សកម្មភាពដឹកជញ្ជូនឈើនៅពេលយប់របស់មេឈ្មួញដុះស្លែម្នាក់ឈ្មោះលោក ស៊ីម មានវ័យប្រហែលជាង៣០ឆ្នាំត្រូវជាកូនប្រុសបង្កើតរបស់លោកថៅកែ ស៊ូ ដែលជាអ្នកមានមួយរូបដោយសារកស៊ីដឹកឈើក្រញូង និងឈើលេខ២អស់រយៈពេលជាយូឆ្នាំណាស់មកហើយ ដោយត្រូវរូវគ្នាជាមួយមន្ត្រីជំនាញតាមដងផ្លូវ នឹងមានខ្នងបង្អែកពីមន្រ្តីរាជការធំៗតាមបណ្តារខេត្តនានាទៀតផង។
ប្រភពបានរាយការណ៍ថា ជារៀងរាល់យប់លោកស៊ីមបានប្រើរថយន្តយីឌុបគ្របកៅស៊ូប៉ាតង់ជិតដឹកឈើពីខេត្តកំពង់ធំ យកមកលក់នៅខេត្តសៀមរាប នឹងមួយចំនួនទៀតយកទៅលក់នៅឯខេត្តបន្ទាយមានជ័យ។ ប្រភពបន្តថា លោកស៊ីមពុំដែលរកស៊ីត្រឹមត្រូវ ឬស្របច្បាប់មួយរយភាគរយនោះទេ ឈើដែលនៅក្នុងរថយន្តទាំងនោះគឺតែងតែផ្ទុកលើសទម្ងន់ដែលច្បាប់បានកំណត់។ ប្រភពបន្តទៀតថា ដោយអំណាចនិងទឹកប្រាក់របស់លោកស៊ូជាឪពុកបានធ្វើអោយលោកស៊ីមរកស៊ីទាំងស្របច្បាប់ និងមិនស្របច្បាប់បានដោយរលួន មិនតែប៉ុណ្ណោះថែមទាំងមានអំណាចក្នុងការបញ្ជាអោយសមត្ថកិច្ចខេត្តសៀមរាបចេញមុខកាងរាល់ពេលរថយន្តដឹកឈើត្រូវបានអ្នកកាសែតតាមប្រម៉ាញ់រូបភាពម្តងៗ។
ប្រភពពីអ្នកសារព័ត៌មានជិត៣០នាក់នៅក្នុងខេត្តសៀមរាបបានអោយដឹងថា នៅពេលពួកគាត់សុំថតរូបឡានដឹកឈើរបស់លោកស៊ីម និងសុំមើលច្បាប់ដែលរដ្ឋបាលព្រៃឈើចេញអោយក្នុងការដឹកឈើទាំងនោះលោក ស៊ីម បាននិយាយក្អេងក្អាងថា អ្នកកាសែតក្មានសិទ្ធមើលច្បាប់ដឹកឈើរបស់គាត់ទេ។ ប្រភពបន្តថា លោកស៊ីមតែងតែទូរស័ព្ទប្តឹងទៅស្នងការខេត្ត និងស្ថាប័នតុលាការ ក្នុងការគំរាមកំហែងអ្នកកាសែត ដោយមូលបង្កាច់ថា អ្នកកាសែតដេញតាមជំរិតទាប្រាក់ពីឡានដឹកឈើរបស់គាត់ នៅពេលមានអ្នកកាសែតណាហ៊ានតាមថតរូប ឬតាមសុំមើលច្បាប់រថយន្តដឹកឈើរបស់គាត់នៅពេលយប់ម្តងៗ។
ប្រភពពីមេព្រៃម្នាក់សុំមិនបញ្ចេញឈ្មោះបានលួចខ្សឹមប្រាប់ថា អ្នកដឹកឈើពេលយប់ ហើយគ្រប់ជិតមិនអោយគេឃើញគឺជាអ្នករកស៊ីមិនស្របច្បាប់ទេ។ គាត់បានបន្ថែមថា អ្នកដែលរកស៊ីត្រឹមត្រូវស្របច្បាប់គឺរកស៊ីពេលថ្ងៃ បើដឹកឈើគឺដាក់ឈើដឹកដោយបើកចំហរអោយគេមើលឃើញ ម្យ៉ាងទៀតច្បាប់ដែលរដ្ឋបាលព្រៃឈើចេញអោយត្រូវថតចំលងជូនគ្រប់ស្ថាប័នពាក់ព័ន្ធ សូម្បីតែអ្នកកាសែតក៏អាចដឹកលឺបានដែរ ព្រោះអ្នកកាសែតជាអ្នកនាំសារទាំងនេះជូនប្រជាពលរដ្ឋ និងថ្នាក់ដឹកនាំ ជៀសវាងអ្នករកស៊ីមានការឃុបឃិតពុករលួយជាមួយមន្រ្តីជំនាញ និងសមត្ថកិច្ចដោយលាក់បាំងព័ត៌មានពិតប្រាកដ។
មជ្ឈដ្ឋានទូទៅរិះគន់ថា បើលោកស៊ីមពិតជារកស៊ីត្រឹមត្រូវតាមច្បាប់មែន ចាំបាច់បង់លុយអោយសមត្ថកិច្ចតាមដងផ្លូវធ្វើអី ហើយចាំបាច់ប្តឹងអ្នកនេះ ប្តឹងអ្នកនោះធ្វើអី ដឹកឈើដោយបើកចំហរអោយគេមើលឃើញ ហើយថតចំលងច្បាប់ដឹកឈើអោយអ្នកកាសែតជួយចុះអោយថា ឈើដែលដឹកនេះមានច្បាប់ត្រឹមត្រូវ សូមអោយប្រជាពលរដ្ឋជួយទិញ ដើម្បីលុបបំបាត់ពួកដឹកឈើខុសច្បាប់ នេះក៏វាជាការជួយផ្សាយពាណិជ្ជកម្មមួយដ៏ល្អផងដែរ កុំធ្វើលឹបលលាក់មុខលាក់ក្រោយដូចសត្វពង្រួលបែបនេះ។
យើងពុំអាចសុំការបំភ្លឺពីលោក ដង្ខៅស៊ីម បានទេនៅល្ងាចថ្ងៃអាទិត្យនេះ ព្រោះទូរស័ព្ទចូល២ដងមិនមានអ្នកលើកទទួល។
លោក យឹម-ស៊ីវន នាយសង្កាត់រដ្ឋបាលព្រៃឈើស្រុកប្រាសាទបាគង និងក្រុងសៀមរាប បានប្រាប់តាមទូរស័ព្ទនៅល្ងាចដដែលនេះថា ឈើខាងលើនេះមានច្បាប់។ លោកបន្ថែមថា រវល់ជាប់ការខ្មួយស្តាប់មិនសូវលឺសុំសួរទៅលោក ម៉ុង-ប៊ុនលីម នាយផ្នែកវិញ។
លោក ម៉ុង-ប៊ុនលីម នាយផ្នែករដ្ឋបាលព្រៃឈើខេត្តសៀមរាប ដំបូងបានអោយដឹងតាមទូរស័ព្ទទាំងចំអកឡកលើយថា ” បើចង់ដឹកគេមានច្បាប់ប៉ុន្មានមេ្តចមិនឆែកមើលខ្លួនឯងទៅ “។ បន្ទាប់មកទើបលោកឆ្លើយថា តាមលោកដឹងឈើដែលតែងដឹកដោយលោក ស៊ីម នេះជាឈើក្រុមហ៊ុនមួយដែលមានឈ្មោះថា សុខទំរីង ដឹកចេញពីខេត្តកំពង់ធំ មានច្បាប់ប្រហែលពី២៨ទៅ៣០ម៉ែត្រគូបក្នុងមូយរថយន្ត។
សូមបញ្ជាក់ថា រាល់ពេលមានរថយន្តដឹកឈើឆ្លងកាត់ខេត្តសៀមរាបម្តងៗ អ្នកសារព័ត៌មានមិនអាចសុំខាងមន្ត្រីជំនាញអោយមកត្រួតពិនិត្យច្បាប់បានទេ ដោយមន្រ្តីជំនាញទាំងតូចទាំងធំអស់នោះគ្រាន់តែឆ្លើយថា ឈើគេមានច្បាប់ តែច្បាប់ពិតប្រាកដគេសរសេរយ៉ាងណាក៏ពុំដែលបានឃើញបានទទួលដោយផ្ទាល់ដៃយកមកចុះផ្សាយដែរ ទង្វើបែបនេះហើយដែលធ្វើអោយគេសង្ស័យថា លោកស៊ីមកំពុងយកដៃបាំងមេឃឆ្លងសមុទ្រ ដោយឃុបឃិតជាមួយមន្ត្រីជំនាញ៕ ដោយ៖ ផ្លុង-រ៉េត (បើអ្នកស្រលាញ់ព្រៃឈើ ហើយស្អប់ខ្ពើមអំពើពុករលួចសូមជួយចែករំលែកអត្ថបទនេះតាមបណ្តាញសង្គមរបស់អ្នក)