​ពេជ្រសូលីកា ​​និង មូលសុវណ្ណគិរី សង្ស័យកំពុងបង្កាត់ ភ្លើងស្នេហ៍ក្លែងក្លាយ

ពេជ្រ សូលីកា បានបាត់មុខពីពិភពសិល្បៈអស់រយៈពេលជាច្រើនខែមកហើយ បន្ទាប់ពីនាងបានចាក​ចេញពី​ផលិតកម្ម​អឹម និងបន្ទាប់ពីបែកធ្លាយរឿងអាស្រូវស្នេហាជា មួយមន្រ្តីប៉េអឹម មានពាក់ផ្កាយលើស្មា ដ៏មានឥទ្ធិពលម្នាក់ ។

​ទោះបីជាអតីត​តារាចម្រៀងល្បីឈ្មោះ ក្រមិចក្រមើម ពេជ្រ សូលីកា បានប្រកាសក្តែងៗថា ខ្លួនបានដើរចេញពី​ពិភពសិល្បៈក្តី ក៏ខ្សែជីវិតរបស់​នាងត្រូវបានមហាជន នៅតែតាមដាន និងសង្កេតមើលជាប់ជានិច្ច ពីជីវិតឯកជនរបស់នាង ព្រោះនាងជាតារាចម្រៀងមួយដួង​ស្ថិតក្នុងបេះដូង របស់មហាជន និងស្រ​ទាប់យុវវ័យ ។

ជាពិសេសថ្មីៗនេះ ត្រូវបានប្រភពលួចបង្ហើបថា នាងកំពុងតែ​លែងល្បែង​ស្នេហា ក្លែងក្លាយជាមួយ លោក មូល សុវណ្ណគិរី ដែលអាចជាចេតនាបន្លំភ្នែកមហាជន ក៏ថាបាន ។ កន្លងមក ពេជ្រ សូលីកា តែងតែលេចឮព័ត៌មាន ជាបន្តបន្ទាប់ពីទំនាក់ទំនងស្នេហារបស់នាង ជាមួយបុរសសម្បូរទ្រព្យ មានផ្កាយលើស្មារម្នាក់និងជាមួយបុរសអាណិក ជនម្នាក់ផងដែរ ។

តែមួយរយៈចុងក្រោយនេះ មហាជនហាក់ មិនសូវបានឃើញបណ្តាញសារ​ព័ត៌មានចុះផ្សាយ ពីរឿងរ៉ាវស្នេហាលាក់កំបាំងរបស់នាង​ទេ ។ មិនតែប៉ុណ្ណោះ ក៏មានអ្នកសារព័ត៌មានក្នុងស្រុកមួយចំនួន មានការងឿងឆ្ងល់យ៉ាងខ្លាំង ចំពោះ កញ្ញា ពេជ្រ សូលីកា ថា នាងតែងតែគេចវេសពីការស្នើ​សុំផ្តល់បទសម្ភាសន៍ និងគេចវេសពីកាណុងកាមេរ៉ារបស់អ្នកកាសែតជានិច្ច ។

ការគេចវេសមិនឲ្យអ្នកកា​សែត បានផ្តិតយករូបភាព និងផ្តល់បទសម្ភាសន៍របស់នាងបែបនេះ បានធ្វើឲ្យគេយល់ឃើញថា ​ប្រហែលជាមានរឿងអាស្រូវច្រើន​មិនអាចប្រ​ឈមមុខ នឹងការសួរដេញដោល ពីអ្នកកាសែតបាន ។

​​ខណៈបាត់មុខពីវិថីសិល្បៈអស់មួយរយៈ ស្រាប់តែថ្មីៗនេះ កញ្ញា ពេជ្រ សូលីកា ត្រូវបានអ្នកនៅក្នុងចង្កោមសិល្បៈ​សុំមិនបញ្ចេញ​ឈ្មោះ ទម្លាយឲ្យដឹងថា អតីតតារាចម្រៀង ប្រចាំផលិតកម្ម អឹម កញ្ញា ពេជ្រ សូលីកា កំពុងតែមានទំនាក់ទំនងស្នេហាស្ងាត់ៗ ​ជាមួយតារាសម្តែងរូបសង្ហា លោក មូល សុវណ្ណគិរី ។ លើសពីនេះទៅទៀត ប្រភពដដែល​បានឲ្យដឹងថា គេតែងតែឃើញ ពេជ្រ សូលីកា និងលោក មូល សុវណ្ណគិរី ទៅដើរលេងចូលក្លឹបកម្សាន្ត នឹងទៅញ៉ាំអីជាមួយគ្នា​ជាញឹកញាប់ទៀតផង ។ ​​

គេក៏បានឃើញថាយ៉ាងច្បាស់ថា នៅក្នុង Page ហ្វេសប៊ុក​របស់ ពេជ្រ សូលីកា បានបង្ហោះរូបភាពរបស់នាង ថតជាមួយ លោក មូល សុវណ្ណគិរី ដែលបង្ហាញពីភាព ស្និទ្ធស្នាលជាមួយគ្នា ដើម្បីឲ្យមហាជនបានឃើញ។

ម្យ៉ាងវិញទៀតការបង្ហាញរូបភាព​កៀក​កើយ​​ជាមួយប្រុសក្មេង មូល សុវណ្ណគិរី នៅគ្រានេះ ក៏ស្របពេលជាមួយនឹងការប្រកាសលាឈប់ពីសង្វៀនសិល្បៈរបស់ ពេជ្រ សូលីកា ផងដែរ។

ចំពោះមូលហេតុចំបងមួយដែលបណ្ដាលឲ្យស្រីស្រស់គួរឲ្យក្នក់ក្នាញ់ សម្បូរប្រុសចោម ពេជ្រ សូលីកា សម្រេចចិត្តយ៉ាងតក់ក្រហល់ ដើរចេញពីការងារសិល្បៈនេះ គឺអាចមកពីនាងត្រូវបានហ៊ុំព័ទ្ធដោយរឿងអា​ស្រូវ​ស្នេហាចាក់ស្រែះ ដោះស្រាយមិនចេះចប់ខណៈដែលបណ្ដាញសារព័ត៌មានចេះតែបើកកកាយយកមកចុះផ្សាយ ជាបន្តបន្ទាប់។

មជ្ឈដ្ឋានអ្នកចូលចិត្តតាមដាន សកម្មភាពតារាខ្មែរ បានធ្វើការកត់សម្គាល់ និងវាយតម្លៃថា ដំណើរងាកទៅភាពស្និទ្ធស្នាល ជាមួយលោក មូល សុវណ្ណគិរី ពីសំណាក់ស្រីស្រស់ ពេជ្រ សូលីកា គឺអាចគ្រាន់តែជាឆាកល្ខោនឆ្ពិនភ្នែកមហាជន ដែលនាងធ្លាប់​ប្រើយុទ្ធសាស្រ្តបែបនេះជាច្រើនដងមកហើយ ដើម្បីបំភ័ន្តអាថ៌កំបាំងស្នេហារបស់នាង មិនឲ្យអ្នកដឹងពីស្នេហាពិត​​ ដែលកំពុងកើត​ឡើងសព្វថ្ងៃទៀតផង៕