ត្រួតពិនិត្យរថយន្តលោក ខេមរៈ សិរីមន្ត រកភ្លើងឡាហ្សែរ

សំណុំរឿងគ្រោះថ្នាក់ចរាចរណ៍ ដែលបង្កឱ្យមានការភ្ញាក់ផ្អើលគួរឱ្យ កត់សម្គាល់កន្លងមកនេះ គឺការបុករវាងរថយន្តកុងតឺន័រ និងរថយន្តរបស់តារាចម្រៀង  ខេមរៈ សិរីមន្ត  កាលពីយប់ថ្ងៃទី៧ មីនា កន្លងមកលើ កំណាត់ផ្លូវជាតិលេខ៤ ។ បើគិតមកដល់ពេលនេះគឺ មានរយៈពេលជិត៣ខែហើយ ប៉ុន្តែពន្លឺណាមួយដែលឈានដល់ ការដោះស្រាយតាមផ្លូវច្បាប់ជាមួយ ក្រុមហ៊ុនSKនៅពុំទាន់លេចចេញ ជារូបរាងនៅឡើយទេ ។

តាមមន្ត្រីសមត្ថកិច្ចបានបង្ហើបឱ្យដឹងថា នៅព្រឹកថ្ងៃទី៤ ខែមិថុនា  នៅការិយាល័យចរាចរណ៍ ជើងគោកខេត្តក្រុមការងារមួយ ក្រុមក្នុងនោះមាន កញ្ញាស៊ន លីនណា ចៅក្រមស៊ើបសួរ  និងមេធាវីរបស់តារាចម្រៀងខេមរៈ សិរីមន្ត តំណាងមន្ទីរសាធារណការ និងដឹកជញ្ជូន  និងជាងជំនាញខាងរថយន្ត បានមកធ្វើការពិនិត្យ អង្កេតរថយន្តរបស់លោកខេមរៈ សិរីមន្ត ដែលរក្សាទុកនៅស្នងការដ្ឋានដើម្បី ធ្វើការវិនិច្ឆ័យដែលភាគីក្រុមហ៊ុន និយាយថា រថយន្តរបស់តារាចម្រៀងខេមរៈ សិរីមន្ត មានភ្លើងឡាហ៊ែ្សរទើបជាហេតុ នាំឱ្យកើតមានគ្រោះថ្នាក់ចរាចរណ៍នេះ ។