អាមេរីកប្រគល់​មេដាយ​ខ្ពស់បំផុតដល់លោកស្រី​ ​អង់សាន ស៊ូជី​

 លោកស្រី អង់សាន ស៊ូជី បានទទួលមេដាយមាសពីសភាអាមេរិកដោយផ្ទាល់ បន្ទាប់ពីលោកស្រីទទួលមេដាយនេះកាលពីឆ្នាំ ២០០៨ តែអាក់ខានមិនបានមកទទួលដោយត្រូវឃុំឃាំងនៅក្នុងផ្ទះ។

នៅពេលទទួលមេដាយ លោកស្រី ស៊ូជី បានរៀបរាប់ថា នោះជាពេលវេលាដ៏រំភើបបំផុតមួយក្នុងជីវិតរបស់លោកស្រី។ បន្ទាប់ពីនោះលោកស្រីបានក៏បានចូលជួបសម្ដែងការគួរសមជាមួយ ប្រធានាធិបតីអាមេរិកលោក អូបាម៉ា នៅសេតវិមានផងដែរ ក្រោយរតនាគារអាមេរិកបានលើកលែងទោសលើប្រធានាធិបតីភូមាលោក ថេន សេន។

ការដាក់ទណ្ឌកម្មទៅលើភូមាត្រូវបានលើកលែងជាលំដាប់ ចាប់តាំងពីរដ្ឋាភិបាលថ្មីភូមាបង្ហាញកំណែទម្រង់ប្រជាធិបតេយ្យក្នុងឆ្នាំ ២០១១ កន្លងទៅ។

រដ្ឋមន្ត្រីការបរទេសអាមេរិកលោកស្រី ហ៊ីលឡារី គ្លីនតុន និងអតីតស្ត្រីទី ១ លោកស្រី ឡូរ៉ា ប៊ូស ក៏បង្ហាញវត្តមានក្នុងពិធីប្រគល់មេដាយដែលធ្វើឡើងក្នុង Capitol Rotunda រដ្ឋធានីវ៉ាស៊ីនតោនសហរដ្ឋអាមេរីក។

ក្រោយពេលទទួលមេដាយ លោកស្រីបានសម្ដែងចំណាប់អារម្មណ៍ថា បើទោះជាប្រជាធិបតេយ្យក្នុងប្រទេសនៅមានកម្រិត តែនេះជាក្ដីសង្ឃឹមសម្រាប់យើងរាល់គ្នា មិនថា នៅក្នុងប្រទេសភូមា ឬក្រៅប្រទេសនោះទេ វាជាក្ដីសង្ឃឹមសម្រាប់អ្នកទាំងឡាយណាដែលសិទ្ធិសេរីភាពត្រូវ បានរឹតត្បិត។ លោកស្រីបន្ថែមថា ការលំបាកនៅចំណុចចាប់ផ្ដើមប្រាកដជាមិនអាចជៀសបាន តែលោកស្រីជឿជាក់ថា ក្រោមការជួយ និងគាំទ្រពីសម្ពន្ធមិត្តអ្វីៗនឹងអាចធ្វើទៅបានដោយប្រសើរបំផុត។

លោកស្រីអង់សាន ស៊ូជី ត្រូវបានដោះលែងពីការឃុំខ្លួនក្នុងផ្ទះនៅឆ្នាំ ២០១០ បន្ទាប់មក ភូមាបានបង្ហាញជំហរឆ្ពោះទៅរកប្រជាធិបតេយ្យ តាមរយៈការដោះលែងអ្នកទោសនយោបាយ និងផែនការកំណែទម្រង់ជាច្រើនទៀត៕