សិល្បៈករ សិល្បៈការនី ផ្នែកតន្រ្តីសម័យ តន្រ្តីបុរាណ និងសិល្បៈផ្នែកគំនូរ នៅក្នុងក្រុងអង្គរ ទាំងអស់បានរួបរួមសហការគ្នាបង្កើតកម្មវិធី តន្រ្តីមិត្តអមតៈ នៅថ្ងៃទី០៩ ខែមេសា ឆ្នាំ២០១៣ ស្ថិតនៅជាងគំនូអង្គរ ផ្លូវកូម៉ៃ ខាងជើងវត្តថ្មី៤រយម៉ែត្រ ក្នុងភូមិត្រពាំងសេះ សង្កាត់គោគចក ក្រុងសៀមរាប ដើម្បីអប់អរបុណ្យចូលឆ្នាំប្រពៃណីជាតិខ្មែរនាថ្ងៃទី១៤-១៦មេសាខាងមុខនេះ ដែលមានការចូលរួមពីលោក រី-អញ្ជលី អនុប្រធានមន្ទីរវប្បធម៌ និងវិចិត្រសិល្បៈខេត្ត។
ថ្លែងក្នុងឱកាសខាងលើនេះ លោករី-អញ្ជលី អនុប្រធានមន្ទីរវប្បធម៌ និងវិចិត្រសិល្បៈបានមានមតិផ្តែរផ្តាំដល់ក្រុមសិល្បៈអោយខិតខំអភិវឌ្ឍន៍ខ្លួន និងខិតខំរក្សាការពារវប្បធម៌ ប្រពៃណីខ្មែរអោយបានគង់វង្ស រីកចំរើនលូតលាស់ទៅថ្ងៃអនាគត់។
សិល្បៈករ សិល្បៈការនីខាងលើបានប្រាប់អោយដឹងនៅព្រឹកថ្ងៃទី០៩នេះថា នេះជាឆ្នាំទី០៣ហើយ ដែលក្រុមតន្រ្តីសម័យ តន្រ្តីបុរាណ និងសិល្បៈផ្នែកគំនូរ បានរៀបចំកម្មវិធី តន្រ្តីអមតៈ នេះឡើងក្នុងគោលបំណងមួយចំនួនដូចជា៖
-ជួបជុំអប់អរមុនបុណ្យចូលឆ្នាំខ្មែរ
-ពង្រឹង និងរឹតបន្តឹងចំណងមិត្តភាពអ្នកសិល្បៈខ្មែរ
-លើកស្ទួយវិស័យសិល្បៈខ្មែរកុំអោយបាត់បង់
-លើកយកល្បែងប្រជាប្រិយខ្មែរមកលេងកំសាន្តសប្បាយ និងជាការរំលឹក
ឡើងវិញនូវស្នាដៃកេរតំណែលបុព្វបុរសជំនាន់ដើម។
ក្រុមសិល្បៈករ សិល្បៈការនីបានបន្តថា ពួកគាត់មិនត្រឹមតែមានគោលបំណងរឹតចំណងមិត្តភាពប៉ុណ្ណោះទេ ថែមទាំងមានបំណងធំមួយនៅថ្ងៃអនាគតគឺ បើកសមាគមន៍ក្នុងការបង្រួបបង្រួមអ្នកសិល្បៈខេត្តសៀមរាបជាធ្លុងមួយទៀត ដើម្បីថែរក្សា ការពារ ប្រពៃណីវប្បធម៌ខ្មែរ ជាពិសេសផ្នែកសិល្បៈរបស់ខ្មែរទាំងសម័យ និងបុរាណតែម្តង។ ពួកគាត់បន្ថែមថា ការចូលរួមក្នុងកម្មវិធីខាងលើនេះ មិនត្រឹមតែខាងផ្នែកសិល្បៈករ សិល្បៈការនីទេ គឺមានការចូលរួមយ៉ាងរីករាយពីសំណាក់ បងប្អូនប្រជាពលរដ្ឋ មន្រី្តរាជការ មគ្គុទេសទេសចរណ៍ អាជីរករ អ្នកដឹកភ្លៀវ ជាងចម្លាក់ ជាងគំនូជាច្រើននាក់ទៀតផងដែរ។
លោក ស៊ីមសុភ័ក្រ្ត ផ្នែកសិល្បៈតន្រ្តីសម័យ អ្នកមានគំនិតផ្ទួចផ្តើមកម្មវិធី បានអោយដឹងថា កាលពីឆ្នាំទី០១ មានអ្នកចូលរួមតែជាង២រយនាក់តែប៉ុណ្ណោះ តែនៅឆ្នាំទី០២កាលពីឆ្នាំតៅមិញ មានអ្នកចូលរួមរហូតដល់ទៅជាង៤រយនាក់។ លោកបន្តថា នៅឆ្នាំទី០៣នេះ លោកសង្ឃឹមយ៉ាងមុតមាំថា នឹងមានមនុស្សមកចូលរួមលើសពីឆ្នាំមុនៗ។ លោក បានបន្ថែមថា ថវិការដែលទ្រទ្រង់កម្មវិធីនេះទាំងមូល គឺបានពីមូលនិធិអ្នកចូលរួមក្នុងកម្មវិធី ហើយពេលបញ្ចប់កម្មវិធីថវិការដែលនៅសល់ពីការចំណាយគឺយកទៅឧបត្ថមដល់កុម៉ាកំព្រាទាំងអស់។
ក្រុមសិល្បៈករ សិល្បៈការនី សូមសំនូមពរដល់ប្អូនៗសិស្សានុសិស្សជំនាន់ក្រោយ មេត្តាជួយគាំទ្រសិល្បៈខ្មែរអោយបានច្រើន ដើម្បីលើកស្ទួយវិស័យសិល្បៈខ្មែរ ដែលប្រកបដោយអត្តសញ្ញាណជាតិដើម្បីការពារព្រលឹងជាតិខ្មែរ ខណៈដែលឥទ្ធិពលសិល្បៈបរទេសកំពុងតែជ្រាបចូលក្នុងសង្គមសិល្បខ្មែរ ក្នុងផ្នត់គំនិតយុវវ័យខ្មែរយ៉ាងផុសផុលនាពេលបច្ចុប្បន្ន ដូចពាក្យស្លោកមួយបានពោលថា ”វប្បធម៌រលុតជាតិរលាយ ឬបុរាណមិនយឺត សម័យមិនបរទេស“។
ប្រជាជនខ្មែរតែងតែនិយាយថា កម្ពុជា ជាព្រះរាជាអច្ឆៈរិយៈ តែទទឹមនឹងនោះតើយើងជាកុលបុត្រកុលធីតាខ្មែរ យើងគួរតែបង្ហាញកាយវិការ និងធ្វើសកម្មភាពយ៉ាងណាដើម្បីអោយបរទេសគេមើលឃើញ អំពីអត្តសញ្ញាណជាតិ ដែលមានវប្បធម៌ អរិយៈធម៌ ដ៏ខ្ពង់ខ្ពស់ជាយូរលុងណាស់មកហើយ។ យើងមិនគួរតែនាំគ្នានិយាយអោយតែរួចពីមាត់ ឬហៃអើហៃអើដូចអាជ័យធ្លាក់ទឹកនោះទេ។
សូមបញ្ជាក់ ក្រុមសិល្បៈករ និងសិល្បៈការនីដែលបានចូលរួមក្នុងកម្មវិធីខាងលើ បានអះអាងថា ទោះជាពួកគាត់មិនមែនជាក្រុមអ្នកសិល្បៈល្បីល្បាញក៏ដោយ តែពួកគាត់បានប្តេជ្ញាថា នឹងខិតខំជួយថែរក្សាការពារ វិស័យសិល្បៈខ្មែរអោយបានគង់វង្ស៕ ដោយ៖ ផ្លុងរ៉េត
.jpg)
.jpg)
.jpg)
.jpg)
.jpg)
.jpg)
.jpg)
.jpg)