សិប្បករចម្លាក់ឈើផ្ទុះការតវ៉ាក្រុមហ៊ុនអាទីសង់អង្គរ

នៅព្រឹកថ្ងៃទី១២ ខែកញ្ញា ឆ្នាំ២០១២ នេះ មានផ្ទុះការតវ៉ា មួយរវាង សិប្បករ ខាងផ្នែកសិប្បកម្ម ចម្លាក់ឈើ ជាមួយក្រុមហ៊ុនចំរុះ សិប្បករអង្គរ  នៅមន្ទីរអប់រំចាស់ ភូមិស្ទឹងថ្មី សង្កាត់ស្វាយ ដង្គុំ ក្រុងសៀមរាប ដែលបច្ចុប្បន្នក្រុមហ៊ុនចំរុះសិប្បករអង្គរ កំពុងដំណើរការ ។

ព្រឹកមិញនេះ មានអ្នកតវ៉ាប្រមាណ ១០០នាក់ ដែលតំណាងឲ្យសិប្បករប្រមាណ ៣០០នាក់ ដោយមានសមត្ថកិច្ច និងកងកម្លាំងប្រដាប់អាវុធ  អាជ្ញាធរ រាប់សិបនាក់ ចុះអន្តរាគមន៍ និងសម្របសម្រួល។

អ្នកតំណាងនៃសិប្បករ ដែលបានផ្ទុះការតវ៉ា ជាមួយក្រុមហ៊ុនចំរុះសិប្បករអង្គរ បានឲ្យដឹងថា ពួកគាត់សុំទាមទារ ឲ្យខាងក្រុមហ៊ុនគោរពច្បាប់ នៃព្រះរាជាណាចក្រកម្ពុជា ក្នុងនោះគឺមាន ៤ចំណុច ទី១-សូមរៀបចំឲ្យមានប្រាក់ឈ្នួលគោលសម្រាប់សិប្បករទាំងអស់ (គិត តាមមធ្យមភាគ) ទី២-សុំឲ្យនិយោជកចចារ លើចំនួនម៉ោងផលិត រូបថ្មី សារជាថ្មី ទី៣-សូម ឲ្យក្រុមហ៊ុនឈប់បង្ខំសិប្បករធ្វើការផលិតដែលមានតម្លៃទាបជាងម៉ោងគោល និងទី៤- សូម ឲ្យក្រុមហ៊ុនត្រូវផ្ដល់ប្រាក់ឈ្នួល គោលដល់សិប្បករនៅពេលក្រុមហ៊ុនមិនអនុញ្ញាត ឲ្យកម្មករធ្វើការងារមានស្រាប់ ឬគ្មានការងារឲ្យធ្វើ ។

លោកវរសេនីយទោ ស៊ុន សាន  អធិការនគរក្រុងសៀមរាប បានបញ្ជាក់ថា សមត្ថកិច្ច អាជ្ញាធរ និងស្ថាប័នពាក់ព័ន្ធ នឹងសម្របសម្រួលក្នុងការពិភាក្សា ស្វែងរកដំណោះស្រាយ រវាងភាគីទាំងពីរ ដោយណាត់ពេលជួប ពិភាក្សា ដោះស្រាយគ្នា នៅឯសាលាក្រុងសៀមរាប ក្នុងពេលឆាប់ៗ។ខាង ក្រុមហ៊ុនបានសម្រេចចេញសេចក្ដីបង្គាប់ ចុះថ្ងៃទី៣០ ខែសីហា ឆ្នាំ២០១២ បដិសេធនូវការទាមទារ របស់ពួកគេ ទាំង៤ចំណុច ត្រលប់វិញ៕ ដោយ ជខ