កង​រាជ​អាវុធហត្ថឃាត់ខ្លួនមុខសញ្ញាប្លន់ប្រដាប់អាវុធ២នាក់

មុខ​សញ្ញាចោរ​ប្លន់​នៅក្រុងសៀមរាប ២នាក់ ត្រូវបានអាវុធហត្ថ ខេត្តសៀមរាប ឃាត់ខ្លួន ជាមួយវត្ថុតាង អាវុធធុន AK47 ស្វ័យបត់ ១ដើម និងគ្រាប់ចំនួន ២២គ្រាប់ នៅផ្ទះសំណាក់ ដែលមានឈ្មោះ ឈារី អង្គរ នៅបន្ទប់លេខ៣០៨ ស្ថិតនៅភូមិ ត្រពាំងសេះ សង្កាត់គោកចក ក្រុង-ខេត្តសៀមរាប កាលពីវេលាម៉ោង១១ និង៤៥នាទី យប់ថ្ងៃទី២៦ ខែកញ្ញា ឆ្នាំ២០១២កន្លងទៅ។

លោកវរ:សេនីយ៍ឯក ស្រី យូរ៉ា មេបញ្ជាការរងអាវុធហត្ថខេត្ត និងជាប្រធានមន្ទីរស្រាវជ្រាវ និងយុត្តិធម៌ ដោយមានបទបញ្ជាពី លោកឧត្ដមសេនីយ៍ត្រី ម៉ន សាម៉ុន មេបញ្ជាការកងរាជអាវុធហត្ថ ខេត្ដសៀមរាប នាំកម្លាំងជំនាញ ក្រោមការដឹកនាំពីលោក សំរិទ្ធិ សុខុន ព្រះរាជអាជ្ញារង អមសាលា ដំបូងខេត្តសៀមរាប ចុះប្រតិបត្តិការឆែកឆេរ ឃាត់ខ្លួនជនសង្ស័យ ២នាក់ ជាមួយនឹង អាវុធ ១ដើម គ្រាប់ចំនួន ២២គ្រាប់ ព្រមទាំងវត្ថុតាង មួយចំនួនទៀត។

លោក ស្រី យូរ៉ា បានឲ្យដឹងថា ការប្រតិបត្តិការនេះ ឈានដល់ការឃាត់ខ្លួនជនសង្ស័យ ២នាក់ ដែលទី១មានឈ្មោះ សួន សាក់ ភេទប្រុស អាយុ៣៥ឆ្នាំ រស់នៅភូមិថ្មី ឃុំឈូកខ្សាច់ ស្រុកបារាយ ខេត្តកំពង់ធំ ធ្លាប់ជាប់ពន្ធនាគារ ជនសង្ស័យ ទី២មានឈ្មោះ គីម សុខហេង ភេទប្រុស អាយុ៤២ឆ្នាំ រស់នៅភូមិពោធិ៍ តាអ៊ុន ឃុំស្រយ៉ូវ ស្រុកកំពង់ស្វាយ ខេត្តកំពង់ធំ ធ្លាប់ជាប់ពន្ធនាគារ សមត្ថកិច្ចបានឆែកឆេរ និងរកឃើញវត្ថុតាង មាន អាវុធធុន  AK 47 ស្វ័យបត់ ១ដើម ដែលមានលេខ ៩៧២៨ និងគ្រាប់ចំនួន ២២គ្រាប់ ព្រមទាំងប្រមូលបាន វិទ្យុទាក់ទង ២គ្រឿង ខ្នោះដៃ១ ម៉ូតូ ១គ្រឿង ខោអាវប៉ារ៉ា ១កំប្លេរ ផងដែរ។

លោកបន្ដថា ជនសង្ស័យទាំង២នាក់នឹង យកអាវុធមកបម្រុងធ្វើកម្មភាពប្លន់ និងកំពុងដើររកទិញដែកសម្រាប់កាច់សោរមានរាងអក្សរតេ និង ទិញថ្នាំបំពុលឆ្កែ ហើយពួកគេ បានដើររកជួលផ្ទះកន្លែងណាដែលស្ងាត់ ដើម្បីពួកវា ប្លន់បានយកម៉ូតូទៅលាក់ទុក។ ហើយបច្ចុប្បន្នជនសង្ស័យ និងវត្ថុតាងបានបញ្ជូនទៅសាលាដំបូង ខេត្តសៀមរាប ដើម្បីផ្ដន្ទាទោសតាមផ្លូវច្បាប់៕