លោកទំទាវបណ្ឌិត លី អ៊ុំអេង និងសាច់ញាតិចុះចែកអំណោយ និងប្រគេនចង្ហាន់ដល់ព្រះសង្ឃ

នៅព្រឹក​ថ្ងៃទី២១ ខែសីហា ឆ្នាំ២០១៩នេះ លោកជំទាវ​បណ្ឌិត លី អ៊ុំអេង ក្រុម​គ្រួសារ និង​សាច់ញាតិ បាន​នាំយក​អំណោយ ថវិការ និង​ចង្ហាន់ វេប្រគេន​ព្រះសង្ឃគង់ចាំព្រះ​វស្សា​នៅវត្ត​សិរីបុត្រ (ហៅវត្តទន្យាយផ្អើល) ស្ថិតក្នុង​ភូមិបឹងង៉ត ឃុំបឹងង៉ត ស្រុកសូទ្រនិគម ខេត្តសៀមរាប។

អំណោយ​របស់លោកជំទាវបណ្ឌិ​ លី អ៊ុំអេង រួមមាន ដូនជីជាងមួយរយនាក់ទទួលបានសារ៉ុង​១ និង​ថវិការប្រាំពាន់រៀល តាជីម្នាក់ៗទទួលបានអាវ​សមួយថវិកាមួយម៉ឺនប្រាំពាន់រៀល ចុងភៅ អ្នក​លាងចាន ម្នាក់ៗទទួលបាន​ថវិកាមួយម៉ឺនរៀល ប៉ូលីសប្រជាការពារម្នាក់ៗទទួលបានថវិកា​ពីរម៉ឺនរៀល និង​ម្តាយធម៌របស់លោកជំទាវកាលពីសម័យប៉ុលពតទទួលបាន​ថវិកាពី​រយ​ដុល្លារ។

លោកជំទាវបណ្ឌិត លី អ៊ុំអេង សំដែងអារម្មណ៍ក្តុកក្តួលអួល​អាក់ ហូរទឹកភ្នែករលីងរលោង​ហើយ​វាចារថា ”កាលពីនៅពីក្មេង​រស់នៅទីនេះជាមួយ​ម្តាយ​ឪពុក ខ្ញុំនៅតូច​វែកទឹក​អោយ​ចុងភៅដាំស្លរ ពេល​ម្តាយធម៌​ខ្ញុំ​ឃើញ​ខ្ញុំហត់ពេក គាត់​ថាឈប់រែកទៅកូន​បើហត់ហើយ ម្តាយ​ខ្ញុំ​គាត់ជាចុងភៅ ខ្ញុំបាន​បាយហូប​ដោយ​សាតែគាត់ ដូច្នេះទោះ​ខ្ញុំ​ទៅដល់ទីណាប្រទេសណា ក៏មិន​អាច​បំភ្លេច​ទី​នេះ​បាន​ទេ មិនអាច​បំភ្លេច​ម្តាយធម៌ខ្ញុំបានទេ“។

លោកជំទាវបណ្ឌិត លី អ៊ុំអេង មានប្រសាសន៍ទៀតថា ”កាលពី​ចប់​សម័យប៉ុលពត ទី​នេះ​គ្មាន​វត្តអារាមអីទេ ក្រោយ​មក​ម្តាយ​ឪពុក​របស់​នាងខ្ញុំ រក​ទទួលទានមានបាន ឪពុក​ម្តាយ​នាង​ខ្ញុំបាន​សម្រេច​ចិត្ត​ចំណាយ​ថវិកា សាងសង់ព្រះវិហ៊ារ សាលាឆ័ន្ទ ផ្ទះបាយ ដើម្បី​ទុក​ជាអនុស្សារីយ៍ អស់មួយជីវិត។ លោកជំទាវ​បន្ថែមថា ក្នុង​ពេ​ល​ឆាប់ៗខាងមុខ​នេះ លោកជំទាវ និង​ធ្វើការ​ជួល​ជុល​តំបូល​ព្រះវិហ៊ារ​ថ្មី​ឡើង​វិញ​ទាំងស្រុង បន្តពី​ម្តាយ​ឪពុក​របស់​លោកជំទាវ“។

គេសង្កេតឃើញ​ថា ទាំង​ព្រះសង្ឃ លោកយាយលោក ពុកម៉ែបងប្អូន នៅទីនោះ​មានការ​រន្ធត់ចិត្ត​ ញញឹម​ទាំងទឹក​ភ្នែកហូរ​រលីងរលោង រំភើពចិត្ត​ឃើញ​ក្មេង​ស្រី​ពីអតីតកាលម្នាក់​ដែល​កម្សត់ ក្រីក្រ ក្លាយ​ជាជំទាវបណ្ឌិត មានលុយ​រាប់លាន​ដុល្លារ មិន​ភ្លេច​កំណើត​របស់​ខ្លួន នៅ​ចងចាំរឿងអតីតកាល ជាពិសេសនៅចងចាំ​ម្តាយធម៌ដែល​បច្ចុប្បន្ន​មានវ័យចាស់ជរាក្លាយជាដូនជីទៅហើយ។

ព្រះសង្ឃ ដូនជី តាជី បាន​បួងសួងដល់វត្ថុសាកសិទ្ធដែល​លោក​មាន​រិទ្ធិ​មាន​បារមី សូម​ជួយ​បី​បាច់​​ថែរក្សាលោកជំទាវបណ្ឌិត លី​ អ៊ុំអេង និង​ក្រុម​គ្រួសារ អោយជួប​សេចក្តី​សុខ​ចំរើន និង​ឈ្នះ​អស់​មាសត្រូវ​ទាំង​ឡាយក្នុងលោក៕ ដោយ៖ ផ្លុង រ៉េត