រយៈពេលត្រឹមតែមួយសប្តាហ៍តែប៉ុណ្ណោះ ព្រៃលិចទឹករាប់សិបហិចតាក្នុងតំបន់ពីរលើទ្រនប់លេខ៧៨ ត្រូវបានគ្រឿងចក្ររាប់សិបគ្រឿងឈូសឆាយកាយកំទិច ឡើងក្លាយជាវាលរហោរឋានជិតបានសម្រេចដូចបំណង ហើយក៏មានការតវ៉ាពីប្រជាពលរដ្ឋរាប់រយគ្រួសារ ថែមទាំងមានការឌឺដងផ្លែផ្កាដាក់គ្នាពីក្រោយខ្នង ពីសំណាក់លោកមេឃុំកណ្តែកចាស់ និងលោកចៅសង្កាត់ជ្រាវផងដែរ។
កាលពីថ្ងៃទី៣១ ខែឧសភា ឆ្នាំ២០១៨ថ្មីៗនេះ គេឃើញវត្តមានលោក ខាំ-លឿ អតីតមេឃុំកណ្តែក ស្រុកប្រាសាទបាគង ហែរហមអមដោយតំណាងប្រជាពលរដ្ឋរាប់រយគ្រួសារ ចុះទៅតវ៉ាកន្លែងគ្រឿងចក្រឈូសឆាយព្រៃលិចទឹកខាងលើក្នុងគោលបំណងទប់ស្កាត់មិនអោយឈូសឆាយបន្ត ដោយលោកមេឃុំរូបនេះបានអះអាងថា ដីដែលកំពុងឈូសឆាយនេះជាចំណែកដីអាងស្តុកទឹក របស់ឃុំកណ្តែក មិនមែនជាកម្មសិទ្ធរបស់សង្កាត់ជ្រាវនោះទេ។
លោក ខាំ-លឿ កើតទុក្ខមិនសុខចិត្តរហូតដល់ថតវីដេអូបង្ហោះតាមហ្វេសប៊ុគផង ផ្តល់បទសម្ភាសន៍ដល់អ្នកកាសែតអោយជួយផ្សាយអោយផងថា ដីដែលខាងអាជ្ញាធរសង្កាត់ជ្រាវ និងសហគមន៍ជ្រាវកំពុងធ្វើការឈូសឆាយនេះជាដីព្រៃអាងស្តុកទឹករបស់ឃុំកណ្តែក ហើយលោកខាំ-លឿ បានសុំអំពាវនាវដល់លោក ឃឹម-ប៊ុនសុង អភិបាលខេត្តសៀមរាបសូមជួយរកយុត្តិធម៌អោយលោក និងប្រជារាស្ត្ររបស់លោកផង ព្រោះខាងសង្កាត់ជ្រាវ និងសហគមន៍ជ្រាវកំពុងរំលោភបំពានមកលើដែនដីរបស់ពួកគាត់ហើយ។ លោក ខាំ-លឿ បានមានប្រសាសន៍បន្ថែមតាមទូរស័ព្ទជាចុងក្រោយថា ”អាក្អោបរ៉ន ចៅសង្កាត់ជ្រាវនេះខូចណាស់ ចង់បានដីនេះយូរឆ្នាំហើយ ពីមុនមកសុំទិញអោយ ឯកឧត្តម ខូវ ផល្លាបុត្រ តែខ្ញុំមិនលក់ ខ្ញុំទុកអោយប្រជាពលរដ្ឋស្តុកទឹកទុកធ្វើស្រែ តែឥឡូវវាមកយកស្រស់ៗតែម្តង រ៉េតឯងធ្វើអ្នកកាសែត រស់នៅសង្កាត់ជ្រាវដឹងហើយថា អាណាខូចអាណាល្អ មិនចាំបាច់ខ្ញុំនិយាយច្រើនទេ“។
ឆ្លើយតបទៅនិងការចោទប្រកាន់របស់លោក ខាំ-លឿ អតីតមេឃុំកណ្តែដែលចោទថា ខាងសង្កាត់ជ្រាវរំលោភយកដីរបស់ឃុំកណ្តែកនោះ លោក ក្អោប-រ៉ន ចៅសង្កាត់ជ្រាវបានប្រាប់កម្ពុជាសុណ្ណភូមិនៅរសៀលថ្ងៃទី០១ ខែមិថុនា ឆ្នាំ២០១៨នេះថា ដីដែលឈូសឆាយខាងលើនេះជាដីរបស់សង្កាត់ជ្រាវទេ ហើយការឈូសឆាយនេះជាគំរោងរបស់សម្តេចសង្ឃ ទេព-វង្ស ឈូសដើម្បីធ្វើបារាយណ៍ ហើយក៏មានច្បាប់គ្រប់គ្រាន់ ដែលបានសុំតាំងតែពីឆ្នាំ២០១៣មកម្លេះ ប៉ុន្តែកាលមុនមិនទាន់បានធ្វើដោយសារមានបញ្ហាផ្នែកថវិការ ឥឡូវសម្តេចសង្ឃរកដៃគូរវិនិយោគបានហើយ។ លោកចៅសង្កាត់បន្តថា ”បើគ្មានគំរោងច្បាស់លាស់ អ្នកណាថ្លើមធំទៅហ៊ានរំលោភបំពានយកដីរដ្ឋនោះ ឥឡូវសូមអោយរងចាំមើលទាំងអស់គ្នាទៅថា ដីនេះឈូសលក់ ឬឈូសធ្វើបានរាយណ៍“។ លោកក្អោបរ៉នបានបន្ថែមចុងក្រោយថា ”ខ្ញុំមិនចេះនិយាយជាមួយពួកមនុស្សឆ្កួតនោះទេ (លោកសំដៅទៅលើលោក ខំា-លឿ) ឆ្កួតៗនិយាយយកតែឈ្នះ អាងអីអាង កាំបិត ផ្គាក់ ពូថៅ តែខាងរាស្ត្ររបស់ខ្ញុំនៅខាងភូមិខ្នារឯណេះវិញ មិនដែលហ៊ានក្អកជាមួយគេទេ ព្រោះគេអាងកាប់អាងចាក់“។
សូមបញ្ជាក់បន្ថែមថា នៅក្នុងសង្កាត់ជ្រាវ និងឃុំកណ្តែកនេះ កន្លងទៅ និងក្នុងពេលថ្មីៗនេះ មានការឈូសឆាយព្រៃលិចទឹកយកធ្វើជាកម្មសិទ្ធរបស់ខ្លួន ពីសំណាក់អ្នកមានលុយ មានអំណាច។ អ្នកខ្លះឈូសទុកសិនរងចាំដីឡើងថ្លៃនិងលក់បន្ត អ្នកខ្លះឈូសជួលអោយគេធ្វើស្រែ អ្នកខ្លះឈូសធ្វើដីឡូតិ៍លក់ អ្នកខ្លះកាយយកអាចម៍ដីលក់ ឬកាយយកអាចម៌ដីចាក់ដីឡូតិ៍ខ្លួនឯង សរុបសេចក្តីទៅមានគ្រប់បែបគ្រប់យ៉ាង ហើយព្រៃលិចទឹកនៅក្នុងខេត្តសៀមរាបនេះ បើថ្នាក់ដឹកនាំក្នុងខេត្តមិនរឹតបន្តឹងក្នុងការការពារអោយបានល្អទេនោះ វាមិនលើសពីពីរបីឆ្នាំទៀតទេ វាច្បាស់ជារលាយហិនហោចខ្លោចផ្សាអស់ជាក់ជាមិនខាន់ឡើយ។
ក្រុមពលរដ្ឋវេទិការតុកាហ្វេ បានរិះគន់ខ្លាំងៗ និងមានការចោទសួរដូចខាងក្រោមថា ”កុំបន្ទោសអ្នកណាទំាងអស់ក្នុងរឿងនេះ បើបន្ទោស ត្រូវបន្ទោស ប្រព័ន្ទរដ្ឋបាលថ្នាក់ក្រោមជាតិនេះវាអន់ជាងអាចម៌គោកសិកម្មទៅទៀត ព្រោះមុនទៅឈូសព្រៃធ្វើបារាយណ៍ មេចមិនចេញសេចក្តីប្រកាសព័ត៌មាន ឬសេចក្តីជូនដំណឹង ដល់មន្ត្រីរាជការគ្រប់ជាន់ថ្នាក់ក្នុងខេត្តអោយបានដឹងផង? ហើយមេចមិនប្រកាសអោយពលរដ្ឋនៅក្នុងសង្កាត់ជ្រាវ និងឃុំកណ្តែកនេះ អោយបានដឹងរឿងផង? តើវាមានអាថ៌កំបាំងឡប់ឡែអីនៅពីក្រោយខ្នង បានជាទៅលួចឈូសព្រៃស្ងាត់ៗមិនអោយគេដឹង? ដល់គេដឹងមានរឿងចំរូងចំរាសទើបបានចេញមុខបកស្រាយ តើនេះឬជារបៀបធ្វើការរបស់អស់លោករាល់គ្នា????៕ ដោយ៖ ផ្លុង-រ៉េត
.jpg)
.jpg)
.jpg)
.jpg)
.jpg)
.jpg)
.jpg)
.png)
.jpg)
.jpg)
.jpg)
.JPG)
