កញ្ញា​ ចរិយាពេជ្រ ត្រូវបុរសអាណិកជនខ្មែរនៅអូស្ត្រាលីតាមស្រលាញ់

បន្ទាប់​ពីដណ្តើម​បាន​តំណែង​តួឯក​រឿង “ល្បង​ស្នេហ៍​ពិសោធ​ចិត្ត” របស់​ស្ថានីយ​ទូរទស្សន៍​បាយ័​​ព័ត៌មាន ចរិយា ពេជ្រ កំពុង ទទួល​ការ​ចាប់​អារម្មណ៍​ពី​ទស្សនិក​​ជន​​ខ្មែរ ទាំង​ក្នុង និង​ក្រៅ​ប្រទេស​។
ថ្មីៗ​នេះ មាន​ព័ត៌មាន​លេច​ឮពី​ចង្កោម​សិល្បៈ ថា មាន​បុរស​អាណិក​ជន​ខ្មែរ រស់​នៅ​អូស្ត្រាលី តាម​ស្រលាញ់​ចរិយា ពេជ្រ ព្រម​ទាំង​បាន​ឧបត្ថម្ភ​ប្រាក់ ឱ្យ​នាង​បើក​សម្អាង​ការ។

ចរិយា ពេជ្រ បានហក់ចូលសិល្បៈ តាមរយៈការប្រលងកញ្ញាឯក​ប៊្រីដស្តូន  របស់ស្ថានីយទូរទស្សន៍​ខ្មែរ ប៉ុស្តិ៍លេខ៩ ហើយបានជាប់ជា​ជ័យ​លាភីលេខ២ ប្រចាំឆ្នាំ២០១១។ ក្រោយមក ចរិយា ពេជ្រ បានចូល​ថត​ភាពយន្ត​ឱ្យស្ថានីយទូរទស្សន៍​អាស៊ី​អាគ្នេយ៍ ចំនួន២រឿង គឺ “ឧត្តមដួងចិត្ត” និង “រាជិនីបញ្ចពណ៌” ដែលទាំងពីររឿងនោះ នាងទទួលបានត្រឹមជាតួរង និងពុំទាន់ទទួលបានផ្លែផ្កាក្នុង អាជីពដែល​នាង​ទើប​នឹងឈោងចាប់នេះឡើយ។

ចរិយា ពេជ្រ បានបន្តដំណើរទៅស្ថានីយទូរទស្សន៍My TV ដោយចូលសម្តែងជាក្រុមរឿងខ្លី ដែលតែងនិពន្ធនិងដឹកនាំរឿង ដោយលោកសុវណ្ណ ប្ញទ្ធី ហៅលោកតា វ៉ិចទ័រ ក្នុង​កម្មវិធី “តន្ត្រី My TV” រាល់ថ្ងៃសុក្រ។ ទស្សនិកជនបានស្គាល់ចរិយា ពេជ្រ ជាបណ្តើរៗ ហើយនាងត្រូវបាន ស្ថានីយទូរទស្សន៍បាយ័នព័ត៌មាន ហៅថតភាពយន្ត ក្នុងតំណែង​ជា​តួឯក រឿង “ល្បងស្នេហ៍ ពិសោធចិត្ត” ដែលគ្រោងចាក់ផ្សាយបន្ទាប់ពីរឿង “ពន្លកស្នេហ៍ក្បែរជាយដែន”។

តាមរយៈការសម្តែងរឿងខ្លី នៅស្ថានីយទូរទស្សន៍My TVចរិយា ពេជ្រ បាន ធ្វើឱ្យទស្សនិកជនមានចំណាប់អារម្មណ៍លើទេពកោសល្យសម្តែងរបស់នាង។ ប៉ុន្តែ ថ្មីៗនេះ ទស្សនិកជន​មានការភ្ញាក់ផ្អើលយ៉ាងខ្លាំង នៅពេលឃើញតារាសម្តែងចរិយា ពេជ្រ មានភាពហ៊ឺហាប្លែក ព្រោះនាងមានរថយន្តជិះផ្ទាល់ខ្លួន និងបានបើកសម្អាងការ មួយ នៅម្តុំរោងកុនលុច្ស គឺសម្អាងការ “ចរិយា ពេជ្រ”។

ទស្សនិកជនមួយចំនួន ឆ្ងល់ថា តើចរិយា ពេជ្រ បានប្រាក់ពីណាមក មកបើកសម្អាងការ ដែលចំណាយទុនរាប់ម៉ឺនដុល្លារ ខណៈដែលនាង ចូលសិល្បៈ មិនទាន់បាន​២ឆ្នាំស្រួលបួលផងនោះ?

ប្រភពព័ត៌មានមួយ ចេញពីក្រុមសម្តែងរបស់ស្ថានីយទូរទស្សន៍ My TVបានឱ្យដឹងថា ចរិយា ពេជ្រ សព្វថ្ងៃមានភាពហ៊ឺហា ដោយសារ មានបុរសអាណិកជនខ្មែរ រស់នៅ​ប្រទេស​អូស្ត្រាលី បានទាក់ទងសុំស្នេហ៍ ហើយបុរសនោះ មានវ័យជាង៣០ប្លាយឆ្នាំ ជាអ្នកជំនួញឆ្លងប្រទេស ដែល មានទ្រព្យសម្បត្តិស្តុកម្នាក់ និងមានក្រុមហ៊ុនរកស៊ី​បណ្តាក់​ទុន នៅប្រទេសកម្ពុជា ផងដែរ។ បុរសអាណិកជននោះ តែងទៅមកស្រុកខ្មែរ និងប្រទេសអូស្ត្រាលី ហើយ តែងស្កាត់មកជួបជាមួយចរិយា ពេជ្រ ដល់ស្ថានីយ​ទូរទស្សន៍ My TVទៀតផង ដោយ ពួកគេទាំងពីរមានភាពស្និទ្ធស្នាលនឹងគ្នាដូចគូស្នេហ៍...។

ប្រភពព័ត៌មានមួយទៀត ចេញពីអ្នករស់នៅម្តុំរោងកុនលុច្ស បានឱ្យដឹងថា គេតែងសង្កេតឃើញ ចរិយា ពេជ្រ ជិះរថយន្តLexus 470 ពណ៌ខ្មៅ ជាមួយបុរសម្នាក់ ប៉ុន្តែ ពុំមានអ្នកស្គាល់បុរសនោះ ថា ជាអ្នកណាទេ។ ប៉ុន្តែ បើតាមការសង្កេតមើលទៅ បុរសនោះមានសម្បុរ-ស និង ទំនងដូចជា អ្នកជំនួញទ្រព្យស្តុកម្នាក់ ដែលគេសង្ស័យថា ជាអ្នកជួយឧបត្ថម្ភចរិយា ពេជ្រ បើកហាងសម្អាងការ។

ចរិយា ពេជ្រ បានប្រាប់ឱ្យដឹងថានាងពុំមានបុរសណាឧបត្ថម្ភប្រាក់បើក សម្អាងការនេះទេ ហើយ​នាងក៏មិនត្រូវការប្រាក់ពីបុរសណាឡើយ។ ប៉ុន្តែ នាងពិតជាមានបុរសអាណិកជន តាមសុំស្នេហ៍មែន តែនាងសុំលាក់ទុកសិន។

ចរិយា ពេជ្រ បញ្ជាក់ថា “ហាងសម្អាងការ ដែលមានឈ្មោះខ្ញុំនោះ គឺជារបស់បងស្រីខ្ញុំទេ គាត់បានយកឈ្មោះខ្ញុំជាតារា ដើម្បីឱ្យគេស្គាល់ ហើយហាងនោះ គឺចំណាយប្រាក់​អស់​ជាង ៥ម៉ឺនដុល្លារ ដែលជាប្រាក់គាត់សុទ្ធសាធ!”។

តារាសម្តែងវ័យទើបតែ១៩ឆ្នាំរូបនេះ បន្តថា “តាមពិត មានបុរសអាណិកជន ម្នាក់ ទាក់ទងសុំស្នេហ៍នាងខ្ញុំមែន ប៉ុន្តែ គេមិនបានជួយឧបត្ថម្ភអ្វីឱ្យខ្ញុំទេ ហើយខ្ញុំក៏ មិនទាន់​សម្រេច​ចិត្តថា ព្រមទទួលស្នេហ៍គាត់ដែរ អ្វីៗស្ថិតនៅធម្មតា គ្រាន់តែខ្ញុំរាប់អានគាត់ ធម្មតាប៉ុណ្ណោះ!”៕