រថយន្តប្រណីតកាត់តួ ឈ្មួញលួចនាំ ចូលរាល់ថ្ងៃ លក់ចែកចាយ ពេញប្រទេស ដោយអត់បង់ ពន្ធចូលរដ្ឋ មួយរៀល

សេចក្ដីរាយការណ៏ ពីក្រុមអ្នករកស៊ីទិញ លក់រថយន្ត បានអះអាងថា បច្ចុប្បន្ននេះ សកម្មភាព ឈ្មួញ និងសមត្ថកិច្ច ឃុបឃិតគ្នា អនុញ្ញាតឲ្យមានការ នាំចូលរថយន្ត កាត់តួគ្រប់ប្រភេទ យកមកតម្លើង លក់នៅក្នុងប្រទេស កំពុងមានសកម្មភាពផុលផុស យ៉ាងខ្លាំង ។ ក្នុងនោះសូម្បី តែរថយន្ត ប្រណីតៗ ស៊េរីខ្ពស់ថ្មីៗ ក៏គេឃុបឃិតគ្នាអនុញ្ញាត ឲ្យនាំចូលអត់បង់ពន្ធផងដែរ ដែលភាគច្រើន ជាមន្ត្រីសមត្ថកិច្ចធំៗ រួមទាំងកូនចៅ របស់ពួកគេទិញ យកទៅពាក់ស្លាកលេខ ខ.ម , ន.ប និងស្លាកលេខរដ្ឋ ជិះយ៉ាងស្រួលដោយមិន ចាំបាច់បង់ពន្ធ ផ្លូវថែមទៀតផង ។

ជាក់ស្ដែងនៅវេលាថ្ងៃត្រង់ទី ២០ ខែ មីនា ឆ្នាំ ២០១៤នេះមានឈ្មួញម្នាក់ ដែលគេស្គាល់ ឈ្មោះដា បាននាំកុងតឺន័រទំហំ ៤០ ហ្វិត ផ្ទុករថយន្តកាត់តួ មានទាំងចង្កូតឆ្វេង មានទាំងចង្កូតស្ដាំជិត១០គ្រឿង យកមក ដាក់នៅក្នុងឃ្លាំង ដីឡូត៏មួយកន្លែង នៅតំបន់បុរីអង្គរភ្នំពេញ ច្រកចូលតាមបុរីកាំកូស៊ីធី ក្នុងសង្កាត់ ភ្នំពេញថ្មីខណ្ឌសែនសុខ ។

ប្រភពព័ត៏មានបានឲ្យដឹងបន្ថែមថា ទីតាំងខាងលើនេះជារើយៗ គេឧស្សាហ៏ឃើញរថយន្ត នាំកុងតឺន័រ ផ្ទុករថយន្តកាត់តួ មក លាក់ទុកនៅទីនោះណាស់ ដែលរាល់ពេលទំលាក់ម្ដងៗ គេឃើញអ្នករកស៊ីទិញលក់ រថយន្តទៅចាំទិញដឹកចេញភ្លាមៗតែម្ដង តាមរយះរថយន្តស្ទូច ដែលគេត្រៀម ទុករួចជាស្រេច មិនរំខាន ដល់គយ សមត្ថកិច្ចឡើយ ព្រោះឈ្មួញនាំចូលបាន ជូនដំណឹងបង់លុយ មុនអស់ទៅហើយ ។

សូមបញ្ជាក់ថា រថយន្តកាត់តួដែលឈ្មួញ និងគយ ឃុបឃិតគ្នានាំចូល មានជាច្រើនប្រភេទ ក្នុងនោះ សំរាប់រថយន្តចង្កូតស្ដាំមានដូចជារថយន្តស្ព័រ មីនីតូចៗ ដូចជាម៉ាក នីសាន់ ហុងដា… រីឯរថយន្តចង្កូត ឆ្វេងកាត់តួភាគច្រើន ម៉ាកកាមរីឆ្លាម បាឡែន ហាយប្រីត…ជាដើម ។ សំរាប់រថយន្តនីសាន់មីនីមួយគ្រឿង ពេលទំលាក់ចុះពីកុងតឺន័រ មានតំលៃចាប់ពីជាង៣០០០ដុល្លារ ទៅជាង៤០០០ដុល្លារ តាមប្រភេទរថយន្ត ស្អាតឬមិនស្អាត ។ ចំណែកកាមរីបាឡែនចង្កូតឆ្វេងវិញមានចាប់ពីតំលៃជាង៣០០០ដុល្លារទៅជាង ៦០០០ដុល្លារ តាមប្រភេទល្អឬអន់ ។

ខាងលើនេះ គឺគ្រាន់តែជាការរៀបរាប់ ត្រួសៗប៉ុណ្ណោះ លើកក្រោយនាយខ្វែក នឹងធ្វើការរៀបរាប់ ពីរថយន្ត កាត់តួ ក្រោយឈ្មួញផ្សារតតួ និងធ្វើស្អាតហើយ តើអ្នកទិញយកទៅជិះ ដោយអត់មានពន្ធនាំចូល តើគេធ្វើស្លាកលេខរបៀបណា? ហើយអ្នកជិះភាគច្រើន ជាមនុស្សប្រភេទណា ជាបន្តទៀត ៕​ប្រភពពី អង្គរថេម