មន្ត្រីនគរបាលខេត្តសៀមរាបម្នាក់ ស្នើរសុំអភិបាលខេត្តសៀមរាបជួយពន្លឿនការដោះស្រាយ ក្រុមហ៊ុនស៊ូជីងរំលោភយកដីស្រែរបស់ម្តាយឪពុកគាត់

សូមគោរព ស្នើរសុំ ឯកឧត្តម អភិបាល ខេត្តសៀមរាប មេត្តាជួយឆ្លើយតប នឹងជួយពន្លឿន ការដោះស្រាយ ផ្តល់យុត្តិធម៍ ដល់ឱពុកម្តាយខ្ញុំផង។

ដីស្រែរបស់ ឱពុក ម្តាយខ្ញុំ ដែលតែងតែអាស្រ័យផល់ជារៀងរាល់ឆ្នាំ ចិញ្ចឹមខ្ញុំតាំងពី តូចរហូតដល់ដឹងក្តី នៅសង្កាត់ចុងឃ្នៀស ត្រូវបានក្រុមហ៊ុន ស៊ូ ជីង ចាក់ដីរំលោភចូលលើ នឹងបានបោះបង្គោលព្រំ ចូលក្នុងដីស្រែ របស់ឱពុកម្តាយខ្ញុំ ដើម្បីធ្វើការពង្រីកកំពង់ផែ បន្ថែមកាលពីអំឡុងឆ្នាំ២០១៥ ដោយខាង ម្ចាស់ដីស្រែ នៅមិនទាន់ទទួលបាន សំណងនៅឡើយ ពីភាគីក្រុមហ៊ុន ។

សូមបញ្ជាក់ថា ដីស្រែឱពុកម្តាយខ្ញុំ មានទំហំ១០០៣២ ម៉ែត្រការ៉េ ដែលបានកាន់កាប់ អាស្រ័យផល តាំងពីឆ្នាំ១៩៩០ មកម្លេស មានទីតាំង នៅខាងកើតផ្លូវ ក្បែរកំពង់ផែ ក្រុមហ៊ុន ស៊ូ ជីង ក្នុងសង្កាត់ចុងឃ្នៀស ក្រុងសៀម​រាប។

បន្ទាប់ពីក្រុមហ៊ុនគេបាន ចាក់ដីរំលោភចូលលើដីស្រែ នឹងបានបោះបង្គោល ចូលដីស្រែ របស់ឱពុកម្តាយខ្ញុំ ដើម្បីធ្វើការពង្រីកកំពង់ផែ បន្ថែមកាលពីអំឡុងឆ្នាំ២០១៥ អាជ្ញាធរក្រុងសៀមរាប  បានព្យាយាម សម្របសម្រួលជាច្រើនដង តែមិនទទួលបានលទ្ធផល នឹងបានសម្រេចចេញ ចេញលិខិតលេខ ០៤៣ រ.ប.ក​ បញ្ជូនទៅរដ្ឋបាល ខេត្តសៀមរាប ស្នើរសុំ អនុសាសន៍គោល ការណ៍ដឹកនាំ ពី ឯកឧត្តម អភិបាលខេត្តសៀមរាប ។

ឯកឧត្តម ស៊ិន រុន អភិបាលរងនៃគណ អភិបាលខេត្តសៀមរាប ធ្លាប់បានដឹកនាំក្រុមការងារ របស់រដ្ឋបាលសាលាខេត្តនឹងក្រុង មកសាកសួរប្រជាពលរដ្ឋនឹងត្រួតពិនិត្យឯកសារ កានកាប់ដីស្រែរបស់ប្រជាពលរដ្ឋនៅសាលាសង្កាត់ចុងឃ្នៀស រួចហើយ បានសន្យា នាំសំណើររបស់ ប្រជាពលរដ្ឋ ទៅពិភាក្សា ជាមួយភាគី អគ្គនាយកក្រុមហ៊ុន  តែមិនដឹងយ៉ាងមិច បានជាស្ងាត់ឈឹងរហូតមកដល់ថ្ងៃនេះ មានរយះពេល១ឆ្នាំហើយ ហើយបច្ចុប្បន្ន ឯកឧត្តម ស៊ិន រុន អភិបាលរងខេត្តសៀមរាប ក៏ត្រូវបានចូលនិវត្តន៍ទៀត ដែលធ្វើអោយ ឱពុក ម្តាយខ្ញុំបាទ កាន់តែមានក្តីបារម្មណ៍ នឹងមិនសង្ឃឹម ទទួលបានយុត្តិធម៍។ ហើយរហូត មកដល់ពេលនេះ បង្គោលនោះក៏មិនទាន់ ដកចេញពីលើដី របស់ឱពុកម្តាយ ខ្ញុំនៅឡើយទេ ហើយដីដែលបានចាក់ នឹងហូរច្រោះលើដី ស្រែនោះក៏មិន ទាន់បានកាយចេញដែរធ្វើអោយដីស្រែ របស់ឱពុកម្តាយខ្ញុំ មានសភាពឌើ (ខ្ពស់) ជាងចរន្ត ទឹកប្រឡាយ នារដូវប្រាំង ។

អាស្រ័យហេតុនេះ សូមឯកឧត្តម អភិបាល ខេត្តសៀមរាប មេត្តាជួយឆ្លើយតប នឹងជួយពន្លឿន ការដោះស្រាយ ផ្តល់យុត្តិធម៍ ដល់ឱពុកម្តាយខ្ញុំផង ដោយក្តីអនុគ្រោះ ។

សូមឯកឧត្តមអភិបាល ខេត្តសៀមរាប មេត្តា ទទួលនូវការគោរពដ៏ខ្ពងខ្ពស់ អំពីគ្រួសារខ្ញុំបាទ ដោយក្តីអនុគ្រោះ។