ក្រោយត្រូវបានតុលាការសម្រេចឃុំខ្លួនបណ្ដោះអាសន្នរង់ចាំការស៊ើបអង្កេតបន្ថែម នៅពន្ធនាគារព្រៃស មានប្រភពក្រៅផ្លូវការមួយ បានទម្លាយថា ចែមុំ កំពុងស្ថិតក្នុងបន្ទប់ពិសេសមួយ ក្នុងនាមជាជនជាប់ឃុំកាលីបលើ។
ព័ត៌មាននេះ ត្រូវបានមនុស្សមួយក្រុមមានគ្នាចំនួន ៤ នាក់ ដែលមិនដឹងថា មានទំនាក់ទំនងបែបណាជាមួយចែមុំ ឬគ្រាន់តែមហាជនអ្នកតាមដាន ករណីចែមុំ ដោយសារថា ជាករណីបង្ក្រាបលើកដំបូងក្នុងបទជួញដូរភេទក្នុងសង្គមសិល្បៈនោះ បានលើកឡើង នៅក្នុងហាងផឹកស៊ីមួយកន្លែង។
បុរសម្នាក់ ក្នុងចំណោម ៤នាក់ ដែលមានវ័យប្រមាណសាមស្ដើង បានលើកឡើងថា រូបគេទើបបានផឹកស៊ីជាមួយមិត្តភ័ក្ដិ ម្នាក់ដែលធ្វើការនៅពន្ធនាគារព្រៃស ហើយត្រូវមិត្តភ័ក្ដិគេនោះ ប្រាប់ថា ចែមុំមីកាហ្សា ពេលនេះ កំពុងស្ថិតក្នុងបន្ទប់ដែលរៀបចំយ៉ាងពិសេសមួយ ដែលមានទាំងម៉ាស៊ីនត្រជាក់ និងបរិក្ខារល្អៗមួយចំនួនទៀតឯណោះ។ ព្រមជាមួយគ្នានោះ គ្នីគ្នាម្នាក់ បន្តពីក្រោយថា “ជារឿងធម្មតាទៅហើយ ស្រុកខ្មែរ មិនមែនជារឿងថ្មីទេ ឲ្យតែអ្នកមានលុយ និងមានមុខមាត់ សុទ្ធតែឃុំក្នុងបន្ទប់អីចឹងទាំងអស់ហ្នឹង…!”។ គី្នគ្នាម្នាក់ទៀត លើកឡើងបន្តថា “គ្មានទៅជាប់អីបានយូរទេ អាអ្ហើយ…!”។
ក្រុមអ្នកផឹកស៊ីមួយក្រុមដែលមានគ្នា៤នាក់នេះ ជំនុំគ្នាបន្តថា “អញឆ្ងល់ដែរអ្ហា…ឃុំខ្លួន… តែដូចអត់ទាន់លឺថា កាត់ឲ្យជាប់ប៉ុន្មានឆ្នាំៗអ្ហា…”។ ម្នាក់ក្នុងចំណោម ៤នាក់ ដែលទំនងដឹងរឿងស៊ីជម្រៅ បានតបថា “ឆ្ងល់អី…គេកំពុងតែស៊ើបអង្កេតបន្ថែម ព្រោះមេធាវីចែមុំហ្នឹង កំពុងតែប្ដឹងតវ៉ាការពារកូនក្ដីគាត់ អីចឹងហើយ ទើបកាត់ទោសអត់ទាន់កើត គឺគ្រាន់តែឃុំខ្លួនបណ្ដោះអាសន្នសិនទៅ…”។
តាមពិតទៅ អ្វីដែលក្រុមអ្នកផឹកស៊ីមួយក្រុមខាងលើនេះ លើកឡើង មិនមែនជារឿងថ្មីទេ ព្រោះថា ជាយូរមកហើយល្បីថា អ្នកមានលុយ មានមុខមាត់ ជាដើម បើទោះជាឈ្មោះថា ជាប់ឃុំក៏ពិតមែន ប៉ុន្តែស្ថានភាពពិតប្រាកដ គឺមិនដូចជាអ្នកទោសទូទៅនោះទេ គឺមានជីវិតរស់នៅយ៉ាងហ៊ឺហា លុយចាយពេញៗដៃ មានអ្នកបម្រើឆ្វេងស្ដាំ និងកន្លែងស្នាក់ទៀតសោត ក៏ទំនើបណាស់ដែរ។
ទោះយ៉ាងណា ព័ត៌មានមិនផ្លូវការដែលបន្លឺចេញពីក្រុមអ្នកផឹកស៊ីថា ចែមុំស្នាក់ក្នុងបន្ទប់ពិសេស នេះ ក៏ដូចជាការពាក្យចចាមអារ៉ាម ដូចគ្នានេះកន្លងមក ត្រូវបានប្រភពពីពន្ធនាគារព្រៃស ជាទីឃុំខ្លួនបណ្ដោះអាសន្ន អ្នកស្រី ចាន់ ស្រីណុច ហៅ ចែមុំមីកាហ្សា នោះ បានបដិសេធ។
លោក ខ្លូត ដារ៉ា ប្រធាន ម២ នៃពន្ធនាគារព្រៃស ដែលគ្រប់គ្រងលើអ្នកទោសជាស្ត្រីភេទនោះ បានប្រាប់ថា អ្នកទោស ដែលឃុំខ្លួននៅកន្លែងរបស់លោក គឺមានសភាពដូចគ្នា មិនមានការបែងចែកខ្ពស់ទាបដូចការលេចឮឡើយ។លោក ដារ៉ា បន្តថា ” កន្លែងរបស់ខ្ញុំ គឺអត់មានបែងចែងឋានៈអ្នកទោសទេ គឺអ្នកដែលត្រូវឃុំខ្លួនទាំងអស់ គឺនៅក្នុងបន្ទប់ដូចៗគ្នា សូម្បីតែកង្ហារក៏អត់មានដែរបាទ…”។ វិលមកករណី ចែមុំ លោក ដារ៉ា ប្រាប់ដែរថា អត់មានដូចការលើកឡើង នោះទេ គឺអ្នកជាប់ឃុំទាំងអស់ មានសភាពដូចៗគ្នា។
ក្នុងដំណាក់កាលដូចទឹកស្ងប់រលក ដោយសារជារឿងដ៏ថ្មីស្រឡាងដែលត្រូវបង្ក្រាបក្នុងសង្គមសិល្បៈ រឿងរបស់ ចែមុំមីកាហ្សា ត្រូវបានមហាជន កំពុងតែតាមដានអំពីការវិវត្តថ្មីៗ ពិសេសពាក់ព័ន្ធនឹងដំណើរការក្នុងតុលាការ ក្នុងខណៈពេលនេះ ចែមុំ គ្រាន់តែឃុំខ្លួនបណ្ដោះអាសន្ននៅឡើយ តែមិនទាន់កាត់ក្ដីដូច្នេះ។
ទោះយ៉ាងណា មន្ត្រីសាលាដំបូងរាជធានី ប្រាប់ថា តុលាការដំណើរការតាមនីតិវិធីរបស់ខ្លួន ដែលមានជាដំណាក់ៗ។អ្នកស្រី សែម សក្តិកូឡា ចៅក្រមស៊ើបសួរ និងចោទប្រកាន់ ក្នុងករណីចែមុំ បានប្រាប់ថា អ្នកស្រីមិនអាចប្រាប់ពីពេលវេលាត្រូវបើកសវនាការជំនុំជម្រះរឿងក្ដីរបស់ចែមុំ ពេលណាបានទេ ព្រោះនេះ ជាកិច្ចការរបស់ចៅក្រមជំនុំជម្រះជាអ្នកកំណត់ ប៉ុន្តែពេលនេះ គឺអ្វីកំពុងស្ថិតក្នុងដំណាក់កាលស៊ើបសួរនៅឡើយ។
មហាជនកំពុងតែទន្ទឹងមើល ថាតើការបង្ក្រាបលើកដំបូងលើករណីជួញដូរភេទ ក្នុងសង្គមសិល្បៈខ្មែរ ថាតើនឹងមានស្ថានទម្ងន់ទោសកម្រិតណា ក្រោយអ្នកស្រី ចាន់ ស្រីណុច ហៅ ចែមុំមីកាហ្សា ត្រូវកម្លាំងសមត្ថកិច្ចចាប់ខ្លួនកាលពីល្ងាចថ្ងៃទី១៩ ខែកញ្ញា ឆ្នាំ២០១២ នៅផ្ទះសំណាក់ស្រែលាភ ស្ថិតក្នុងខណ្ឌទួលគោក រាជធានីភ្នំពេញ ពាក់ព័ន្ធបទសញ្ចារកម្ម ហើយត្រូវតុលាការសាកសួរជំហានដំបូង និងសម្រេចឃុំខ្លួនបណ្តោះអាសន្ននៅព្រៃសរួចមក៕ ប្រភពពី សប្បាយ
អត្ថបទ៖ ទារិកា