លោក ទិត្យ ណារ៉ុង អធិការក្រុងសៀមរាប ត្រូវបានប្រកាសតែងតាំងទៅជាស្នងការខេត្តសៀមរាប ជំនួសលោក ហូ វ៉ាន់នី នៅព្រឹកថ្ងៃទី១០ ខែកក្កដា ឆ្នាំ២០១៧នេះ ក្រោមអធិបតីភាពរបស់ឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងឧកឧត្តម ឃឹម ប៊ុនសុង អភិបាលខេត្តសៀមរាប ព្រមទាំងមន្ត្រីរាជការគ្រប់ជាន់ថ្នាក់ នៅស្នងការនគរបាលខេត្តសៀមរាប។
បើទោះជាការឡើងតំណែងផ្លោះពីអធិការក្រុង ទៅជាស្នងការខេត្ត ក្រោមការរិះគន់ពីមន្ត្រីរាជការ និងប្រជារាស្ត្រយ៉ាងណាក៏ដោយ ក៏អ្វីៗវាបានកន្លងផុតទៅដោយរលួនគ្មានអ្នកណាអាចប្រកែកបានទេ ព្រោះឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានមានប្រសាសន៍ថា ˝ ការតម្លើងលោក ទិត្យ ណារ៉ុង ពីអធិការក្រុងសៀមរាប ទៅជាស្នងការខេត្តសៀមរាបជំនួសលោក ហូ វ៉ាន់នី ដែលទើបឡើងកាន់តំណែងស្នងការខេត្តបានតែជាងពីរខែនេះ គឺធ្វើឡើងតាមការស្នើសុំរបស់ថ្នាក់ដឹកនាំខេត្តសៀមរាប ហើយឯកឧត្តមក៏បានធ្វើលិខិតស្នើសុំទៅក្រសួងមហាផ្ទៃ ដែលមានចំណារពីក្រសួងមហាផ្ទៃរបស់ សម្តេច ស ខេង ទៅតាមនិតិវិធីរដ្ឋបាលនគរបាលជាតិ ចំណែកឯលោក ហូ វ៉ាន់នី ត្រូវបានតែងតាំងទៅចាអនុប្រធាននាយកដ្ឋានទេសចរណ៍˝។
សូមរំលឹកផងដែរថា លោក ទិត្យ ណារ៉ុង អតីតជាអធិការស្រុកអង្គរធំ ខេត្តសៀមរាប ក្រោមពីលោក ឃឹម ប៊ុនសុង ប្តូរពីប្រធានយោធាខេត្តឬសឹករងខេត្ត ឡើងជាអភិបាលខេត្តសៀមរាប មិនបានប៉ុន្មានថ្ងៃផង លោក ទិត្យ ណារ៉ុង ត្រូវបានផ្លាស់ប្តូរអោយមកកាន់តំណែងជាអធិការក្រុងសៀមរាប ជំនួសលោក ស៊ុន សាន្ត ដោយលើកលោក ស៊ុន សាន្ត ពីអធិការក្រុងអោយឡើងទៅជាស្នងការរង បន្ទាប់ពីលោក ស៊ូ ភិរិន្ទ អស់តំណែងជាចៅហ្វាយខេត្តសៀមរាប។
ពលរដ្ឋខេត្តសៀមរាបសង្កេតឃើញថា ក្នុងកំឡុងពេលដែលលោក ហូ វ៉ាន់នី ឡើងកាន់តំណែងជាស្នងការខេត្តសៀមរាបមួយរយ:ពេលខ្លីនេះមិនដែលប្រើអំណាចជិះជាន់គាបសង្កត់ប្រជារាស្ត្រ ឬស៊ីសំណូកសូកប៉ាន់ឬប្រព្រឹត្តិខុសគោលការណ៍ថ្នាក់ដឹកនាំនោះទេ ហើយបែរជាមានការបង្ក្រាបបទល្មើសបនល្បែងស៊ីសង ឆ្នោតកន្ទុយលេខ យ៉ាងសកម្ម ដែលមានពាក្យចចាមអារាមជាច្រើនគេនិយាយថា លោក ហូ វ៉ាន់នី បង្ក្រាបឆ្នោត នាគនាំសំណាង ចំក្មួយរបស់លោក ឃឹម ប៊ុនសុង ទើបបានជាត្រូវបានប្តូរទួនាទីពីស្នងខេត្តសៀមរាបលឿងដូចផ្លេកបន្ទោលបែបនេះ។
ក្រុមអ្នកបើកបនល្បែងស៊ីសងនៅខេត្តសៀមរាប នាំគ្នាខ្លាចលោក ហូ វ៉ាន់នី ហើយគ្រវីក្បាលថា បើលោក ហូ វ៉ាន់នី នៅកាន់ជាស្នងការ តែពីរឆ្នាំពួកគាត់ច្បាស់ជាដាច់បាយហើយ ព្រោះមានមុខរបរផ្សេងឯណា មានតែមុខរបរបើកបនល្បែងស៊ីសង លក់ឆ្នោត តែប៉ុណ្ណោះ។ បន្ទាប់ពីពួគគេដកដង្ហើមវែងរួចមក ក្រុមអ្នកបើកបនល្បែងបានយកដៃស្ទាបទ្រូងហើយបន្លឺសំលេងថា ហ៊ឺស រាងធូទ្រូងបន្តិច ព្រោះលឺថា លោក ហូវ៉ាន់នី ជិតផ្លាស់ប្តូរហើយ សង្ឃឹមថា ស្នងការថ្មីលោក ទិត្យ ណារ៉ុង ចេះបើកភ្លើងខៀវអោយពួកគាត់បានបើកបនល្បែងវិញផង។
ឯកឧត្តម នាយឧត្តមសេនីយ៍ នេត សារឿន បានឡើងថ្លែងមតិសំណេះសំណាល និងធ្វើការផ្តែផ្តាំដល់លោក ទិត្យ ណារ៉ុង ស្នងការឡើងថ្មី អោយចេះគោរពវិជ្ជាជីវ: ចេះស្រលាញ់កូនចៅដូចគ្រួសាររបស់ខ្លួន ជៀសវាងប្រកាន់បក្សពួកនិយម រើសអើងពណ៍សម្បុរ និងត្រូវទទួលផែនការដែលថ្នាក់លើបានដាក់អោយនៅថ្ងៃនេះ ធ្វើអោយបានសម្រេចជោគជ័យ ជាពិសេសមុនបោះឆ្នោតឆ្នាំ២០១៨ខាងមុខនេះ ត្រូវរក្សាការពារសន្តិសុខសណ្តាប់ធ្នាប់អោយបានល្អ ព្រោះខេត្តសៀមរាប ជាខេត្តតំបន់ទេសចរណ៍ ហើយជាខេត្តដែលត្រូវវៀបចំការប្រជុំទាំងតូចទាំងធំទៀតផង។
មន្ត្រីរាជការ និងប្រជារាស្ត្រខេត្តសៀមរាប រងចាំមើលស្នាដៃរបស់លោកស្នងការឡើងថ្មី ទិត្យ ណារ៉ុង បន្ទាប់ពីថ្ងៃឡើងកាន់តំណែងនេះទៅ តើលោកស្នងការហ៊ានចេញមុខបង្ក្រាបបទល្មើស បនល្បែងស៊ីសង ឆ្នោតកន្ទុយលេខ ដូចលោក ហូ វ៉ាន់នី ដែរឬទេ? បើលោកស្នងការមានស្នាដៃល្អពលរដ្ឋនិងជួយគាំទ្រ តែបើឡើងដើម្បីតែអំណាចលុយកាក់ប្រាក់ខែ និងដើម្បីការពារបនល្បែងនោះច្បាស់ជាមានការរិះគន់ជាក់ជាមិនខាន៕ ដោយ៖ ផ្លុង រ៉េត