ច្រើនខែមកហើយដែលលោក ម៉ឹង យូឡេង ត្រូវបានតែងតាំងជាប្រធានមន្ទីរសាធារណការដឹកជញ្ជូនខេត្តកណ្តាលជំនួសលោក មាស សឿន ប៉ុន្តែគេមិនដែលឃើញលោក ម៉ឹង យូឡេង យកចិត្តទុកដាក់ ពីភាពអនាធិបតេយ្យនៃក្រុមមន្ត្រីដែលដាក់ជញ្ជីងថ្លឹងរថយន្តផ្ទុកលើសទម្ងន់ នាំគ្នាដាក់កុងត្រូលជជុះចាំប្រមូលលុយពីការដឹកជញ្ជូនលើសទម្ងន់ យកទៅធ្វើមានធ្វើបានផ្ទាល់ខ្លួននោះទេ ធ្វើឲ្យផ្លូវស្ពានដែលចាស់ទ្រុឌទ្រោមនៅក្នុងខេត្តកណ្តាល ត្រូវបាក់ស្រុតនិងខូចខាតរំខានការធ្វើដំណើរបស់ប្រជាពលរដ្ឋ។
ជាគោលការណ៍សាលាខេត្តកណ្តាលបានឯកភាពឲ្យមន្ទីរសាធារណការបង្កើតក្រុមចម្រុះ ដើម្បីត្រួតពិនិត្យការដឹកជញ្ជូនលើសទម្ងន់នៅតាមផ្លូវសំខាន់ៗ តាមរបៀបចល័ត ប៉ុន្តែការអនុវត្តជាក់ស្តែងលោក ម៉ឹង យូឡេង បានបន្តឲ្យក្រុមជញ្ជីងថ្លឹងរថយន្តទាំងនោះ ដាក់ប៉ុស្តិ៍ជាអចិន្ត្រៃយ៍រាប់សិបឆ្នាំមកហើយ ពោលគឺទីតាំងជញ្ជីងថ្លឹងរថយន្តនៅទូទាំងខេត្តកណ្តាលកំពុងធ្វើសកម្មភាពដូចក្រុមកុងត្រូលជជុះគឺសកម្មភាពបំផុតក្នុងការរាប់ក្បាលឡានយកលុយ មិនដែលខ្វល់ពីការដឹកជញ្ជូនលើសទម្ងន់បំផ្លាញផ្លូវស្ពាននោះទេ។ លោក ម៉ឹង យូឡេង មិនដឹងជាទទួលបានផលប្រយោជន៍ពីក្រុមជញ្ជីងថ្លឹងរថយន្តប៉ុន្មាននោះទេ ទើបគាត់មិនយកចិត្តទុកដាក់លុបបំបាត់ភាពអសកម្ម ដែលបង្កឡើងដោយក្រុមជញ្ជីងថ្លឹងរថយន្ត ព្រោះអ្វីដែលមន្ត្រីអស់នោះកំពុងធ្វើ ផ្ទុយពីគោលការណ៍របស់ក្រសួងសាធារណការ និងផ្គើនចំពោះសេចក្តីណែនាំរបស់អភិបាលខេត្តកណ្តាល។
ជាក់ស្តែងស្ពានលេខ៤៩ ស្ថិតនៅស្រុកកោះធំ តាមដងផ្លូវជាតិលេខ២១ បានបាក់ស្រុតធ្វើឲ្យកកស្ទះរថយន្តនិងអ្នកដំណើរហើយជាញឹកញាប់ស្ពាននៅតាមផ្លូវលេខ២១នេះ មានបញ្ហាដោយសារការផ្ទុកលើសទម្ងន់។ គេសង្កេតឃើញក្រុមជញ្ជីងថ្លឹងរថយន្តដាក់ប៉ុស្តិ៍ប្រចាំការលើផ្លូវជាតិនេះផងដែរ ប៉ុន្តែការដឹកជញ្ជូនលើសទម្ងន់ធ្វើឲ្យខូចខាតផ្លូវស្ពាន ចេះតែកើតមានជាហូរហែរគ្មានការលុបបំបាត់នោះទេ ក៏ព្រោះតែក្រុមជញ្ជីងថ្លឹងរថយន្តដែលប្រចាំការនៅទីនោះ សុខស្រួលក្នុងការប្រមូលលុយពីការដឹកជញ្ជូនលើសទម្ងន់។ ស្ពានចាស់ទ្រុឌទ្រោមជាច្រើនកន្លែងនៅតាមផ្លូវជាតិលេខ២១ អាចទ្រទម្ងន់ត្រឹមតែ១៥តោន ប៉ុន្តែការដឹកជញ្ជូនជាក់ស្តែង មានទម្ងន់មិនតិចជាងពី ៥០-៨០ តោននោះទេ គឺក្រុមមន្ត្រីសប្បាយរាប់ក្បាលឡានយកលុយ មិនខ្វល់ខ្វាយទាំងអស់។
និយាយពីជញ្ជីងថ្លឹងរថយន្តនៅតាមផ្លូវជាតិលេខ២ និងលេខ៣ ដែលគ្រប់គ្រងដោយមន្ត្រីកងរាជអាវុធហត្ថ ដ៏មានឥទ្ធិពលម្នាក់ គឺមិនដែលហាមឃាត់រថយន្តដឹកជញ្ជូនលើសទម្ងន់ឲ្យផ្ទេរទំនិញឬ ធ្វើការផាកពិន័យដើម្បីប្រមូលថវិកាជូនរដ្ឋនោះទេ។ ដូចជាករណីរថយន្តដឹកក្រួស ថ្ម ខ្សាច់ ដែលផ្ទុកលើសទម្ងន់រាប់ពាន់គ្រឿង បើកបរឆ្លងកាត់ផ្លូវជាតិលេខ២ លេខ៣ ដែលមានជញ្ជីងថ្លឹងរថយន្តដល់ទៅ២កន្លែង អាចបើកបរឆ្លងកាត់ដោយរលូនល្អ និងពេលដែលក្រុមហ៊ុនដឹកជញ្ជូនទាំងនោះបង់ប្រាក់ជាប្រចាំខែ ឲ្យទៅមន្ត្រីកងរាជអាវុធហត្ថដែលកំពុងមៅផ្តាច់លើការប្រមូលលុយពីជញ្ជីងថ្លឹងរថយន្តទាំង២កន្លែងនេះ។
ជញ្ជីងថ្លឹងរថយន្តនៅតាមផ្លូវជាតិលេខ៥ ដែលមានទីតាំងស្ថិតនៅជិតផ្សារឧត្តុង្ក ក៏អាចប្រមូលលុយពីការដឹកជញ្ជូនលើសទម្ងន់មិនធម្មតានោះទេ ព្រោះគ្រប់រថយន្តដឹកទំនិញមកពីស្រុកសៀម ក៏ដូចជាការដឹកជញ្ជូនកសិផល ពីតាមផ្លូវជាតិលេខ៥ ឆ្លងកាត់ខេត្តកណ្តាលចូលរាជធានីភ្នំុពេញ និងបន្តទៅស្រុកយួន សុទ្ធតែជាប់កាតព្វកិច្ចចូលបង់លុយឲ្យក្រុមជញ្ជីងថ្លឹងរថយន្ត។ យ៉ាងហោចណាស់រថយន្តដឹកទំនិញដែលមានទំនាក់ទំនងល្អជាមួយក្រុមជញ្ជីងថ្លឹងរថយន្តទាំងនោះ ត្រូវបង់ប្រាក់ចាប់ពី ១០-៤០ម៉ឺនរៀល ទៅតាមប្រភេទរថយន្តឬទំនិញ គឺគ្មានករណីយោគយល់ទេ ហើយពេលខ្លះសម្រាប់រថយន្តដែលមិនសូវមានទំនាក់ទំនងល្អជាមួយក្រុមជញ្ជីងថ្លឹងរថយន្តត្រូវការកោសរូសបង្ខំឲ្យបង់ប្រាក់ប្រមាណ ១-២លានរៀល ហើយពេលខ្លះបង្ខំឲ្យផ្ទេរទំនិញផងដែរ។
ជញ្ជីងថ្លឹងរថយន្តនៅចំណុចផ្លូវជាតិលេខ១ ក្នុងស្រុកកៀនស្វាយរបស់សាធារណការខេត្តកណ្តាល ក៏កំពុងសុខស្រួលក្នុងការប្រមូលលុយពីរថយន្តដឹកជញ្ជូនទំនិញលើសទម្ងន់ ទាំងតូចទាំងធំផងដែរ គឺឲ្យតែបង់លុយឲ្យក្រុមជញ្ជីងថ្លឹងរថយន្តគឺអាចដឹកជញ្ជូនទំនិញតាមតែអំពើចិត្ត ដោយសូម្បីតែពេលខ្លះរថយន្តដែលមិនផ្ទុកលើសទម្ងន់ក៏ត្រូវគេកោសរូសឲ្យបង់ប្រាក់ថ្លៃបាយចាប់ពី ១-២ម៉ឺនរៀលផងដែរ។
លោក ម៉ឹង យូឡេង ចាប់តាំងពីបានឡើងតំណែងជាប្រធានមន្ទីរសាធារណការខេត្តកណ្តាល គាត់បានឃុបឃិតជាមួយមន្ត្រីថ្នាក់ក្រោមបង្កើតឲ្យមានភាពអសកម្មគ្មានការកែទម្រង់ទាល់តែសោះ ហើយក្នុងតួនាទីជាប្រធានសាធារណការខេត្តកណ្តាលនេះ គេយល់ថា លោក ម៉ឹង យូឡេង អាចប្រមូលប្រាក់យកទៅអភិវឌ្ឍន៍មុខតំណែងឬស្រង់ដើមបានយ៉ាងងាយស្រួលបំផុត។ គ្រាន់តែប្រាក់ចំណូលដែលបានមកពីក្រុមជញ្ជីងថ្លឹងរថយន្តដែលឃុបឃិតឲ្យមានការដឹកជញ្ជូនលើសទម្ងន់ នាំឲ្យបំផ្លាញផ្លូវស្ពាននៅទូទាំងខេត្តកណ្តាលក៏ជាប្រភពចំណូលមិនចេះរីងស្ងួត ដែលលោក ម៉ឹង យូឡេង អាចរៀបចំជាកញ្ចប់ទុកជូនថ្នាក់លើដើម្បីទប់តំណែងកុំឲ្យរង្គោះរង្គើ៕
.jpg)
.jpg)
.jpg)
.png)
.jpg)
.jpg)
.jpg)
