អគ្គីភ័យបានបំផ្លាញផ្ទះពលរដ្ឋជាច្រើនខ្នងក្នុងភូមិឬស្សីក្នុងខណ្ឌមានជ័យ

អគ្គិភ័យបានលេបត្របាក់ផ្ទះ ប្រជាពលរដ្ឋ នៅម្តុំស្ពានដែក បណ្តោយផ្លូវលេខ ៣៧១ក្នុងភូមិឬស្សី សង្កាត់ស្ទឹង មានជ័យ ខណ្ឌមានជ័យ នាវេលាម៉ោងប្រមាណជា ៥ និង២០នាទីល្ងាចថ្ងៃអាទិត្យ ទី០៤ ខែសីហា ឆ្នាំ២០១៣ នេះ។

ប្រភពព័ត៌មានកន្លែងកើតហេតុ បានឲ្យដឹងថា ផ្ទះប្រជាពលជាច្រើនខ្នងត្រូវ អគ្គិភ័យឆាបឆេះអស់ទាំងស្រុងរហូតមកដល់ពេលនេះនៅមិនទាន់មានរបាយការណ៏ច្បាស់លាស់ណាមួយបញ្ជាក់អំពីមូលហេតុ និងចំនួននៃការខូចនៅឡើយ។

ទោះជាយ៉ាងណា ក្រុមសមត្ថកិច្ចពន្លត់អគ្គិភ័យ រួមជាមួយរថយន្តពន្លត់អគ្គិភ័យមិនតិចជាង១០គ្រឿង ត្រូវបាន បញ្ជូនទៅកាន់កន្លែងកើតហេតុដើម្បីជួយសង្គ្រោះ ដោយមានការចូលរួមអន្តរាគមន៍ពីអាជ្ញាធរ និងសមត្ថកិច្ច មូលដ្ឋានយ៉ាងញាប់ដៃញាប់ជើង។

ប្រភពបានបន្តថាយ៉ាងហោចណាស់ ផ្ទះប្រជាពលរដ្ឋ ៥-៦ខ្នងហើយ ត្រូវអគ្គិភ័យឆាបឆេះបំផ្លាញ៕