ព្រៃលិចទឹកដែលជាជម្រកត្រីពងកូនបន្តពូជនៅរដូវវស្សាស្ថិតក្នុងតំបន់បី ដែលជាក្តីសង្ឃឹមរបស់រដ្ឋាភិបាល និងប្រជារាស្ត្រខ្មែរ ត្រូវបានក្រុមឈ្មួញ អ្នកមានលុយ មានអំណាច រំលោភបំពានជាហូរហែ ដោយប្រើគ្រឿងចក្រ ឈូសឆាយ កាយដុតកំទេច ធ្វើជាដីស្រែ ជីកស្រះ កាយយកអាចម៌ដីលក់ ឬយកអាចម៌ដីចាក់បំពេញធ្វើដីឡូទ៍ ជាបន្តបន្ទាប់ឥតឈប់ឈរ នៅក្នុងខេត្តសៀមរាប។
គ្រឿងចក្រ៩គ្រឿងបើគិតទាំងអេស្កាវ័តធ័រ អាប៊ុល និងឡានដឹកដី ដែលលោក ហាក់-សេង បានជួលអោយមកឈូសឆាយកាយព្រៃលិចទឹកមួយកន្លែងស្ថិតក្នុងភូមិវាល សង្កាត់ជ្រាវ ក្រុងសៀមរាប តាំងពីថ្ងៃទី១១ ខែមិនា ឆ្នាំ២០១៨មកម្លេះ។
ជាក់ស្តែងកាលពីថ្ងៃទី១២ មិនាម្សិលមិញ កម្លាំងខាងមន្ទីរបរិស្ថាន ជលផល ប៉ូលីសក្រុង ប៉ូលីសសង្កាត់ជ្រាវ បានចុះទៅដល់កន្លែងកើតហេតុ ធ្វើរបាយការណ៍ជូនថ្នាក់លើ តែខាងថៅកែគ្រឿងចក្រ និងម្ចាស់ដីមិនចូលខ្លួនសហការណ៍នោះទេ ហើយថែមទាំងមិនព្រមដកគ្រឿងចក្រចេញពីកន្លែងឈូសឆាយទៀតផង បន្ទាប់មកក្រុមសមត្ថកិច្ចបានដកថយ ដោយខាងប៉ូលីសបានប្រាប់ថា ប្រគល់អោយខាងបរិស្ថាន ឯខាងបរិស្ថានឆ្លើយថា ថ្នាក់លើអោយដកថយមកវិញ រងចាំធ្វើលិខិតកោះហៅថៅកែគ្រឿងចក្រ និងលោក ហាក់-សេង អោយទៅជួបនៅមន្ទីរបរិស្ថានខេត្តសៀមរាប។
នៅព្រឹកថ្ងៃទី១៣ ខែមិនា ឆ្នាំ២០១៨នេះ លោក សឿន-សេន ប្រធានការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋានខេត្តសៀមរាប បានដឹកនាំកម្លាំង ចុះត្រួតពិនិត្យ ដីព្រៃដែលលោក ហាក់-សេង ជួលអោយគេឈូសឆាយអស់ជិតមួយហិកតាកាលពីថ្ងៃទី១១។ នៅរសៀលម៉ោង២និង៤៩នាទី ថ្ងៃទី១៣ដដែលនេះ លោក សឿន-សេន បានប្រាប់តាមទូរស័ព្ទថា លោកបានប្រមូលគ្រឿងចក្រដាក់មួយដុំជុំគ្នា ហើយលោកបានប្រគលការងារខាងលើនេះ អោយទៅខាងជំនាញដូចជា មន្ទីរបរិស្ថាន ជលផល និងខាងធនធានទឹក ធ្វើការបន្ត ព្រោះវាត្រូវនិងជំនាញរបស់គេ។ លោក សឿន-សេន បានបន្ថែមថា មិនមែនថាខាងលោកធ្វើមិនកើតនោះទេ តែមិនចង់លូកលានទៅលើការងារដែលជាជំនាញរបស់គេ។
ពលរដ្ឋនៅក្នុងសង្កាត់ជ្រាវនាំគ្នាឆ្ងល់ថា តើអ្នកដែលហ៊ានជួលគ្រឿងចក្រមកឈូសយកដីព្រៃលិចទឹកនេះមានខ្សែ មានខ្នងធំប៉ុណ្ណាដែរ បានជាហ៊ានបំពានច្បាប់យ៉ាងដូច្នេះ? ការឆ្ងល់នេះពិតជាត្រឹមត្រូវណាស់ មានមនុស្សបីបួននាក់បានបង្ហើបប្រាប់កម្ពុជាសុវណ្ណភូមិថា លោក ហាក់-សេង គឺជាអ្នកមានលុយមានអំណាចម្នាក់នៅក្នុងខេត្តសៀមរាប លោកមានផ្ទះលក់គ្រឿងឡាននៅជិតផ្សារសាមគ្គី ហើយមានផ្ទះល្វែងជួលរាប់សិបខ្នង នៅតាមផ្លូវក្រវ៉ាត់ក្រុង មានហាងបញ្ចាំ មិនតែប៉ុណ្ណោះលោកជា ដន្លងជាមួយឯកឧត្តម ម៉ន-សាម៉ុន ដែលជាអតីតមេបញ្ជាការកងរាជអាវុធហត្ថខេត្តសៀមរាបថែមទៀតផង។
មានពាក្យសង្ឃពាក្យសត្វតាមតៀមកាហ្វេដែលមិនមែនជាផ្លូចការណ៍បាននិយាយតៗគ្នាថា លោក ហាក់-សេង មិនដកគ្រឿងចក្រចេញពីកន្លែងឈូសឆាយទេ គាត់សម្រេចចិត្តថាត្រូវតែឈូសឆាយអោយបានសម្រេចបើទោះបីជាត្រូវចំណាយលុយអស់ប៉ុន្មានក៏ដោយ។ ក្រុមពួកមាត់ចាបមាត់ព្រាបនិយាយទៀតថា លោកហាក់សេង កំពុងដើររកខ្សែ រកខ្នងដើម្បីទប់ទល់កុំអោយមេឃបាក់សង្កត់។
ជាក់ស្តែងរយៈពេលបីថ្ងៃនេះគ្មានសមត្ថកិច្ចណាអាចជួបនិយាយជាមួយលោកហាក់សេងបានទេ ដោយទូរស័ព្ទខលចូល តែមិនលើកទទួល ចំណែកកម្ពុជាសុវណ្ណភូមិក៏មិនអាចសុំការបកស្រាយពីលោក ហាក់-សេង បានដែរព្រោះនៅម៉ោង៣និង៥០នាទីរសៀលថ្ងៃទី១៣ មិនានេះខលទូរស័ព្ទទៅលោក ហាក់-សេង ចូលតែមិនមានអ្នកលើកទទួលផងដែរ។
ប្រជាពលរដ្ឋនៅសង្កាត់ជ្រាវពោលថា ពួកគាត់សោកស្តាយព្រៃលិចទឹក ដែលលោក ហាក់-សេង ប្រើគ្រឿងចក្រអោយឈូសឆាយខាងលើនេះ ហើយពួកគាត់សង្ឃឹមថា ឯកឧត្តម ឃឹម-ប៊ុនសុង អភិបាលខេត្តសៀមរាប និងលោក កើត វណ្ណរ៉េត ព្រះរាជអាជ្ញាសាលាដំបូងខេត្តសៀមរាប ច្បាស់ជាចាត់វិធានការតាមផ្លូវច្បាប់ជាក់ជាមិនខាន បើទោះជាលោក ហាក់-សេង នេះមានលុយ មានខ្នងមានខ្សែធំយ៉ាងណាក៏ដោយ៕ ដោយ៖ ផ្លុង-រ៉េត
.jpg)
.jpg)
.jpg)
.jpg)
.jpg)
.jpg)
.jpg)
.png)
.jpg)
.jpg)
.jpg)
.jpg)
