ថៅកែហាងធ្វើសរសៃបង្កប់សេវាផ្លូវភេទម្នាក់ត្រូវបានសមត្ថកិច្ចឃុំខ្លួន

ស្ត្រី​​ថៅកែ​ហាង​ធ្វើ​សរសៃ​​ម្នាក់​ត្រូវបាន​ចៅក្រម​ស៊ើបសួរ​សាលាដំបូង​រាជធានី​ភ្នំពេញ សម្រេច​នៅ​​រសៀល​ថ្ងៃ​ទី​២១ ខែ​មីនា ឆ្នាំ​២០១៦នេះ ដោយ​ឃុំខ្លួន​ដាក់ពន្ធនាគារ ដើម្បី​ស៊ើបអង្កេត​ករណី​បើក​ហាង​ម៉ាស្សា​បង្កប់​សេវាកម្ម​ផ្លូវភេទ។

ស្ត្រី​រូប​នេះ​ឈ្មោះ ម៉ៅ ស្រីមុំ អាយុ​៣៤​ឆ្នាំ ត្រូវបាន​នគរបាល​ការិយាល័យ​ប្រឆាំង​ការជួញដូរ​មនុស្ស​និង​ការពារ​អនីតិជន​រាជធានី​ភ្នំពេញ ឃាត់ខ្លួន​ជាក់ស្ដែង​កាលពី​រសៀល​ថ្ងៃ​ទី​១៨ ខែ​មីនា ឆ្នាំ​២០១៦ នៅ​ចំណុច​ផ្ទះ​លេខ​២៤២ ផ្លូវ​លេខ​៣៧១ ភូមិ​បឹង​ឈូក សង្កាត់​ទឹកថ្លា ខណ្ឌ​សែន​សុខ។ 

សមត្ថកិច្ច បានឲ្យដឹងថា កន្លង​មក​ទីតាំង​នេះ​ធ្លាប់​ប្រកប​អាជីវកម្ម​នេះ​ជា​យូរ​មក​ហើយ។ សមត្ថកិច្ច​ក៏​ធ្លាប់​អប់រំ​ណែនាំ​ឲ្យ​បញ្ឈប់​សកម្មភាព​ល្មើសច្បាប់ តែ​ម្ចាស់​ទីតាំង​មិន​បញ្ឈប់​ទើប​ឈាន​ដល់​ការចុះ​បង្ក្រាប​តែម្តង។

ក្នុង​ការចុះ​បង្ក្រាប​នេះ សមត្ថកិច្ច​រកឃើញ​វត្ថុតាង​ស្រោមអនាម័យ​មួយចំនួន ទាំង​ប្រើ​រួច​និង​ពុំ​ទាន់​ប្រើ។  ក្នុងនោះ សមត្ថកិច្ច​រកឃើញ​នារី​បម្រើ​ផ្លូវភេទ​៣​នាក់ បញ្ចូនទៅ​មន្ទីរ​សង្គមកិច្ច​រាជធានី​ភ្នំពេញ ដើម្បី​ធ្វើ​ការអប់រំ ៕