កាភ្លើតភ្លើន ការជ្រុលនិយម ការគាំទ្រតែវប្បធម៌បរទេស ការត្រេកត្រអាលនិងកាមតណ្ហាស្នេហាដូរផ្កា១ទងនៅថ្ងៃទិវនៃក្តីស្រលាញ់ ឬហៅថា Valentine’s Day របស់យុវជនយុវតី នាសម័យកាលបច្ចុប្បន្ន បានធ្វើអោយសង្គមទាំងមូល លោកគ្រូអ្នកគ្រូ មាតាបិតាអាណាព្យាបាល និងថ្នាក់ដឹកនាំប្រទេសកម្ពុជាមានការព្រួយបារម្ភអំពីទង្វើអសីលធម៌ទាំងនេះយ៉ាងខ្លាំង។
គ្រប់បុត្រធីតាទាំងឡាយដែលបានពពោះ៩ខែ១០ថ្ងៃនៅក្នុងផ្ទៃម្តាយ និងបានចាប់បដិសន្ធិមកលើពិភពលោកយើងនេះ មាតាបិតារមែងតែងតែយកចិត្តទុកដាក់ស្រលាញ់បីចាប់ថែរក្សា សូម្បីតែកូនស្រមោចតូចមួយវាកាត់ ក៏ចាប់ញីកសម្លាប់មិនអោយប៉ះពាល់រាងកាយកូនរបស់ខ្លួន។ មិនតែប៉ុណ្ណោះមាតាបិតាខិតខំចិញ្ចឹមកូនរហូតដល់ធំ អោយកូនទៅសាលាក្រេបជញ្ជគ់យកចំណេះវិជ្ជា ដើម្បីអោយមានអនាគតភ្លឺស្វាង មានការងារធំដុំថ្លៃថ្នូរ មានកិត្តិយស ល្បីសាយរន្ទឺលឺដល់អ្នកពួងទាំងឡាយថា កូនខ្លួនមានពូជពង្សរង្សសាវតាល្អ តៗគ្រប់ជំនាន់។
គ្មានមាតាបិតាណាម្នាក់ចង់អោយកូនខ្លួន ដើរផ្លូវខុស ប្រព្រឹត្តអំពើរអសីលធម៌ បាត់បង់ព្រហ្មចារីមុនថ្ងៃរៀបការ ដែលទង្វើទាំងនេះវានាំអោយបាត់បង់កិត្តិយសគ្រួសារយ៉ាងខ្លាំងសំរាប់ប្រទេសកម្ពុជា ដែលកាន់សាសនាព្រះពុទ្ធ គោរពវប្បធម៌ ប្រពៃណី តាំងពីដើមរៀងមក។
តែទោះជាយ៉ាងនេះក៏ដោយ មាតាបិតា មិនបាននៅជាមួយបុត្រធីតា គ្រប់ពេលវេលានោះទេ ដែលជាហេតុធ្វើអោយមាន យុវជនយុវតី ខ្លះភ្លេចភ្លាំងភាំងគំនិត ធ្វើទាំងមិនបានគិត ប្រព្រឹត្តខុសនឹងទំនៀម ដោយយកដៃទាំងទ្វេរដ៏ស្រស់ស្អាត ទៅទទួលផ្កាកូលាបដែលមានបន្លាមុតស្រួចពពេញទៅដោយពឹសពុលពង្វគ់អោយវង្វេង ជាមួយនឹងសម្តីដ៏ផ្អែមត្រជាក់របស់ប្រុសព្រាន ឈាន់ដល់ដឹកដៃគ្នាចូលតាមគុំពោតព្រៃ តាមផ្ទះសំណាក់សណ្ឋាគារ ក្រោមម៉ាស៊ីនត្រជាក់រងាញាក់សាច់ ច្របាច់បីបមថ្នមបំពេ អស់ព្រហ្មចារីទាំងនៅក្មេងខ្ចី មិនទាន់ទាំងបញ្ចប់ការសិក្សាផងនោះ។
ពាក្យចាស់ពោលថា ”កូលាបតែងមានបន្លា រីឯស្នេហាតែងមានឧបសគ្គិ“ នេះគឺជាការពិតណាស់ ការស្រលាញ់គ្នានៅគ្រាសិក្សា ការស្រលាញ់គ្នានៅវ័យក្មេង គឺហាក់បីដូចសត្វញញៀចសប្បាយនឹងភ្លើងមិនដឹងភ្លើងក្តៅប៉ុណ្ណានោះទេ។ អ្នកដែលស្រលាញ់គ្នាក្នុងវ័យសិក្សាភាគច្រើនគឺបែកបាក់ ព្រាត់ប្រាស ដូចពាក្យចាស់ពោលថា ”ស្រលាញ់ពេញប្រាស“។ ការបែកបាក់នេះហើយ ដែលធ្វើអោយគូស្នេហ៍ខ្លះទទួលយកមិនបាន រហូតដល់ ចងក លោតទឹក ផឹកថ្នាំពុល ទៅធ្វើជាស្រីលក់ខ្លូនតាមបនតាមបាខារ៉ាអូខេ រហូតមានអ្នកខ្លះ កើតអេដស៍ស៊ីដា ស្លាប់បាត់បង់ជីវិត មុនជីដូនជីតា មានតាបិតាក៏មាន។
ធម្មតាមនុស្សប្រុសស្រលាញ់មុខមាត់ ស្រលាញ់កិត្តិយស ជាជាងអ្វីទាំងអស់ ហើយមនុស្សប្រុសខ្លាចបំផុតនោះកឺមានគេហៅខ្លួនថា ”អាវែក គេស៊ីក្រោមភ្នែកមិនដឹងខ្លួន“ ។ ចំណុចនេះហើយដែលយុវសិស្ស យុវតី ទាំងឡាយគួរពិចារណា គួរថែរក្សាខ្លួន អោយបានល្អមុនថ្ងៃរៀបការ។
មានយុវជន និងយុវតីជាច្រើនដែលមានអាយុចាប់ពី១៥ឆ្នាំឡើងទៅ គេធ្លាប់បាននិយាយត្រង់ថា គេដឹងថា ស្នេហាក្នុងវ័យសិក្សាវាមិនមែនជាការល្អទេ តែបេះដូងរបស់ពួកគេមិនអាចអត់ទ្រាំបាន។ មិនតែប៉ុណ្ណោះ នៅពេលពួកគេស្រលាញ់គ្នានោះ ថែមទាំងមានចំណង់ផ្លូវភេទយ៉ាងខ្លំាងជាមួយគ្នាទៀតផង។
សម្តីខាងលើរបស់យុវជនយុវតី ត្រូវបានអ្នកវិភាគដែលជារៀមច្បង និងលោកយាយលោកតា ទាត់ចោលទាំងស្រុងហើយសួរថា តើហេតុអ្វីរៀមច្បងនិងអ្នកជំនាន់មុននេះបន្តិច គេអាចទ្រាំងរក្សាភាពបរិសុទ្ធរហូតដល់ថ្ងៃរៀបការបាន? ចុះហេតុអ្វីក្មេងៗបច្ចុប្បន្នដែលជាអ្នកបានចូលសាលា បានរៀនសូត្រចេះដឹងខ្ពង់ខ្ពស់មិនអាចធ្វើបានទៅវិញ?។ រៀមច្បងយើងយល់ឃើញថា នេះមិនមែនយុវជនយុវតីយើងខ្វះការពិចារណាទេ គឺគេទទួលរងឥទ្ធិពលសង្គម ទទួលរងការអូសទាញពីសំណាក់ពួកម៉ាក មិត្តភក្តិ និងខ្សែភាពយន្តរឿងស្នេហាមួយចំនួនតែប៉ុណ្ណោះ។
យោងតាមសារព័ត៌មានមួយចំនួនបានចុះផ្សាយសម្តី លោកស្រី ស៊ី វណ្ណបុទុម រដ្ឋលេខាធិការក្រសួងកិច្ចការនារី បានថ្លែងនៅថ្ងៃនេះថា ក្រសួងកិច្ចការនារី នឹងសហការ ជាមួយក្រសួងមហាផ្ទៃ ក្រសួងអប់រំ ក្រសួងវប្បធម៌ ដើម្បីរឹតបន្តឹង ពន្យល់ដល់សិស្ស និស្សិត យុវជន ឲ្យយល់ពីអត្ថន័យ ថ្ងៃ១៤កុម្ភៈ ។លោកស្រីបានបន្ថែមថា នៅថ្ងៃនោះ(១៤គុម្ភៈ) ក្រសួងមហាផ្ទៃ នឹងចាត់វិធានការ មិនឲ្យយុវជនអាយុក្រោម ១៨ ឆ្នាំ ចូលផ្ទះសំណាក់ឡើយ។
មាតាបិតា អាណាព្យាបាល លោកគ្រូអ្នកគ្រូ សង្គមជាតិទាំងមូលសង្ឃឹមថា យុវជនយុវតីខ្មែរមួយចំនួនតូចដែលធ្លាប់តែវគ់វង្វេង នឹងវប្បធម៌ជូនផ្កាដូរព្រហ្មចារី កន្លងទៅរយៈពេលប៉ុន្មានឆ្នាំចុងក្រោយនេះ និងប្តូរទៅជាជូនផ្កាដល់លោកយាយលោកតា មាតាបិតា លោកគ្រូអ្នកគ្រូវិញ។ ហើយពួកគាត់កង្ឃឹមថា ១៤គុម្ភៈ ឆ្នាំ២០១៣នេះ មិនមានយុវជនយុវតីណាម្នាក់ ត្រូវបានសមត្ថកិច្ចនាំខ្លួនពីទីសាធារណៈ ពីគម្ពូតព្រៃ ឬពីសណ្ឋាគារ ផ្ទះសំណាក់ យកទៅនែនាំ ចុះផ្សាយលើទំព័រកាសែត ដែលនាំអោយមាតាបិតា អាប់អោយកិត្តិយសថោកទាបដោយសាកូននោះទេ៕ ដោយ៖ ផ្លុងរ៉េត
.jpg)
.jpg)
.jpg)
.jpg)
.jpg)
.jpg)
.jpg)
.jpg)
