងកុងអញ្ចឹញ។
ហេតុការណ៍គួឲ្យរន្ធត់នេះបង្កឡើងដោយលោក អៀ ឆៃយិន ជាមេឈ្មួញរកស៊ីឈើក្រញូងដ៍ធំប្រចាំអាណាចក្រខេត្តសៀមរាប បានបើករថយន្តបុកទៅលើរថយន្តអ្នកកាសែតមួយគ្រឿងកាលពីវេលាម៉ោង៩និង១២នាទីយប់ ថ្ងៃទី៧ ខែវិឆ្ឆិកា ឆ្នាំ២០១៣ នៅផ្លូវលំ១ខ្សែដែលតភ្ជាប់ពីផ្លូវ លេខ៦៧ ទៅស្រុកអង្គរជុំឋិតនៅភូមិវត្ត ឃុំស្រែណូយ ស្រុកវ៉ារិន ខេត្តសៀមរាប។
ក្រុមអ្នកកាសែតរងគ្រោះបាននិយាយថា ពួកគេបានបើករថយន្ត១គ្រឿងម៉ាកកាមរីសេរីឆ្នាំ៨៥ ពណ៍សពាក់ស្លាកលេខភ្នំពេញ -៥២១៧ មានគ្នា៣នាក់ទៅចតនៅកន្លែងកើតហេតុខាងលើបានបន្តិច ក៍មានរថយន្ត១គ្រឿងម៉ាកលុចស៊ិស៤៧០ ពណ៍ខ្មៅ បើកវ៉ាហួសបានប្រហែល៥០ម៉ែត្រ ក៍រយ៉ែរថយន្តថយក្រោយ មកបុកឡានរបស់គាត់ទាំងកំរោលជិត២០ដង បណ្ដាលឲ្យឡានពួកគាត់ (អ្នកកាសែត) ធ្លាក់ចូលក្នុងប្រឡាយតែម្ដង ហើយរថយន្តបង្ករបានរយ៉ែតាមបុកដល់ក្នុងប្រឡាយជាច្រើនដងថែមទៀត ប៉ុន្តែមិនមានបណ្ដាលឲ្យនរណាម្នាក់ទទួលរងរបួសនោះទេ ព្រោះពួកគាត់បានលោតចុះចេញពីរថយន្តទាន់។
អ្នកកាសែតបន្តថានៅយប់កើតហេតុមានរថយន្តការីបាឡែនពណ៍ស្ក២គ្រឿង បានដឹកឈើក្រញូងមកពីតំបន់ស្រុកអន្លង់វែង ខេត្តឧត្តរមានជ័យ មកខេត្តសៀមរាបតាមផ្លូវ៦៧ប៉ុន្តែមកដល់ចំណុចផ្លូវលំគ្រួសក្រហមក៍រថយន្តដឹកឈើទាំង២គ្រឿងនោះបើកសំដៅទៅស្រុកអង្គរជុំដោយសុវត្តិភាពមុនពេលលោកយិនបើករថយន្តបុកអ្នកកាសែតប្រហែលតែ៥នាទីប៉ុណ្ណោះ។
ជុំវិញសកម្មភាពដ៍អាក្រក់មកលើក្រុមអ្នកកាសែតពីសំណាក់ឈ្មួញឈើក្រញូងដ៍មហិមាឈ្មោះ អ៊ា ឆៃយិន នេះក្រុមអ្នកកាសែតបានដាក់ពាក្សបណ្ដឹងទៅតុលាការខេត្តសៀមរាប និងដាក់បណ្តឹងនៅអធិការស្រុកវ៉ារិន កាលពីថ្ងៃទី៨ ខែវិច្ឆកា ឆ្នាំ២០១៣។
សូមបញ្ជាក់ថា ឈ្មួញឈើក្រញូងរូបនេះ (អ៊ាឆៃយិន) កន្លងមកធ្លាប់ត្រូវបានអ្នកកាសែតរងគ្រោះខាងលើ ហៅសមត្ថកិច្ចអោយបង្ក្រាបរថយន្តដឹកឈើក្រញូងរបស់គាត់ជាញឹកញាប់ តែឈ្មួញរូបនេះ គេនៅតែមានឱកាសរកស៊ីដឹកឈើក្រញូងខុសច្បាប់បានដដែល មិនដឹងថា គាត់មានខ្សែ ឬខ្នងបង្អែកប៉ុណ្ណានោះទេ ឬមួយមានខ្សែតាមរយៈសូកលុយឲ្យសមត្ថកិច្ច។
ក្រុមអ្នកកាសែតរងគ្រោះដែលពុំទាន់បានទទួលយុត្តិធម៌ខាងលើបានប្រាប់អ្នកយកព័ត៌មានយើងនៅព្រឹកថ្ងៃទី២១ ខែឧសភា ឆ្នាំ២០១៥នេះថា កាលពីថ្ងៃទី១៩ ខែឧសភា ឆ្នាំ២០១៥នេះ ពួកគាត់បានទៅដាក់បណ្តឹងឧទ្ធរណ៍ នៅសាលាដំបូងខេត្តសៀមរាប បន្តទៅទៀតដើម្បីស្វែងរកយុត្តិធម៌ទៅតាមផ្លូវច្បាប់ បើទោះជាមិនមានលុយដូចថៅកែរកស៊ីដឹកឈើក្រញូងឈ្មោះ អ៊ាឆៃយិន នេះក៏ដោយ ក៏ពួកគាត់មិនមានការអស់សង្ឃឹមក្នុងការទាមទារកយុត្តិធម៌តាមផ្លូវច្បាប់នោះទេ ទោះជាសាលាដំបូងខេត្តសៀមរាប មិនបានផ្តល់យុត្តិធម៌ជូនពួកគាត់បែបនេះក៏ដោយ។
នៅព្រឹកថ្ងៃទី២១ដដែលនេះ លោក អ៊ាឆៃយិន បានប្រាប់អ្នកយកព័ត៌មានយើងតាមទូរស័ព្ទថា លោកមិនបានដឹងរឿងគេតម្កល់ ឬមិនតម្កល់សំណុំរឿងអ្នកកាសែតខាងលើនោះទេ ហើយតុលាការក៏មិនបានកោះហៅលោកដែរ។ លោក យិន បន្ថែមថា សព្វថ្ងៃនេះលោកមិនបានរកស៊ីដឹកឈើទៀតទេ លោកបានរកស៊ីលក់កន្ទក់ លក់អង្ករនៅផ្ទះ បន្ទាប់មកក៏ប្រាប់ថា ជាប់រវល់ រួចក៏បិទទូរស័ព្ទបាត់ទៅ។
អ្នកកាសែតរងគ្រោះខាងលើ សំនូមពរទៅសាលាឧទ្ធរណ៍ មេត្តាផ្តល់យុត្តិធម៌ដល់ពួកគាត់ ដែលជាជនរងគ្រោះពិតប្រាកដ។ និងសូមសំនូមពរទៅសមាគមន៍ អង្គរការផ្សេងៗ ស្ថាប័ណឯករាជនានា មេត្តាជួយរកយុត្តិធម៌ជូនពួកគាត់ផង ព្រោះពួកគាត់ជាអ្នកកាសែតមិនមានលុយសំរាប់តតាំងក្តីរកយុត្តិធម៌នោះទេ មានតែភាពបរិសុទ្ធតែប៉ុណ្ណោះ សំ រាប់រកយុត្តិធម៌៕ ដោយ៖ ផ្លុង-រ៉េត
.jpg)
.jpg)
.jpg)
.png)
.jpg)
.jpg)
.png)
