ព្រះចៅអធិការវត្តអរញ្ញសាគរទិញដី១២ឡូតិ៍ចែកជូនពលរដ្ឋក្រីក្រ

ព្រះចៅអធិការវត្ត​អារញ្ញសាគរ ព្រះនាម វិសារទោ ហ៊ាក់ គឹមហ៊ត់ បាន​ចំណាយ​បច្ច័យរបស់វត្ត ទិញដី១២ឡូតិ៍ចែកជូន​ប្រជាពលរដ្ឋក្រីក្រ​ចំនួន​១២គ្រួសារ ដែលរស់នៅលើដីវត្ត​តាំង​ឆ្នាំ១៩៧៩ ស្ថិតក្នុងភូមិអារញ្ញ សង្កាត់សៀមរាប ក្រុងសៀមរាប។

ព្រះចៅអធិការវត្ត​អារញ្ញសាគរបានមានសង្ឃដីកាប្រាប់កម្ពុជាសុវណ្ណភូមិនៅ​រសៀលថ្ងៃទី៣០ ខែសីហា ឆ្នាំ២០១៩នេះថា ប្រជាពលរដ្ឋក្រីក្រ១២គ្រួសារ​នេះ បាន​រស់​នៅ​លើដីវត្តអារញ្ញសាគរ​តាំង​តែ​ពីឆ្នាំ១៩៧៩មក​ម្លេះ ហើយ​កាល​ពី​ឆ្នាំ​២០០៦ ព្រះចៅអធិការ​មុន លោក​បាន​អោយ​ប្រជា​ពល​រដ្ឋ​ទាំង​អស់​នេះ​ធ្វើ​កិច្ច​សន្យាថា បើ​វត្ត​ត្រូវ​ការ​ដី​ថ្ងៃណា​ពួកគាត់​នឹង​រុះ​រើ​ចេញ​ពី​ដី​នេះ​​ដោយ​គ្មាន​ការ​តវ៉ា ហើយ​ពួកគាត់​បាន​ផ្តិត​មេដៃ​យល់ព្រម។ ព្រះចៅអធិការ​ព្រះអង្គ​បាន​មាន​សង្ឃដីកាបន្តថា កាលពីថ្ងៃទី២៨ ខែសីហា ឆ្នាំ២០១៩នេះ ព្រះអង្គបាន​កោះហៅ​ពលរដ្ឋ​ទាំង​១២គ្រួសារ ដែល​មាន​ការ​ចូលរួម​ពី​អាជ្ញាធរ​ដែន​ដី ព្រះសង្ឃ គណកម្មការ​អាចារ្យវត្ត សុំ​អោយ​ពលរដ្ឋ​ចាក់​ចេញ​ពី​ដី​វត្ត។ តែ​ដោយ​ព្រះចៅអធីការ​មានហឬទ័យ​សណ្តោស​ប្រោស​ប្រណី យល់ឃើញ​ថា បើ​អោយ​ពួក​គាត់​ចាកចេញទៅ មិន​ដឹងទៅរស់នៅឯណា បើក្ររកតែបាយហូបស្ទើតែមិន​បានផង ដូច្នេះ​ព្រះអង្គសម្រេចព្រះទ័យទិញដីនៅក្រោយវត្តអស់រាប់សិបម៉ឺនដុល្លារ យកមកពុះឡូត៍ចែកពួកគាត់​ក្នុងមួយ​គ្រួសារទទួល​បាន​ដីដែលមាន​ទំហុំទទឹង​ប្រវែង ៧ម៉ែត្រ និង​បណ្តោយប្រវែង ១២ម៉ែត្រ។

ប្រជាពលរដ្ឋទាំង១២គ្រួសារបានប្រាប់កាសែតកម្ពុជាសុវណ្ណភូមិនៅថ្ងៃដដែលនេះថា ពួកគាត់មានការ​ត្រេកអរយ៉ាងពន់ពេលរក​អ្វីប្រៀប​ផ្ទឹមពុំបានទេ ហើយ​ពួកគាត់បានលើកដៃបួងសួងដល់វត្ថុសាសិទ្ធដែលលោក​មាន​រិទ្ធិមានបារមី សុំអោយជួយថែរក្សាព្រះចៅអធិការ ព្រះសង្គគ្រប់អង្គ និង​គណកម្មការអាចារ្យវត្ត​អារញ្ញសាគរ អោយមានសេចក្តីសុខ និង​មាន​ព្រះជនជាងរយ​ព្រះវស្សា។

សូបបញ្ចាក់បន្ថែមថា កិច្ចសន្យារុះរើនេះ និង​ទទួលដីថ្មីនេះ មានរយះពេល​១២ខែ គិតចាប់ពីថ្ងៃទី២៨ ខែសីហា ឆ្នាំ២០១៩ រហូតដល់ថ្ងៃទី២៨ ខែសីហា ឆ្នាំ២០២០។ ព្រះចៅអធិការ ព្រះអង្គសន្យាថា នឹង​ចាក់​ដីអោយ​ពលរដ្ឋ ហើយ​ធ្វើ​ផ្លូវ​អោយថែមទៀតផង ដោយដីពលរដ្ឋ១២គ្រួសារ នេះ​ខាងមុខទល់ផ្លូវគ្រួសក្រហមគ្រោយវត្ត៕ ដោយះ ផ្លុង រ៉េត