ក្បួនរថយន្តរបស់សម្តេចក្រុមព្រះ ត្រូវរថយន្តដឹកដីបើគៀរបណ្តាលអោយមនុស្ស៦នាក់រងរបួស

ក្បួន​រថ​យន្ដ​របស់​សម្ដេច​ក្រុម​​ព្រះ​ដែល​កំ​ពុង​ធ្វើដំ​ណើរ​ត្រឡប់​ទៅទីក្រុង​ភ្នំ​ពេញ​វិញ ត្រូវបានរថ​យន្ដ​ដឹក​ដី​មួយ​គ្រឿង​បាន​បើក​ចូលក្បួនរថ​យន្ត​របស់ព្រះអង្គ ហើយ​​គៀរ​រថ​យន្ដ​របស់​ព្រះ​អង្គបណ្តាល​អោយ​មនុស្ស​​រង​របួស​ធ្ងន់​ស្រាល៦នាក់ ក្នុង​នោះ​សមត្ថ​កិច្ច​អះអាងថា មានស្ដ្រីម្នាក់​នៅ​ក្នុង​រថ​យន្ដ​នោះ​ដែល​ធ្វើ​អោយ​គេ​សង្ស័យថា អាចជា​​អ្នក​ម្នាង​ អ៊ុក​ផល្លា។

គ្រោះថ្នាក់ចរាចរណ៍ធ្វើឱ្យមានការភ្ញាក់ផ្អើលខាងលើនេះ បានកើត​ឡើងកាល​ពី​វេ​លា​ម៉ោង​ ១២​និង​៥០​នា​​ទី​​រសៀល​​ថ្ងៃទី​២៥ ខែមេសា ឆ្នាំ២០១៥នេះ ស្ថិត​នៅ​លើ​កំ​ណាត់​ផ្លូវ​ជាតិ​លេខ​៧ ក្នុងភូមិ​ព្រៃខ្វិត​ ឃុំខ្វិតធំ​ ស្រុក​ព្រៃឈរ ខេត្ដ​កំពង់​ចាម។
លោក កែវ សៀងហ៊ន  អធិការនគរបាលស្រុកព្រៃឈ​បានបញ្ជាក់ថា ខណៈ​ដែល​ក្បួន​រថ​យន្ដ​របស់​សម្ដេច​ក្រុម​ព្រះ ធ្វើ​ដំ​ណើរ​តាម​ដង​ផ្លូវ​ខាងលើ ដែលមានរថយន្ដស៊ីរ៉ែននាំមុខផងនោះ​ កំពុងធ្វើដំណើរ​មក​កាន់​រាជ​ធានីភ្នំពេញវិញ​ ស្រាប់តែរថយន្ដដឹកដីមួយគ្រឿង ពាក់ស្លាកលេខ ភ្នំពេញ 3B-4495 ធ្វើ​ដំ​ណើរ​បញ្ច្រាសទិសគ្នា ហើយពេលផុត​រថយន្ដស៊ីរ៉ែន រថយន្ដដឹកដីបានបើកចូលចន្លោះ​ក្បួនទៅគៀររថយន្ដរបស់ព្រះអង្គ រួចបន្ដទៅបុកគល់ឈើថែមទៀត។ លោក​អធិការរូបនេះ​បានបន្ដថា គ្រោះថ្នាក់ ចរាចរណ៍ខាងលើ​ បានបណ្ដាលឱ្យមនុស្ស ៦នាក់រងរបួសធ្ងន់ស្រាល ក្នុងនោះមានស្ដ្រី​ម្នាក់ ទំនងជាអ្នកម្នាង អ៊ុកផល្លា ។

ក្រោយកើតហេតុ កម្លាំងសមត្ថកិច្ចបាន ចុះទៅជួយអន្ដរាគមន៍ភ្លាមៗ និងចាត់វិធាន ការទៅតាមផ្លូវច្បាប់៕ ប្រភពពីបណ្តាញសង្គម (Pich Maxis)