អូរធម្មជាតិអាយុរាប់រយឆ្នាំត្រូវបានគេឃុបឃិតជាប្រព័ន្ធចាក់ដីលុបធ្វើជាកម្មសិទ្ធិ

អូរវប្បធម៌ធម្មជាតិ ដែ​លមាន​ឈ្មោះថា អូរបីតាប់ (អូរបាយតាប់) ស្ថិតក្នុង​ភូមិ​ស្រែ​​ណូយ ឃុំស្រែណូយ ស្រុកវ៉ារិន ខេត្ត​សៀមរាប ត្រូបានអ្នក​មាន​លុយ​ ឃុប​ឃិត​ជាមួយ​អាជ្ញា​ធរ ចាក់ដីលុប​ធ្វើ​ជាកម្មសិទ្ធិផ្ទាល់ខ្លួនផង និង ពុះឡូតិ៍លក់ យកលុយចែកគ្នាចាយយ៉ាង​រំភើយ គ្មាន​សមត្ថកិច្ច ឬ ជំនាញពាក់ព័ន្ធណាអើពើទាល់តែសោះ។

បុរស់មានសម្បុរខ្មៅស្រអែម មានវ័យប្រ​ហែលជិត៥០សិបឆ្នាំ កម្ពស់ប្រហែល១ម៉ែត្រ​៦៥ ដែល​មាន​ឈ្មោះថា គ្រូច សម្បត្តិ បានប្រាប់ កាសែត កម្ពុជាសុវណ្ណភូមិ ផ្ទាល់មាត់លើដីដែលគាត់​បាន​ចាប់​នៅ​មាត់​អូរ​បីតាប់ថា ចំណុចដែល​គាត់​បាន​ចាក់​លុប​នេះគឺ​ជាដីដែល​គាត់​បានទិញ​ពីលោក ផន ភន់ ជាយូរ​ឆ្នាំ​ណាស់មក​ហើយ ដែល​មានប្លង់ដីត្រឹមឃុំ ប្រថាប់ត្រាដោយ​លោក សួន ឡី មេឃុំចាស់។ ម្ចាស់ដីរូបនេះបានបន្តថា លោកចាក់ដីដើម្បីធ្វើផ្ទះ និង ធ្វើកន្លែងលក់ដូរខ្លះ ដោយ​អះ​អាង​ថា ដីរបស់លោកមិន​ចំអូរទេ តែបើដីអ្នកផ្សេងខាងលិចបានចាក់ចំអូរតែម្តង។

ថៅកែស្រី ម្ចាស់ដីឡូតិ៍ឈ្មោះ ម៉ាឡៃ ដែលបាន​ចាក់ដីខាងត្បូងថ្នល់ ទល់មុខដីលោក គ្រូច សម្បត្តិ នៅអូរបីតាប់ បានប្រាប់តាម​ទូរស័ព្ទថា ដីរបស់គាត់​មិន​ជាប់​ពាក់ព័ន្ធជាមួយអូរ ឬ ផ្លូវ​ច្បាប់​នោះទេ ព្រោះ​អ្នក​ណាក៏ស្គាល់គាត់ដែរនៅ​ឃុំ​ស្រែណូយនេះ ហើយ​គាត់​បាន​រស់​នៅ​ទី​នេះ​២០​ឆ្នាំ​ហើយ​ ឯដីរបស់គាត់​លក់​មួយឡូតិ៍តម្លៃ​បីម៉ឺនដុល្លារ ទំហុំ៥គុណ៥០ម៉ែត្រ អោយ​តែអ្នក​ណា​ទិញ​គាត់​​ហ៊ាន​ធានាអះអាងគ្រប់បែបយ៉ាងទាំងអស់។

នៅព្រឹកថ្ងៃទី០៥ ខែមីនា ឆ្នាំ២០២០នេះ កម្ពុជាសុវណ្ណភូមិ ពុំអាច​សុំការ​បំភ្លឺពីលោកស្រីមេឃុំស្រែ​ណូយឈ្មោះ វ៉ក ណម បានទេ ព្រោះទូរស័ព្ទចូលបីដងលើកទទួលហើយតែមិន​និយាយឆ្លើយ​ឆ្លង​អ្វីទាំងអស់។

នៅព្រឹកដដែលនេះផងដែរ លោកអភិបាលស្រុកវ៉ារិន បានមាន​សប្រសាសន៍​​តាម​ទូរស័ព្ទមក​កម្ពុជាសុវណ្ណ​ភូមិថា លោកពុំបានដឹងរឿងចាក់ដីលុប​អូរនេះទេ ហើយ​ជំរុញ​អោយ​កម្ពុជា​សុវណ្ណភូមិ​សាក​សួរ​ទៅ​ម្ចាស់ដីខាងលើ​នេះទៅវិញ។

ចំណែកលោក រដ្ឋា ប្រធានបុរាណដា្ឋន​នៅខេត្ត​សៀមរាប បាន​ប្រាក់ក្រុម​ការ​ងារតាមទូរស័ព្ទថា អូរបីតាប់ មិន​ស្ថិត​ក្រោម​ការ​គ្រប់គ្រងរបស់បុរាណដ្ឋានទេ គឺស្ថិត​ក្រោម​ការ​គ្រប់​គ្រងរបស់​មន្ទីធន​ធានទឹក។

កាសែតកម្ពុជាសុវណ្ណភូមិ ពុំអាចសុំការបកស្រាយ​ពីមន្ទីរធនធានទឹកបានទេ ព្រោះគ្មានលេខ​ទូរស័ព្ទ​សម្រាប់ធ្វើ​ការ​ទំនាក់ទំនង។

ប្រភព​ពី​ប្រ​ជាពលរដ្ឋ និង មន្ត្រីរាជការមួយចំនួននៅឃុំស្រែណូយ បាន​លួច​ខ្សឹបប្រាប់កាសែត​ កម្ពុជា​សុវណ្ណភូមិថា ម្ចាសដី មេឃុំ និង​អ្នក​មាន​អំណាច ដែលមានតួនាទី​​ជាអង្គរក្ស​ម្នាក់ បាន​ឃុប ឃិត​គ្នា​ជាប្រព័ន្ទចាក់ដីវាតទីបំពានលើ​អូរបុរាណ ឬ អូរធម្មជាតិ ដែល​មាន​អាយុរាប់រយឆ្នាំមក​ហើយ គ្មាន​អ្នក​ណាគេអើពើទេ ព្រោះ​ខ្លាច​អំណាច​មេឃុំផង ខ្លាច​អំណាចលុយផង និង​អំណាច​របស់​លោក​ អង្គរក្សស័ក្កិធំម្នាក់នោះ​​ផង ហើយកម្ពុជាសុវណ្ណភូមិ​ក៏ពុំទាន់អាច​សុំការ​បក​ស្រាយ​ពី​លោក​​អង្គ​រក្ស​រូបនោះបានដែរ​ ព្រោះគ្មាន​​លេខ​ទូរស័ព្ទរបស់គាត់។

ប្រជា​ពលរដ្ឋ​និង​មន្ត្រីរាជការនៅ​ឃុំ​ស្រែណូយ សូមសំនូមពរ​ទៅ​ខាង​ជំនាញពាក់ព័ន្ធ មន្ទីរធន​ធាន​ទឹក ជាពិសេស​ឯកឧត្តម​ ទៀ សីហា អភិបាលខេត្តសៀមរាប មេត្តាជួយការពារអភិរក្ស​អូរបីតាប់ អោយ​បាន​គង់​វង់ទុក​ជាសម្បត្តិរួមទៅថ្ងៃអនាគត់ផង៕ ដោយ៖ ផ្លុងរ៉េត