ករណីអតីតអភិបាលក្រុងបាវិតលោកឈូកបណ្ឌិតបាញ់រះលើកម្មការិនីរោងចក្រនៅក្រុងបាវិត បណ្តាលឲ្យទទួលរងរបួសយ៉ាងធ្ងន់ធ្ងរកាលពីថ្ងៃទី២០កុម្ភៈ២០១២នោះ ដែលតុលាការបានបើកសវនាការជាបន្តបន្ទាប់តាំងពីថ្នាក់ក្រោមរហូតមកដល់ថ្នាក់លើហើយបានបង្វែរមកក្រោមវិញនោះឥឡូវហាក់បីដូចជាមានការវិវឌ្ឃន៍ប្រែប្រួលយ៉ាងខ្លាំងស្ទើររកស្មានមិនត្រូវទាល់តែសោះខណៈដែលគេដឹងថាលោកឈូកបណ្ឌិត ដែលជាតួអង្គក្នុងរឿងក្តីដ៏រសើបមួយនេះសុខៗស្រាប់តែប្រែក្លាយទៅជាសាក្សីទៅវិញ គ្រាដែលមានសាក្សីជាច្រើនបានបង្ហាញថាលោកឈូក បណ្ឌិត គឺជាជនដៃដល់តែម្នាក់គត់ដែលបានបាញ់កម្មការិនីឲ្យរងរបួសនោះ។
គួរបញ្ជាក់ថានៅក្នុងសំណុំរឿងដ៏ក្តៅគគុកនេះត្រូវបានលើកយកមកបើកសវនាការនៅសាលាដំបូងខេត្តស្វាយរៀងសារជាថ្មីទៀតដែលមានរយៈពេលបីថ្ងៃចាប់ពីថ្ងៃទី១២រហូតដល់ថ្ងៃទី១៤ ខែមិថុនាឆ្នាំ២០១៣។ប៉ុន្តែទោះបីសវនាការនេះមានរយៈពេលបីថ្ងៃក៏ពិតមែនតែគេមិនបានឃើញវត្តមានរបស់លោកឈូក បណ្ឌិត ដែលជាជនជាប់ចោទឡើយ គេ បែរជាឃើញមុខជនជាប់សង្ស័យម្នាក់ថ្មីទៀតដែលជាមន្ត្រីប៉ូលិសក្រុងបាវិតឈ្មោះស ចាន់ថា គួរឲ្យចម្លែកជាទីបំផុត។
នៅក្នុងសវនាដែលគួរឲ្យចង់តាមដានដោយយកចិត្តទុកដាក់នោះគេឃើញមានសាក្សីព្រោងព្រាតមកពីស្ថាប័នប៉ូលិសនិងកងរាជអាវុធហត្ថប្រមាណជិត២០ នាក់មកឆ្លើយបំភ្លឺផ្សេងៗពីគ្នាក្នុងនោះគេបាន មានសាក្សីចំនួនពីរនាក់បានឆ្លើយដាក់បន្ទុកទៅលោកសចាន់ថា អាចជាប់ពាក់ព័ន្ធទៅនឹងការបាញ់លើកម្មការិនី។ចំណែកសាក្សី១១នាក់បានឆ្លើយដាក់បន្ទុកលើលោកឈូកបណ្ឌិតរីឯសាក្សីដទៃទៀតបានឆ្លើយថាមិនដឹងហេតុការណ៍នោះច្បាស់លាស់។
ប៉ុន្តែទោះបីយ៉ាងណានៅក្នុងសវនាការ ភាគីជនរងគ្រោះ នៅតែបន្តទាមទារឲ្យប្រធានចៅក្រមជំនុំជម្រះក្តី ផ្តន្ទាទោសលោកឈូក បណ្ឌិត និងទាមទារជំងឺចិត្ត ចំនួន ៤ម៉ឺនដុល្លារ។
អ្វីដែលកាន់តែចម្លែកជាងនេះទៀតនោះត្រង់ថាសំណុំរឿងបាញ់កម្មករ នេះស្រាប់តែតុលាការបានចោទធ្វើការចោទប្រកាន់ទៅលើជនសង្ស័យម្នាក់ផ្សេងទៀត គឺជានាយផ្នែកព្រហ្មទណ្ឌក្រុងបាវិត លោក ស ចាន់ថា ផ្ទុយពីពេលមុនដែលលោករដ្ឋមន្ត្រីក្រសួងមហាផ្ទៃ អះអាងថា មានតែ លោក ឈូក បណ្ឌិត ម្នាក់ប៉ុណ្ណោះដែលជាជនសង្ស័យក្នុងរឿងនេះ។ ទាក់ទិនករណីនេះ ប្រធានកម្មវិធីសិទ្ធិការងារនៅមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា ដែលតាមដានយ៉ាងយកចិត្តទុកដាក់លើសវនាការនេះ បានកត់សម្គាល់ថា ការសួរដេញដោលឡើងវិញនេះ មានលក្ខណៈបើកទូលាយឲ្យមេធាវីការពារក្តីជនរងគ្រោះមានឱកាសច្រើនក្នុងការសួរដេញដោលសក្សី។ ប៉ុន្តែលោកថាចៅក្រម និងព្រះរាជអាជ្ញាហាក់ព្យាយាមទាញយកចម្លើយពីសាក្សីដើម្បីដាក់បន្ទុកតែលើជនជាប់ចោទថ្មីគឺ លោក ស ចាន់ថា ទៅវិញ។
ទោះបីបែបណាអ្នកស្រីកែវ នាដែលជាជនរងគ្រោះមួយរូបបាននិយាយថា ចម្លើយរបស់សាក្សីបានធ្វើឲ្យអ្នកស្រីស្ងប់ចិត្ត និងមានជំនឿថា តុលាការនឹងអាចរកយុត្តិធម៌ជូនពួកគេបាន។ អ្នកស្រីបញ្ជាក់ ថាដូចថាខ្ញុំមានអារម្មណ៍ត្រេកអរខ្លាំង ព្រោះបានឃើញពួកគាត់និយាយអញ្ចឹងមក គឺខ្ញុំមានអារម្មណ៍ថា ខ្ញុំធូរ។
ចំណែកសាលក្រមក្នុងសំណុំរឿងនេះត្រូវបានគេដឹងថានឹងលើកយកទៅប្រកាសនៅថ្ងៃទី២៥ មិថុនា ខាងមុខនេះ។
គួររំឮកឡើងវិញថាព្រឹត្តិការណ៍បាញ់កម្មការិនីយ៉ាងសាហាវព្រៃផ្សៃនោះ បានកើតឡើងកាលពីថ្ងៃទី២០ ខែកុម្ភៈ ឆ្នាំ២០១២ នៅតំបន់សេដ្ឋកិច្ចពិសេសក្រុងបាវិត ជាប់ព្រំដែនវៀតណាម ដែលបណ្តាលឲ្យកម្មការីនី៣នាក់រងរបួស មានឈ្មោះ កែវ នា ប៊ុន ចិន្តា និងនុត សាខន ។
មជ្ឈដ្ឋានប្រជាពលរដ្ឋទន្ទឹងចាំមើលថាតើលោកឈូក បណ្ឌិត អតីតអភិបាលក្រុងបាវិតដែលជាជនជាប់សង្ស័យក្នុងសំណុំរឿងបាញ់កម្មការិនីបីនាក់ឲ្យរងរបួសយ៉ាងធ្ងន់ធ្ងរនោះអាចគេចផុតពីសំណាញ់ច្បាប់ដែរឬយ៉ាងណាខណៈដែលមានសាក្សីជាច្រើនបានអះអាងថាអតីតអភិបាលក្រុងបាវិតរូបនេះជាអ្នកប្រព្រឹត្តដោយផ្ទាល់នោះ ។ជាពិសេសឯកឧត្តមឧបនាយករដ្ឋមន្ត្រីសខេងរដ្ឋមន្ត្រីក្រសួងមហាផ្ទៃក៏ធ្លាប់បានបញ្ជាក់កាលពីពេលកន្លងមកថាលោកឈូក បណ្ឌិត គឺជាជនសង្ស័យតែម្នាក់គត់ដែលបានបាញ់កម្មការិនីឲ្យរងរបួសនោះ៕
.jpg)
.jpg)
.jpg)
.png)
.jpg)
.jpg)
