ភ្នាក់ងារទូរទស្សន៍២ស្ថាប័នគឺលោក ផូ ប៊ុនថន ភ្នាក់ងារហង្សមាស និងលោក កែ វុទ្ធី ភ្នាក់ងារ ទូរទស្សន៍ប៉ុស្តិ៍លេខ៥ ត្រូវបានជនស៊ីវិលម្នាក់ចេញពីប៉ុស្តិនគរបាលការពារព្រំដែនចំបក់នៃវរះ៨១៥ដេញកាប់ប្លន់យកកាម៉េរ៉ាបោកចោល និងយកកាំបិតដេញ កាប់ប៉ងសម្លាប់ផ្តាច់ជីវិត គ្រាដែលអ្នកសារពត៌មានរងគ្រោះ២នាក់ខាងលើចុះយកពត៌មានតាមព្រំដែន កាលពីវេលាម៉ោង៥និងល្ងាចថ្ងៃទី៣០ ខែវិច្ឆិការ ឆ្នាំ២០១៥ នៅចំនុចប៉ុស្តិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
ក្រោយពីទទួលបានពត៌មានថា នៅប៉ុស្តិនគរបាលការពារព្រំដែនប៉ុស្តិចំបក់ បានលួចបើកច្រក របៀងឲ្យពលករឆ្លងដែនខុសច្បាប់ និងមានឈ្មួញនាំចូលនាំចេញទំនិញគេចពន្ធ អ្នកកាសែត៤ស្ថាប័ន បានចុះយកពត៌មានគឺ ទូរទស្សន៍ហង្សមាស ប៉ុស្តិលេខ៥ អាស៊ីអាគ្នេយ៍ និង CTN បានចុះទៅចកពត៌ មាននៅចមនុចព្រំដែនខាងលើ ពេលទៅដល់បានបែកចែកចុះធ្វើការនៅគោលដៅផ្សេងៗចម្ងាយពីគ្នា ៥០០ម៉ែត្រ ដោយភ្នាក់ងារទូរទស្សន៍ហង្សមាសនិងប៉ុស្តិលេខ៥ទៅគោលដៅផ្សេង មិនទាន់ទាំងដល់ ចំនុចច្រករបៀងស្រួលបួលផងស្រាប់តែឃើញមានមន្ត្រីនគរបាលក្នុងប៉ុស្តិខាងលើម្នាក់បានដឹកជនស៊ីវិលម្នាក់ឈ្មោះ ធិន ម៉ាណាន ហៅប្រុស ភេទប្រុស អាយុ៣៨ឆ្នាំ មកទម្លាក់ ភ្លាមនោះជនស៊ីវិលរូបនេះបានទាញកាំបិតខ្វែវប្រវែងជាង១ម៉ែត្រមកភ្ជង់ភ្នាក់ងារហង្ស មាសយកកាំមេរ៉ាបោកចោល ហើយបានដេញកាប់ទាំងភ្នាក់ងាប៉ុស្តិលេខ៥ ធ្វើឲ្យអ្នកកាសែតទាំង២ ភ័យក៏នាំគ្នារត់ចោលស្បែកជើងព្រលឹងចុងសក់ រីឯជនស៊ីរូបនោះបានទាញកង់ជិះដើម្បីដេញកាប់បន្ត ទើបអ្នកកាសែតនាំគ្នារត់ចុះស្រែដើម្បីរកគ្នាជួយ។ ពេលមកដល់ប៉ុស្តិស្រាប់តែរថយន្តត្រូវបានគេយកវត្ថុ រឹងកោសខូចថ្នាំរថយន្តខ្ទេច ទើបអ្នកកាសែតនាំគ្នាគេចចេញពីចំនុចកើតហេតុរកកន្លែងសុវត្ថិភាព។
លោក ផូ ប៊ុនថន ភ្នាក់ងារទូរទស្សន៍ហង្សមាសបានឲ្យដឹងថា ពួកខ្លួនត្រូវនគរបាលប៉ុស្តិ៍ចំបក់ខាងលើ ម្នាក់ជិះម៉ូតូដឹកជនស៊ីវិលម្នាក់ឲ្យមកកាប់ខ្លួននៅលើចំការមួយកន្លែងក្បែរព្រៃព្រំដែនកម្ពុជាថៃ ប្លន់យកកាំម៉េរ៉ាទៅបោកចោលកម្ទេចរូបភាព និងយកកាំបិតខ្វែប្រវែងជាង១ម៉ែត្រដេញប៉ងសម្លាប់ខ្លួន និងលោកកែវវុទ្ធីភ្នាក់ងារប៉ុស្តិលេខ៥តែដោយសភាពមិនស្រួលក៏នាំគ្នារត់។
លោក កែ វិទ្ធី ភ្នាក់ងាទូរទស្សន៍ប៉ុស្តិលេខ៥ បានចាត់ទុកការថាការដេញកាប់អ្នកកាសែតនេះ គឺជាអំពើរព្រៃផ្សៃហើយក៏ជាការគំរាមកំហែងបំបាក់ស្មារតីពីសំណាក់សមត្ថកិច្ចគោលដៅខាងលើគឺប៉ុស្តិចំបក់ គឺដើម្បីរារាំងដល់ដំណើរការយកពត៌មានរបស់អ្នកកាសែត។ក្នុងនោះលោកក៏បានសំណូមពរដល់ អគ្គស្នងការការនគរបាលជាតិ និងស្ថាប័នតុលាការជួយរកយុត្តិធម៌។
ក្រោយពីអ្នកកាសែតនាំគ្នាចេញពីកន្លែងកើតហេតុ ស្រាប់តែលោកមេប៉ុស្តិ សាន សៃ បានទូរសព្ទ័មករករឿងភ្នាក់ងារហង្សមាសថាមានពលរដ្ឋ(គឺជនស៊ីវិលដែលដេញកាប់អ្នកកាសែត) មកប្តឹងថាអ្នកកាសែតនាំគ្នាមកវាយធ្វើបាបទៅវិញ និង បានផ្ញើរូបភាពឲ្យគេឯងមើល និងមានស្នាមរបួសលើដើមទ្រូងទៀតផង។ទាំងនេះគឹជាការចោទប្រកាន់យ៉ាងធ្ងន់ធ្ងរជនរងគ្រោះជាអ្នកកាសែតកំពុងក្លាយជាជនល្មើសទៅវិញ។
ឆ្លើយតបទៅហ្នឹងការលើកឡើងខាងលើ លោក ឈិត លី មេបញ្ជាការវរះសេនាតូចនគរបាល ការពារព្រំដែនគោកលេខ៨១៥បានឲ្យដឹងថា ជនស៊ីវិលដែលដេញកាប់អ្នកកាសែតមិនមែនជាមន្ត្រី នគរបាលទេ គាត់ជាពលរដ្ឋមានដីចំការខាងក្រោយប៉ុស្តិ។ចំពោះករណីថា មន្ត្រីនគរបាលប៉ុស្តិម្នាក់បាន ដឹកមនុស្សទៅកាប់អ្នកកាសែតគឺមិនពិតទេ គឺមន្ត្រីនគរបាលរបស់លោកគ្រាន់តែជូនពលរដ្ឋឈ្មោះ ប្រុស ទៅផ្ទះតែប៉ុណ្ណោះដោយឃើញស្រវឹងស្រា ចំពោះបញ្ហានេះលោកមិនហ៊ានថានរណាខុសឬត្រូវទេព្រោះ លោកមិនបានឃើញហេតុការណ៍ដែរ។
ពាក់ពន្ធ័ករណីនេះលោក ស៊ុម ចាន់គា មន្ត្រីសម្របសម្រួលសិទ្ធិមនិស្សអាដហុកខេត្តបន្ទាយ មានជ័យ បានចាត់ទុកថា ករណីខាងលើគឺជាការរៀបចំទុកជាមុន ដើម្បីរារាំងអ្នកសារពត៌មានពេលចុះ យកពត៌មានបទល្មើសសេដ្ឋកិច្ចនិងពលករឆ្លងដែនខុសច្បាប់ ព្រោះកន្លងមកច្រកចំបក់នៃវរះ៨១៥នេះគឺតែងតែបើកឲ្យមានបទល្មើសទំនិញគេចពន្ធនិងជារឿយៗ។
លោក សិទ្ធ ឡោះ ស្នងការរងទទួលផែនព្រហ្មទ័ណ្ឌបានឲ្យដឹងថា លោកបានចាត់ឲ្យមន្ត្រីរបស់ខ្លួនចុះស្រាវជ្រាវហើយចំពោះករណីនេះ លទ្ធផលយ៉ាងណាលោកនិងចាត់ការតាមច្បាប់។
បច្ចុប្បន្នក្រុមអ្នកកាសែតរងគ្រោះកំពុងរៀបចំឯកសារ ដើម្បីប្តឹងចូលតុលាការឲ្យជួយរកយុត្តិធម៌ នៅព្រឹកថ្ងៃចន្ទ័នេះ៕