ពិតជាខ្មាស់គេជាងលិចពងទៅទៀត!

ដូចពាក្យចាស់មួយបានពោលថា "ភ្នំមួយពុំអាចមានខ្លាពីរបានឡើយ" គម្រោងជីកស្ដារបឹងពារាំងតែមួយ តែបែរជាបណ្ដោយឲ្យមានក្រុមហ៊ុន២ផ្សេងពីគ្នាចែកទឹកដីគ្នារកស៊ីយ៉ាងគគ្រឹគគគ្រេងទៅវិញ។

១.ក្រុមហ៊ុនជីកស្ដារបឹងពារាំងក្នុងសង្កាត់ជ្រាវត្រូវបានគេស្គាល់ថាជារបស់លោក "សាន្ត រដ្ឋស៊ីង"។
២.ឯក្រុមហ៊ុនមួយទៀតដែលជីកស្ដាបឹងពារាំងស្ថិតក្នុងសង្កាត់ចុងគ្នា កាសែតកម្ពុជាសុវណ្ណភូមិអត់ស្គាល់ឈ្មោះនោះទេ គ្រាន់តែដឹងថាក្រោមការគ្រប់គ្រងរបស់លោក ហាប់ ដា ប្រធានសហគមន៍នេសាទចុងឃ្នៀស ហើយមានអ្នកមានឥទ្ធិពលមានអំណាចម្នាក់ទៀតនៅពីក្រោយខ្នងលោកហាត់ដា(សុំមិនបញ្ចេញឈ្មោះ) ជាកូនប្រុសរបស់លោក សត ណាឌី អតីតស្នងការនគរបាលខេត្តសៀមរាប នេះបើយោងតាមប្រភពព័ត៌មានដែលលួចបង្ហើបប្រាប់។

សូមរំឭកផងដែរថាកាលពីដើមខែកុម្ភៈឆ្នាំ 2022 នេះ លោក សាន្ត រដ្ឋស៊ីង និងលោក ហាប់ ដា បានមានជម្លោះទាស់ទែងគ្នា រហូតដល់មានការចោទប្រកាន់ថាលោក សាន្តរដ្ឋ ស៊ីង បានចុះពីឡានវាយលោក ហាប់ ដា ពីរដៃ។ ចំណែកឯលោក សាន្ត រដ្ឋស៊ីង បានបដិសេធថាពុំបានវាយលោក ហាប់ ដា នោះទេ ហើយថែមទាំងចោទប្រកាន់ទៅលោក ហាប់ ដា វិញថា បានរំខានដល់ការរកស៊ីរបស់លោក ធ្វើឲ្យលោកខាតបង់ពេលវេលា ខាតបង់ថវិកា ដោយសារតែកូនចៅរបស់លោក ហាប់ ដា បានដាក់បារ៉ាស់បិទមិនឲ្យឡានដឹកដីរបស់លោក សាន្ត ស៊ីង មិនឲ្យដឹកចេញមកក្រុងសៀមរាប។

ពលរដ្ឋនៅក្នុងសង្កាត់ជ្រាវ និងពលរដ្ឋនៅក្នុងសង្កាត់ចុងឃ្នៀស ដែលតាមដានហេតុការណ៍ខាងលើនេះ បានខ្សឹបខ្សៀវគ្នារិះគន់ថា "បានច្រាសច្រំឆ្អែតហើយ មិនចេះឱបក្រសោបគ្នា ច្រាសឆ្អែតមានកម្លាំងរៀងខ្លួន ខាំគ្នាដូចសត្វតិរច្ឆាន"។

ពលរដ្ឋអ្នកតាមដានហេតុការណ៍ខាងលើនេះ កំពុងតែរង់ចាំមើលចំណាត់ការរបស់ថ្នាក់លើ តើថ្នាក់លើចាត់ការយ៉ាងបែបណាទៅវិញ រវាងខ្លាពីរនៅលើភ្នំតែមួយ ដូចដែលបានរៀបរាប់មកខាងលើនេះ ឬមួយទុកឲ្យនៅបន្តខាំគ្នាតទៅទៀត?៕ ដោយ: ផ្លុងរ៉េត