រថយន្តសាំងយ៉ុងដឹកឈើពីខេត្តក្រចេះទៅស្រុកយួនរាប់រយគ្រឿងក្នុង១ថ្ងៃៗ តែគ្មានអ្នកបង្ក្រាបមានតែអ្នកយកលុយដាក់ហោប៉ៅផ្ទាល់ខ្លួន

នៅថ្ងៃទី២៦ ខែមិនា​ ឆ្នាំ ២០១៨ វេលាម៉ោង១០ និង៤៤នាទីយប់ មាន​ក្បួន​ឡាន​សាំង​​យ៉ុងដឹកឈើប្រហែល​ជិត២០​គ្រឿងចេញពី ច្រកក្រុមហ៊ុនដុណៃ ឆ្លងកាត់ភូមិភ្នំខៀវ ឃុំ​អូរ​គ្រៀង​ ស្រុកសំបូរ ខេត្តក្រចេះ ដែលក្រុមឡានទាំងនេះត្រូវ​បាន​គេ​ស្គាល់ថា ជារបស់ មេ​ឈ្មួញ​ដ៏​ល្បី​ឈ្មោះ​បោះសម្លេងម្នាក់ដែល​​​បាន​អួត​អាងថា​ មិន​ខ្លាច​អ្នក​ណា​ទាំង​អស់​សូម្បីតែ​លោកអភិ​​បាលខេត្តក្រចេះក៏ដោយ។

មេឈ្មួញរូបនេះបាន​ស្រែក​ក្តែងៗជាសាធារណថា ” បានជាខ្ញំហ៊ានចរាចរណ៍​រថយន្ត សាំងយ៉ុង​ដឹក​ឈើ​ជាច្រើនគ្រឿង​បែបនេះ ព្រោះ​ខ្ញុំបានបង់លុយទៅឲ្យ សមត្ថកិច្ច និង​ក្រុមស្ថាប័ណជំនាញ ដែលដាក់ទីស្នាក់ការ​តាមដងផ្លូវ ជាតិ លេខ ៧ A រួច អស់ទៅហើយ។ ទី១-ស្នាក់ការប៉េអ៊ិម៧១០ ទី២-ដូចជាមេព្រៃ អូរគ្រៀង ជាដើម។ល។

តាមប្រភព​ពីប្រជាពលរដ្ធ បានខ្សឹបប្រាប់ថា ពេលដែលមេឈ្មួញធ្វើកាដឹកជញ្ជូនឈើ ម្ដងៗ សមត្ថកិច្ចនៅតាមដងផ្លូវ មិនដែលឃើញមានការបង្ក្រាបម្តងណាឡើយ ជាពិសេសនោះគឺសមត្ថកិច្ច កងរាជអាវុធហត្ថតែម្ដង ហើយកន្លងទៅនេះឯកឧត្ដម នាយឧត្ដមសេនីយ៍ សៅ សុខា បានដាក់បទបញ្ជារ អោយកម្លាំង របស់លោកចុះមក ទប់ស្កាត់រាល់ បទល្មើសព្រៃឈើក្នុង ខេត្តក្រចេះនេះ ប៉ុន្តែបែរ​ជាអស់​លោកល្មើស​និងបទបញ្ជារបស់ថ្នាក់លើទៅវិញ ដោយ​ហេតុថា​នៅ​ពេលដែលក្រុមរថយន្តសាំងយ៉ុងកំពុងធ្វើចរាចរណ៍ ដឹកឈើ យ៉ាងអធិប្បតេយ្យ ដឹកចេញ យ៉ាងគគ្រឹក​គគ្រេង​បែរជា​មន្ត្រីក្រោមឱវាទរបស់លោកអង្គុយចាំតែរាប់ក្បាលរថយន្តសាំងយ៉ុងយកលុយតែ ទៅ​វិញ។

ប្រភពពីពលរដ្ធបានឲ្យដឹងទៀតថា មិនមែនត្រឹមតែខាង​កងរាជអាវុធហត្ថលើផ្ទីប្រទេស​ប៉ុណ្ណោះទេ ដែលមិន​បង្ក្រាបរថយន្តសាំងយ៉ុងទាំងនេះ សូម្បីតែជំនាញរដ្ធបាលព្រៃឈើដែលមានដូចជាសង្កាត់រដ្ធបាលព្រៃឈើ អូរគ្រៀង ជាពិសេសជាងនេះទៅទៀត​នោះគឺ នាយខណ្ឌ័រដ្ធបាលព្រៃឈើ ក្រុងក្រចេះ តែម្ដង ដែលបណ្ដោយឲ្យកូនចៅរបស់ខ្លួន អង្គុយចាំ យកលុយជាថ្នូរ មិនបង្ក្រាប​បទល្មើស​ព្រៃ​ឈើខុសច្បាប់យ៉ាង​គគ្រឹគគ្រេងនេះ។

សូមឯកឧត្តម សាយ សំអាល់ រដ្ឋ​មន្ត្រី​ក្រសួង​បរិស្ថានមេត្តាចាត់​វិធានការ​ទៅ​លើ​ក្រុម​រថ​យន្ត​សាំង​យ៉ុង​ដែល​ដឹក​ឈើ​ពី​ខេត្ត​ក្រចេះ​យក​ទៅ​លក់​នៅ​ស្រុក​យួន​ខាង​លើ​នេះផង​ទាន បើ​មិន​ដូច្នេះ​ទេ​ព្រៃ​ឈើ​ច្បាស់​ជារលាយ​ហិន​ហោច​ខ្លោច​ផ្សា​ជាក់​ជាមិន​ខាន៕ដោយ​៖ សហការី