សង្គមស៊ីវិលបារម្ភពីការជួញដូរមនុស្សនិងកេងប្រវ័ញផ្លូវភេទនៅតំបន់ទេសចរណ៏

មន្រ្តីជំនាញរកឃើញថា នៅប្រទេសកម្ពុជាបច្ចុប្បន្នកំពុងប្រឈមនឹងការជួញដូរមនុស្ស និងការកេងប្រវ័ញផ្លូវភេទយ៉ាងធ្ងន់ធ្ងរនៅតាមតំបន់អភិ វឌ្ឍន៏ទេសចរណ៏មួយចំនួននិងតាមច្រកព្រំដែនក្នុងខេត្ដនានា ដោយសារវិទ្យាសាស្រ្ដជឿនលឿន។

អំពើឧក្រិដ្ឋជួញដូរមនុស្សនេះត្រូវបានមន្រ្តីសង្គមស៊ីវិលរក ឃើញថា ដោយសារជនល្មើសយល់ថា ជាមុខរបរងាយរកប្រាក់បានស្រួល ជាការពុំមានជំរើសការងារ ខ្វះការអប់រំនិងខ្វះការយល់ដឹង ចំណាកស្រុកខុសច្បាប់ ខ្សែស្រឡាយសមាជិកគ្រួសារច្រើន ភាពក្រីក្រ ជំពាក់បំណុលគេ សង្គមសេដ្ឋកិច្ចមិនប្រក្រតី គំលាតអ្នកមាននិងអ្នកក្រ មហន្ដរាយធម្មជាតិ សង្គ្រាម អន្ដោប្រវេសទូលំទូលាយ ការអនុវត្ដន៍ច្បាប់នៅធូរលុង ខ្វះការគាំពារកុមារ តម្រូវការផ្លូវភេទ ពលកម្មតាមផ្ទះ សិប្បកម្ម ឬឧស្សាហកម្ម ភាពព្រងើយកន្ដើយរបស់រដ្ឋាភិបាល និងការអភិវឌ្ឍន៏តាមដងទន្លេមេគង្គ។

នាយកកម្មវិធីទប់ស្កាត់ នៃអង្គការសម្ព័ន្ធចាប់ដៃលោកផេង-ច័ន្ទតារាថ្លែងនៅសិក្ខាសាលាមួយ ក្នុងខេត្តសៀមរាបនៅថ្ងៃទី២៦ខែកក្កដាថាការជួញដូរផ្លូវ ភេទនិងការជួញដូរកំលាំងពលកម្មមានសន្ទុះកើនឡើងច្រើន មានចំនួន៥ទៅ៧ខេត្ដ ដូចជាខេត្ដព្រះសីហនុ សៀមរាប កោះកុង ព្រៃវែង កំពង់ធំ ខេត្ដរតនៈគីរី និងខេត្ដស្វាយរៀង។

អ្នកយកព័ត៌មានយើងមិនអាចទាក់ទងអនុប្រធាននាយកដ្ឋានប្រឆាំងការ ជួញដូរមនុស្សនិងការពារអនីតិជន នៃក្រសួងមហាផ្ទៃ លោក ជីវ ផល្លី បាននៅឡើយទេ ដោយលោកប្រាប់ថា ជាប់រវល់។

យោងតាមរបាយការណ៏ស្ដីពីការជួញដូរមនុស្សរបស់ក្រសួងការបរទេស សហរដ្ឋអាមេរិកបានប៉ាន់ស្មានថា មានបុរសស្ដ្រី និងកុមារ ប្រមាណពី ៦០០.០០០នាក់ទៅ៨០០.០០០នាក់ និងមានច្រើនលើសពីតួលេខនេះ ត្រូវបានគេជួញដូរឆ្លងកាត់ព្រំដែនអន្ដរជាតិហើយចំនួនពាក់ កណ្ដាលនៃជនរងគ្រោះទាំងនេះត្រូវបានគេជួញដូរ សំរាប់កេងប្រវ័ញផ្លូវភេទ។ រីឯរបាយការណ៏ផ្នែកប្រយុទ្ធប្រឆាំងនិងជំងឺអេដស៏ ក្នុងឆ្នាំ២០១០ បង្ហាញថាមានស្ដ្រីរកស៊ីផ្លូវភេទនៅឆ្នាំ២០១០បានកើនឡើងជាង ឆ្នាំ២០០៩ដោយសារបញ្ហាសេដ្ឋកិច្ចធ្លាក់ចុះ។

អ្នកសម្របសម្រួលយុទ្ធនាការដង្ហែតាមដងផ្លូវស្ដីពីការទប់ ស្កាត់ការជួញដូរមនុស្សនៃអង្គការបញ្ចប់ការកេងប្រវ័ញផ្លូវភេទ និងការជួញដូរមនុស្ស ហៅកាត់ជាភាសាអង់គ្លេសថា (MTV exit) ដែលមានមូលដ្ឋាននៅទីក្រុងបាងកកប្រទេសថៃ និងប្រទេសអង់គ្លេស កញ្ញា ហឿន-សុភ័ក្ដ្រ មានប្រសាសន៏ថា ការជួញដូរមនុស្ស ការជួញដូរផ្លូវភេទនិងការកេងប្រវ័ញកំលាំងពលកម្មនៅទូទាំងពិភ ពលោកមានកំរិតខ្ពស់ ព្រោះមនុស្សភាគច្រើនៅតែគិតថា ការណីនេះនៅតែងាយស្រូលរកប្រាក់ចំណូល។

កញ្ញាបន្ដថា បើប្រៀបធៀបជាមួយឆ្នាំមុនៗ ការជួញដូរកំលាំងពលកម្ម មានការកើនឡើង ព្រោះពលករភាគច្រើនពួកគេបានទៅរកការងារធ្វើនៅប្រទេសជិតខាង និងដោយសារកំរិតនៃការហូរចេញតាមច្រកព្រំដែន មានភាពងាយស្រួលជាងមុន៕