អាជ្ញាធរខេត្តកណ្តាលបានថ្លែងថាសមត្ថកិច្ចរបស់ខ្លួនកំពុងស្រាវជ្រាវ ករណីជម្លោះដីធ្លីរវាងក្រុមយោធា ជាមួយប្រជាពលរដ្ឋប្រមាណជាង ១០០នាក់ដែលបានធ្វើការតវ៉ាករណីវិវាទដីធ្លីមួយ ឈានទៅដល់ការផ្ទុះអាវុធបណ្តាលឲ្យប្រជាពលរដ្ឋម្នាក់រងរបួស។ ហេតុការណ៍នេះ បានកើតឡើងកាលពីរសៀល ថ្ងៃទី៣ ខែមិថុនា ម្សិលមិញនៅឃុំទួលព្រេជ ស្រុកអង្គស្នួល ខេត្តកណ្តាល។ លោក អំ សំអាត នាយករងទទួលបន្ទុកកម្មវិធីឃ្លាំមើលនៃអង្គការការពារសិទ្ធិមនុស្សលីកាដូ ថ្លែងឲ្យដឹងថា ករណីនេះអាជ្ញាធរត្រូវតែមានការស៊ើបអង្កេតស្វែងរកអ្នកទទួលខុសត្រូវលើការបាញ់ទៅលើអ្នកតវ៉ា រួមនឹងអ្នកបញ្ជាឲ្យប្រើអំពើហឹង្សារនេះ យកទៅដាក់ទោស។ មន្ត្រីអង្គការសិទ្ធិមនុស្សរូបនេះ បញ្ជាក់ថាករណីនេះ គឺជារឿងខុសឆ្គងធ្ងន់ធ្ងរ ដែលអាជ្ញាធរយកកម្លាំងទាហានទៅបង្ក្រាបការតវ៉ារឿងដីធ្លី ដែលករណីនេះធ្លាប់បានកើតមានជាហូរហែរកន្លងមកហើយ។សូមបញ្ជាក់ថាកាលពីរសៀលថ្ងៃព្រហស្បតិ៍ម្សិលមិញ កម្លាំងយោធាមួយក្រុម ប្រដាប់ដោយអាវុធវែង បានផ្ទុះអាវុធដូចលាចអំឡុងពេលពួកគេប្រឈមមុខគ្នានឹងអ្នកភូមិប្រមាណជាង១០០នាក់ នៅឃុំទួលព្រេជ ស្រុកអង្គស្នួលខេត្តកណ្តាល ដែលតវ៉ាមិនឲ្យគ្រឿងចក្រជីកដីនៅតំបន់ចម្រូងចំរះ មិនទាន់ដោះស្រាយគ្នាចប់ដោយសន្តិវិធី។ ហេតុការណ៍ដ៏ហិង្សានេះ ធ្វើឲ្យបុរសម្នាក់របួសធ្ងន់ ពេលនេះកំពុងសង្គ្រោះបន្ទាន់នៅមន្ទីរពេទ្យកាល់ម៉ែត។ ទោះយ៉ាងណាអាជ្ញាធរខេត្តកណ្តាល បានអះអាងតាមរយៈលិខិតមួយច្បាប់ថាដីដែលកំពុងមានទំនាស់នេះ ជាដីរបស់រដ្ឋ និងអំពាវនាវឲ្យប្រជាជនមានការអត់ធ្មត់ រង់ចាំសម្របសម្រួលគ្នាជាមួយគណៈកម្មការអន្តរក្រសួងដោះស្រាយផលប៉ះពាល់។
ប្រភពព័ត៌មានៈ RFI
.jpg)
