ពេជ្រ សេរី​រ័ត្ន ពពោះ​កូន​ជិត​គ្រប់​ខែ​ដោយ​គ្មាន​ប្តី​?

នៅមិនទាន់មានភាពប្រាកដប្រជា១០០ភាគរយ នៅឡើយ ចំពោះការបែកធ្លាយព័ត៌មានជាហូរហែ និងត្រូវបណ្តាញសារព័ត៌មានក្នុងស្រុកធ្វើការ ចុះផ្សាយជាថ្មីបន្តបន្ទាប់ជុំវិញការពពោះ របស់អតីតពិធីការិនីស្ថានីយទូរទស្សន៍បាយ័ន នាង ពេជ្រ សេរីរ័ត្ន ខណៈដែលនាងមិនទាន់មានស្វាមី នៅឡើយនោះ ហើយបែរជាពពោះជិតដល់ពេលឆ្លងទន្លេនោះ។

មួយរយៈចុងក្រោយនេះ ព័ត៌មានជុំវិញការមានផ្ទៃពោះជិតគ្រប់ខែរបស់អតីតពិធីការិនីនាង ពេជ្រ សេរីរ័ត្ន ត្រូវបានបណ្តាញសារព័ត៌មានជាច្រើនបានរំលើកមកធ្វើការចុះផ្សាយ ដោយថែមទាំងមានការអះអាងស្ទើរច្បាស់លាស់១០០ភាគរយថា នាងប្រាកដជាមានផ្ទៃពោះមិនអាចប្រកែកបានមែន។ ព័ត៌មានមួយចំនួនថែមទាំងបានធ្វើការបញ្ជាក់យ៉ាងច្បាស់ក្រឡែតថា កូនក្នុងផ្ទៃរបស់ពេជ្រ សេរីរ័ត្ន ជាកូនប្រុសថែមទៀតផង។ ភាពលេចធ្លាយនូវរឿងអាស្រូវមានផ្ទៃពោះមុនមានស្វាមីរបស់អតីតអ្នកបម្រើការងារផ្នែកទូរទស្សន៍បាយ័នរូបនេះ ត្រូវបានសារព័ត៌មានទាំងនោះ ធ្វើការអះអាងថាបានទទួលមកពីអ្នករស់នៅជិតខាងរបស់ ពេជ្រ សេរីរ័ត្ន ដែលរស់នៅអាគារវីឡាភ្លោះក្នុងបុរីពភពថ្មី។

រីឯប្រភពមួយចំនួនទៀតដែលបានអះអាងថា ពេជ្រ សេរីរ័ត្ន មានផ្ទៃពោះនោះ មានដូចជាអ្នកផ្សារសិនជូរី ម្តុំពោធិ៍ចិនតុង ខណៈដែលគេបានឃើញម្តាយរបស់ ពេជ្រ សេរីរ័ត្ន បានដើរទិញពងក្ងានដោយអះអាងប្រាប់គេថា ទិញយកទៅឲ្យកូនស្រីរបស់ខ្លួនដែលកំពុងមានផ្ទៃពោះដើម្បីញាំទៅឲ្យកូននៅក្នុងផ្ទៃកើតមកមានភាពឆ្លាតវៃ ដែលគេនឹកភ្នកថា អ្នកមានផ្ទៃពោះនោះអាចជា ពេជ្រ សេរីរ័ត្ន ឬក៏ ជីជី ប៉ុន្តែគេបានដាក់បន្ទុកថា អ្នកមានផ្ទៃពោះនោះអាចជា ពេជ្រ សេរីរ័ត្ន ច្រើនជាង ព្រោះ ជីជី នៅចេញមុខយ៉ាងធម្មតានៅលើកញ្ចក់ទូរទស្សន៍ ខណៈ ពេជ្រ សេរីរ័ត្ន បានសម្ងំស្ងាត់បាត់ជ្រងំខ្លួននោះ។

ប្រភព៖ ភ្នំពេញប៉ុស្តិ៍