គណបក្សសង្គ្រោះជាតិគ្រោងធ្វើមហាបាតុកម្មទូទាំងប្រទេស

គណបក្ស​សង្គ្រោះ​ជាតិ គ្រោង​នឹង​ដឹកនាំ​ធ្វើ​មហា​បាតុកម្ម​សារជាថ្មី​ម្តងទៀត ដោយ​ធ្វើ​ទូទាំងប្រទេស និង​មានការ​ហែរ​ក្បួន​ដាក់​ញ្ញត្តិ​ថែមទៀត​ផង ដើម្បី​ទាមទារ​ស្វែងរក​យុត្តិធម៌ ជូន​ប្រជាពលរដ្ឋ​ម្ចាស់ឆ្នោត និង​បង្កើត​គណៈកម្មការ​ចម្រុះ​មួយ​ការពិត និង​ឲ្យ​មាន​តុល្យភាព​អំណាច​។​​មហា​បាតុកម្ម​ទូទាំងប្រទេស ដែល​ដឹ​នាំ​ដោយ​គណបក្ស​សង្គ្រោះ​ជាតិ គឺ​គ្រោង​ធ្វើ​នៅក្រោយពេល​បុណ្យ​ភ្ជុំបិណ្ឌ រួចរាល់​។​

​លោក​យ៉ែម បុញ្ញឫទ្ធិ អ្នកនាំពាក្យ​គណបក្ស​សង្គ្រោះ​ជាតិ បាន​ឲ្យ​ដឹង​កាលពី​រសៀល​ថ្ងៃទី​២៧ ខែកញ្ញា ថា ប្រជាពលរដ្ឋ​ខ្មែរ​កំពុងតែ​ធ្វើបុណ្យ​ភ្ជុំ និង​កាន់បិណ្ឌ ហើយ​គណបក្ស​ប្រហែលជា​ធ្វើ​មហា​បាតុកម្ម នៅក្រោយពេល​ភ្ជុំ​។ គណបក្ស កំពុងតែ​សិក្សា​ថា ជា​មហា​បាតុកម្ម អាច​មានការ​ដង្ហែ​ញ្ញត្តិ និង​ធ្វើ​នៅតាម​ខេត្ត​ធំៗ​ដទៃ​ផ្សេងៗ​ទៀត និង​ចង់​ឲ្យ​មានការ​ទាមទារ​នៅ​ទូទាំងប្រទេស​។​

​លោក​បាន​បញ្ជាក់ថា គោលបំណង​នៃ​ការធ្វើ​មហា​បាតុកម្ម នាពេលខាងមុខ គឺ​ទាមទារ​ស្វែងរក​យុត្តិធម៌​ជូន​ម្ចាស់ឆ្នោត ដោយ​សុំ​ឲ្យ​បង្កើត​គណៈកម្មការ​ចម្រុះ​មួយ ស្វែងរក​ការពិត ហើយ​យកមក​សិក្សា តើ​ភាពមិនប្រក្រតី នឹងមាន​លក្ខណៈ​បែបណាខ្លះ ដើម្បី​ឈានទៅ​កំណែទម្រង់​ទៅ​អនាគត​ទៀត ហើយ​ឲ្យ​មាន​តុល្យភាព​អំណាច ក្នុងការ​គ្រប់គ្រង​កំណែទម្រង់​ឲ្យ​មាន​ប្រសិទ្ធភាព​។ លោក​យល់ឃើញថា ក្នុង​ការរៀបចំ​ប្រព័ន្ធ​មួយ​ឲ្យ​មាន​តុល្យភាព​អំណាច ដើម្បី​ឲ្យ​មាន​ប្រសិទ្ធភាព​ក្នុងការ​កំណែទម្រង់​ពិតប្រាកដ​។៕