គេសង្ស័យថា មេឃុំបៀមដៃម្នាក់កំពុងតែប្រើអំណាចជិះជាន់ប្រជាពលរដ្ឋខ្លួនឯង?

ពលរដ្ឋមួយគ្រួសារនៅភូមិត្រពាំងស្វាយ ឃុំរើល ស្រុកពួក ខេត្តសៀមរាប​ កាលពីវេលា​ម៉ោង​១២ និង១៤នាទី ថ្ងៃទីអាទិត្យទី០៥ ខែឧសភា ឆ្នាំ២០២៤ បានប្រាប់អង្គភាពសារព័ត៌មានយើងថា មានអាជ្ញាធរសមត្ថកិច្ច០៥នាក់បានចុះមកហាមឃាត់ដាច់ខាតមិនអោយគ្រួសារគាត់ ធ្វើរបង​ក្រោយផ្ទះ ហើយថែមទាំង​គម្រាមថា បើនៅតែធ្វើបន្តទៀតអាជ្ញាធរនឹងចាប់យកសំភារៈជាងទាំងអស់ ហើយប្រើគ្រឿងចក្រវាយរបងចោល។

អង្គុយនៅក្រោមផ្ទះដ៏តូចចង្អៀតមួយ មានលោកយាយលោកតា ក្មេងចាស់ប្រុស​ស្រីប្រហែលជាង​១០នាក់ និងម្នាក់ទៀតឈ្មោះ ម៉ាន យ៉ា ភេទស្រី អាយុ ៣៨ឆ្នាំ ដែលជាម្ចាស់ផ្ទះបាន​ប្រាប់អ្នកសារព័ត៌មានយើងថា ដីដែលគាត់រស់នៅនេះ គឺតពីជីដូចជីតាច្រើនតំណមកហើយ។ កាលពី២ឆ្នាំមុនខាងសាលាស្រុកពួក និងកងរាជអាវុហត្ថស្រុក បានចុះមកបោះបង្គោលឡាក់កំណត់ដីមាត់ត្រពាំងក្រោយផ្ទះគាត់ ហើយក៏បានពន្យល់ប្រាប់គាត់ថា មិនអាច​ធ្វើ​របង​រំលោភ​បំពានចូលដីត្រពាំងបានទេ។ ម៉ាន យ៉ា បានបន្តទៀតថា ឥឡូវនេះគាត់បានធ្វើរបងឥដ្ឋបិតកុំអោយភ្លៀងហូរដាច់ដីផ្ទះគាត់ចូលទៅក្នុងស្រះទឹ ឬ(ត្រពាំងស្វាយ) តែមិនបានរំលោភ​ចូលដីត្រពាំងទេ ថែមទាំងដកថយពីដីព្រំត្រពាំងមួយម៉ែត្រទៀតផង​ ចុះហេតុអីបានជាអាជ្ញាធរមក​រករឿងហាមឃាត់កាត់បែបនេះទៅវិញ? ម៉ាន យ៉ា បានបន្តទៀតថា អាជ្ញាធរដែលចុះមក​នោះ​មាន ខាងភូមិម្នាក់ ខាងប៉ូសីសប៉ុស្តិ៍បីនាក់ និងខាងឃុំម្នាក់។ ម៉ាន យ៉ាថា ព្រឹកថ្ងៃដដែលនោះ ខាងប៉ុស្តិ៍រើល បានហៅជាងសំណង់បីនាក់ទៅប៉ុស្តិ៍ ហើយប្រាប់ថា កុំមកធ្វើរបងផ្ទះអោយ​គាត់ទៀត បន្ទាប់​មកក៏អោយក្រុមជាងទាំងនោះត្រឡប់មកវិញ។ ម៉ាន យ៉ា បន្ថែមទៀតថា របងផ្ទះអ្នកផ្សេងនៅជាប់មាត់ត្រពាំងដូចគ្នាគេធ្វើបានដោយ​រលូនមិនមានអាជ្ញាធរណាគេចុះមកហាមឃាត់ទេ ហើយពេលគាត់សួរទៅអាជ្ញាធរដែលចុះទៅហាមគាត់នោះថា ហេតុអ្វីគេធ្វើបាន ឯគាត់ធ្វើមិនបាន អាជ្ញាធរឆ្លើយថា កាលគេធ្វើពួកគាត់អត់បានដឹង អត់បានឃើញ​ បានជា​មិនបានចុះហាមឃាត់។

អង្គភាពសារព័ត៌មានយើងមិនអាចសុំការពន្យល់ពីលោក ភួង មករា មេឃុំរើលបានទេ ព្រោះ​នៅរសៀលថ្ងៃទី០៧ ខែឧសភា ឆ្នាំ២០២៤នេះ ទូរសព្ទចូល លោកមេឃុំប្រាប់ថា គាត់មិននិយាយតាមទូរសព្ទទេ បើចង់ដឹងរឿងសុំអោយអ្នកសារព័ត៌មាន​ទៅជួបគាត់នៅឯសាលាឃុំទៅ បន្ទាប់មក​លោកមេឃុំបិតទូរសព្ទ​បាត់ស្ងាត់ឈឹង។

ម៉ាន យ៉ា និង ក្រុមគ្រួសារ បានលើកម្រាមដៃ១០ស្នើសុំទៅលោក ស៊ីន ចាន់ថុល អភិបាលស្រុកពួក និងអាជ្ញាធរមាន​សមត្ថកិច្ចគ្រប់ជាន់ថ្នាក់មេត្តាជួយគាត់អោយបានធ្វើរបងខាងក្រោយ​ផ្ទះ​នេះផង ព្រោះថា ពេលរដូវភ្លៀងម្តងៗ ដីដាច់តាំងតែពីមាត់ផ្នល់មុខផ្ទះ​រហូតដល់ក្រោមផ្ទះហូរចូលទៅ​ក្នុងស្រះទឹកស្ទើតែរលំផ្ទះម្តងៗទៅហើយ។

នៅក្នុងសាច់រឿងនេះ អ្នកវិភាគតាមតុកាហ្វេបានវិភាគថា ប្រហែលជា ម៉ាន យ៉ា ម្ចាស់ផ្ទះនេះពេលធ្វើរបងមិនបានសែនអោយ​អាអ្នកតាម្ចាស់ស្រុក ទើបបានជាវាកាច់ដូច្នេះ។ សំណួរចោទសួរថា ចុះហេតុអ្វីបានជារបងផ្ទះអ្នកផ្សេងនៅជាប់គ្នាគេធ្វើបានដោយរលួនគ្មានឃើញអាជ្ញាធរ​ណាចេញមុខមកហាមឃាត់ ចុះវា​អភ័ព្វអ្វីតែ ម៉ាន យ៉ា ធ្វើរបងមិនបាន?

ពលរដ្ឋនៅក្នុងភូមិត្រពាំងស្វាយខាងលើ ខ្សឹបខ្សៀវគ្នាថា ចាំមើលលោក ស៊ីន ចាន់ថុល អភិ​បាល​ស្រុកពួកដោះស្រាយជូនពលរដ្ឋយ៉ាងណាចំពោះរឿងនេះ។ ពលរដ្ឋសង្ឃឹមថា លោកអភិបាល​ស្រុកមិនដើរតាមគន្លងលោកមេឃុំរើលនេះទៅចុះ ព្រោះមេឃុំនេះជូនខ្វះ ជូនថ្លង់ ជូនគ ជូនជា ជូនមើលឃើញ ជូនមើលមិនឃើញ៕ ដោយ៖ ផ្លុង រ៉េត