ពុលមើមដំឡូងមីមួយគ្រួសារស្លាប់ម្នាក់៩នាក់ធ្ងន់និងស្រាល

គ្រួសារ​ក្រីក្រ​មួយ មាន​គ្នា ១០​នាក់ បាន​ស្ងោរ​មើមដំឡូង​មីហូប​ពុល​ក្អួតចង្អោរបណ្ដាល​ឲ្យ​កូនស្រី​អាយុ៥​ឆ្នាំស្លាប់​ភ្លាមៗ ហើយ ៩​នាក់ កំពុង​ដឹក​ទៅ​សង្គ្រោះ​នៅ​មន្ទីរពេទ្យ ស្រុក​សំពៅ​លូន ក្នុងនោះ មាន​សភាព​ធ្ងន់ធ្ងរ ៣​នាក់ ​។​

លោក កើត ចិន្ដាមេឃុំ​ប៊ួបាន​ឲ្យ​ដឹងថាគ្រួសារ​ដែល​ពុល​ដំឡូង​មីនេះ គឺ​ពួកគាត់​ក្រីក្រ​ចំណាកស្រុក​មក​ស៊ីឈ្នួល​ធ្វើ​ចម្ការ​ឲ្យ​គេ​ស្នាក់​រស់នៅ​ភូមិ​ភ្នំ​ប្រាំពីរ ឃុំ​ប៊ួ​នេះ​។ 
លោកបាន​បញ្ជាក់ថាអ្នកក្រីក្រ​ចំណាកស្រុកមករក​ស៊ីឈ្នួល​គេ មាន​ប្រមាណ​ជា ៦០​គ្រួសារ នៅក្នុង​ឃុំ​ប៊ួ ស្រុក​ភ្នំព្រឹក​។ អ្នកខ្លះ​បាន​ចុះបញ្ជី​រស់នៅ ខ្លះទៀត​មិនទាន់បាន​ចុះបញ្ជី​រស់នៅ ហើយ​គ្មាន​ដីធ្លី​សម្រាប់​បង្កបង្កើនផល​ឡើយ​។​

​ពាក់ព័ន្ធ​ករណី​ពុល​មើមដំឡូង​មី នៅ​ភូមិ​ភ្នំ​ប្រាំពីរ​ឃុំ​ប៊ួ ស្រុក​ភ្នំព្រឹក​នេះ លោក ឈិ​ត សេង នាយផ្នែក​ព្រហ្មទណ្ឌ​ប៉ូលិស​ស្រុក​សំពៅ​លូន បាន​ឲ្យ​ដឹងថា គ្រួសារ​ដែល​ហូប​ដំឡូង​មី​ពុល​ទាំង ១០​នាក់​នេះ គឺ​កូនស្រី​អាយុ៥​ឆ្នាំម្នាក់បាន​ស្លាប់​ភ្លាមៗ បន្ទាប់ពី​ហូប​មើមដំឡូង​មី​ស្ងោរ​រួច​។ ចំណែក ៩ នាក់ ក្នុង​ក្រុមគ្រួសារ​នេះ ត្រូវ​បានដឹង​បញ្ជូនទៅ​មន្ទីរពេទ្យបង្អែក​ស្រុក​សំពៅ​លូន​ទាំង ៩​នាក់​នេះ គឺមាន ៣​នាក់ មាន​អាកា​រៈ​ធ្ងន់ធ្ងរ មិន​ធូរស្រាល​ឡើយ​៕​