លោក កឹម វិក្រា​​ នៅតែប្រព្រឹត្តអំពើពុករលួយ នៅក្រុមហ៊ុនទូរគមនាគមន៏កម្ពុជាដូច​​​លោក​ ឡៅ​ សារឿន

 លោក កឹម វិ​ក្រា ដែលជា អនុប្រធាន បាន​ឡើងមក​កាន់តំណែង​ជា ប្រធាន​អគ្គនាយក ទូរគមនាគមន៍​កម្ពុ​ជា ជំនួស​លោក ឡៅ សារឿន ប៉ុន្តែ​មកដល់​ម៉ោង​នេះ ភាព​អសកម្ម​និង​អំពើពុករលួយ ក្នុង​អង្គភាព​នេះ នៅតែ​គ្មាន​ការកែទម្រង់​នៅឡើយ​លើសពី​ឡៅ សារឿន​ទៅទៀត ។

មន្ត្រី​ជាច្រើន​បាន​លួច​បង្ហើប​ឲ្យ​ដឹងថា លោក កឹម វិ​ក្រា កំពុងតែ​ដើរ​តាម​គន្លង​ចាស់ របស់លោក ឡៅ សារឿន ព្រោះ​គាត់​ធ្លាប់បាន​កាន់តំណែង ជា​អគ្គនាយករង ទូរគមនាគមន៍​កម្ពុ​ជា ឡើង​ដុះ​ស្លែ​ទៅហើយ គាត់​អាច​រៀនសូត្រ​តាម​បទពិសោធន៍ ក្នុងការ​ប្រព្រឹត្ត​អំពើពុករលួយ និង​បក្ខពួកនិយម​ពី​លោក ឡៅ សារឿន បាន​យ៉ាង​ល្អឥតខ្ចោះ។ ជាក់ស្តែង​កាលពីពេលថ្មីៗនេះ​លោក កឹម វិ​ក្រា បានរៀបចំ​មនុស្ស​ជំនិត​របស់ខ្លួន ឲ្យ​កាន់តំណែងល្អៗ អាច​ប្រមូល​ផលប្រយោជន៍ យកទៅ​ចែកគ្នា​ធ្វើ​មាន​ធ្វើបាន​ផ្ទាល់ខ្លួន ហើយ​មន្ត្រី​ដែល​គ្មាន​ខ្សែ​ទុយោ ត្រូវ​គាត់​ទុក​នៅ​កន្លៀត​ជញ្ជាំង។

លោក កឹម វិ​ក្រា ដែល​បាន​ស្ថិតក្នុង​ចង្កោម នៃ​សំណុំរឿង​ពុករលួយ កាលពី​ជំនាន់​លោក ឡៅ សារឿន ដ៏​សំខាន់​ម្នាក់​ផងដែរ​នោះ កំពុង​រស់នៅ​យ៉ាង​ស្តុកស្តម្ភ លើ​គំនរ​ទ្រព្យសម្បត្តិ ខណៈដែល​ចំណូល​របស់​ក្រុមហ៊ុន​ទូរគមនាគមន៍​កម្ពុជា មានការ​ធ្លាក់ចុះ​ជា​លំដាប់ ការដោះដូរ​តំណែង​លោក ឡៅ សារឿន បាន​ធ្វើឡើង​បន្ទាប់ពី មានការ​តវ៉ា​ពី​សំណាក់​និយោជិត​ប្រមាណ ២០០នាក់ ហើយ​ក្រោយមក​លោក ឡៅ សារឿន បានចេញ​លិខិត​ផ្ទេរសិទ្ធិ ឲ្យ​អគ្គនាយករង​ម្នាក់​គឺ​លោក កឹម វិ​ក្រា ទទួលខុសត្រូវ​ជំនួស​គាត់ ដោយ​បញ្ជាក់​ក្នុង​លិខិត​ថា គាត់​ជាប់រវល់​ទៅ​ព្យាបាល​ជំងឺ​វៀតណាម។ លោក កឹម វិ​ក្រា បាន​ដឹកនាំ​ស្ថាប័ន​មួយ​នេះ ច្រើន​ឆ្នាំ​មកហើយ តែ​មិនមាន​ការរីកចម្រើន​ទេ។

ចំពោះ​ប្រាក់​អត្ថប្រយោជន៍ផ្សេងៗ ជា​រៀងរាល់ឆ្នាំ​គឺ​បុគ្គលិក ត្រូវតែ​ទទួលបាន ២០ ភាគរយ​នៃ​ការលើកទឹកចិត្ត ឬមួយ​ក៏​លុយ​អតីតភាព​ការងារ ដែល​រាជរដ្ឋាភិបាល​ផ្តល់​ឲ្យ​បុគ្គលិក​និយោជិត ក៏ត្រូវ​ថ្នាក់លើ កេងប្រវ័ញ្ច​ទុកជា​ប្រយោជន៍​ផ្ទាល់ខ្លួន មិនបាន​បើក​ឲ្យ​បុគ្គលិក​នោះទេ។

អង្គភាព​ប្រឆាំង​អំពើពុករលួយ បាន​ស៊ើបអង្កេត​ករណីនេះ ប៉ុន្តែ​មិនទាន់មាន​ចំណាត់ការ លើ​ជន​ពុករលួយ​នៅឡើយ​ទេ៕