អង្គការសង្គម​ស៊ីវិល​និង​ប្រជាពលរដ្ឋ​ស្នើឲ្យ​រដ្ឋាភិបាល ​ដក​កំលាំង​ប្រដាប់​អាវុធ​ចេញ​ពី​ភ្នំពេញ

ក្រុម អង្គការសង្គមស៊ីវិល និងប្រជាពលរដ្ឋ ជាថ្មីម្តងទៀត ស្នើឲ្យរដ្ឋាភិបាល របស់លោកនាយករដ្ឋមន្ត្រី ហ៊ុន សែន ដកកងកំលាំងប្រដាប់អាវុធ និងរថ ពាសដែក ចេញពីរាជធានីភ្នំពេញឲ្យចូលទៅបន្ទាយវិញ ដើម្បីដោះស្រាយពី ភាពមិនប្រក្រតីនៃការបោះឆ្នោតដោយសន្តិវិធី ។

ការអំពាវនាវនេះ ធ្វើឡើង កាលពីល្ងាចថ្ងៃទី២១ ខែសីហានេះ នៅពេលដែល សង្គមស៊ីវិល ប្រជាពលរដ្ឋ ដូនជីតាជី និងព្រះសង្ឃ ប្រមាណ៣០០នាក់ ជួប ជុំគ្នាក្នុងរាជធានីភ្នំពេញ ដើរដង្ហែជុំវិញវត្តភ្នំ ដោយមានកាន់ធូប ផ្កាឈូក និង ទង់សាសនា បួងសួង សុំបន្ទន់ចិត្តរដ្ឋាភិបាល បោះបង់ការប្រើកងកំលាំងប្រ ដាប់អាវុធ និងឈប់បំភិតបំភ័យប្រជាពលរដ្ឋ ដែលមិនសុខចិត្តនឹងលទ្ធផល បោះឆ្នោត។

ក្រុមប្រជាពលរដ្ឋបាន អំពាវនាវឲ្យអាជ្ញាធររបស់រដ្ឋាភិបាល បញ្ឈប់សកម្មភាពបង្ខំពួកគាត់ឲ្យចុះហត្ថលេខា ទទួលស្គាល់លទ្ធផល បោះឆ្នោត និងបញ្ឈប់ការចាប់ខ្លួនយុវជន ឬប្រជាពលរដ្ឋដែលជូនផ្កាឲ្យសមត្ថកិច្ច។

ឆ្លើយតបទៅនឹងការអំពាវនាវនេះ រដ្ឋមន្ត្រីក្រសួងមហាផ្ទៃ លោក ស ខេង បានប្រាប់បណ្តាញព័ត៌មានរដ្ឋាភិបាល មិនទាន់អាចដក កងកំលាំងប្រដាប់អាវុធ នៅពេលនេះនោះទេ ដោយសារបាតុកម្មនឹងអាចកើតមាន។ លោកថា កងកំលាំងទាំងនោះ ជាអ្នកការពារ កុំឲ្យផ្ទុះហិង្សា និងមិនប្រកាន់បក្សណាឡើយ ។

គួររំលឹកថា អង្គការសង្គមស៊ីវិលជាង៤០ នៃបន្ទប់ស្ថានការណ៍បោះឆ្នោត កាលថ្ងៃទី២១ ខែសីហា ក៏បានចេញសេចក្តីថ្លែងការណ៍ ជំរុញឲ្យរដ្ឋាភិបាល ដកកងកំលាំងប្រដាប់អាវុធ និងគ្រឿងយុទ្ធភណ្ឌយោធា ដែលដាក់ពង្រាយនៅរាជធានីភ្នំពេញនោះ ទៅកន្លែង ដើមវិញ។ ក្រុមសិទ្ធិមនុស្សទាំងនេះ បញ្ជាក់ទៀតថា គណៈកម្មាធិការជាតិរៀបចំការបោះឆ្នោត(គ.ជ.ប) និងគណៈកម្មការសន្តិសុខ ទទួលបន្ទុកការបោះឆ្នោត គឺជាអ្នកមានសមត្ថកិច្ច រក្សាសន្តិសុខ និងសុវត្ថិភាពអំឡុងពេលបោះឆ្នោត ពោលមិនមែនកងទ័ពនោះទេ។  ពួកគេក៏ទាមទារឲ្យរដ្ឋាភិបាល ត្រូវលើកលែងការចោទប្រកាន់ទាំងស្រុងទៅលើយុវជន និងយុវតី ៤នាក់ដែលជូនផ្កាដល់កងកំលាំង ប្រដាប់អាវុធនោះផងដែរ ៕ ប្រភពពី ខ្មែរម្ចាស់ស្រុក