បទបញ្ជាររបស់សម្ដេច ហ៊ុន សែន គ្មានឥទ្ធិពលចំពោះ អាជ្ញាធរមូលដ្ឋាន សមត្ថកិច្ច និងមន្ត្រីជំនាញ

សម្ដេចអគ្គមហាសេនាបតីតេជោ ហ៊ុន សែន តែងតែប្រកាសក្តែងៗទៅដល់មន្ត្រីជំនាញក្រោមឱវាទគ្រប់ជាន់ថ្នាក់ទាំងអស់ ឲ្យខិតខំទប់ស្កាត់នូវរាល់សកម្មភាពបទល្មើសព្រៃឈើ ធនធានធម្មជាតិអោយខានតែបាន តែផ្ទុយទៅវិញ អនុសាសន៍នៃបទបញ្ជារ របស់សម្ដេចតេជោ ហ៊ុន សែន ហាក់បីដូចជាគ្មានឥទ្ធិពលអ្វីបន្តិចសោះចំពោះអាជ្ញាធរ សមត្ថកិច្ច និងមន្ត្រីជំនាញ នៅក្នុងមូលដ្ឋាន ឃុំអូរស្វាយ ស្រុកត្រពាំងប្រាសាទ ខេត្តឧត្ដរមានជ័យ។

ជាក់ស្ដែងជារៀងរាល់ថ្ងៃ មានពួកឈ្មួញឈើដុះស្លែជើងខ្លាំងជាច្រើន បានគៀងគរប្រជាពលរដ្ឋ ឲ្យធ្វើការលួចឆ្លងដែនឡើងលើភ្នំចូលទៅអាកាប់ និងស្ពាយឈើគ្រញូងនៅក្នុងទឹកដីប្រទេសថៃ យកមកលក់ឲ្យពួកគេ ដោយដើរឆ្លងចូលទៅតាមច្រកជាច្រើនដូចជា ច្រកក្បាលអូរស្វាយ ច្រកថ្មប្រេះ ច្រកអូរខ្សាច់ ច្រកឈើទាលជ្រុំ និងច្រកចំបក់កោង ស្ថិតនៅក្នុងភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្ដរមានជ័យ តែមិនដែលឃើញមានការទប់ស្កាត់និងបង្ក្រាប ពីសំណាក់អស់លោកអាជ្ញាធរមូលដ្ឋាន សមត្ថកិច្ច និងមន្ត្រីជំនាញណាសោះ សង្ស័យតែសមត្ថកិច្ចទាំងអស់នោះ មានការត្រូវរូវជាមួយពួកក្រុមឈ្មួញឈើទាំងនេះអស់ហើយក៏មិនដឹង ទើបបានជាមិនដែលឃើញមានការទប់ស្កាត់បង្ក្រាបសោះអញ្ចឹង និងបណ្ដោយឲ្យប្រជាពលរដ្ឋ ធ្វើការឡើងចុះស្ពាយឈើគ្រញូងដោយសេរីយ៉ាងអនាធិបតេយ្យ ដោយមិនខ្ចីគិតពីសុខទុក្ខសុវត្ថិភាព និងការប្រឈមមុខនិងហានិភ័យនៃគ្រោះថ្នាក់របស់ប្រជាពលរដ្ឋឡើយ ទង្វើអសកម្មរបស់អស់លោកមន្ត្រីទាំងអស់នេះហើយ ដែលជាការផ្គើនប្រឆាំងទៅនិងបទបញ្ជាររបស់សម្ដេចតេជោ ហ៊ុន សែន យ៉ាងច្បាស់ក្រឡែត។

សូមបញ្ជាក់ផងដែរថា ជាច្រើនឆ្នាំកន្លងមកនេះ មានប្រជាពលរដ្ឋជាច្រើននាក់បានទទួលរងនូវគ្រោះថ្នាក់ ដោយសាតែការលួចឆ្លងដែនចូលទៅក្នុងទឹកដីថៃ កាប់និងស្ពាយឈើគ្រញូង ខ្លះត្រូវទាហានថៃចាប់ខ្លួនដាក់គុក អ្នកខ្លះទៀតត្រូវបានបាត់ខ្លួនរកមិនឃើញ និងអ្នកខ្លះទៀតត្រូវបានទាហានថៃបាញ់សម្លាប់ ស្លាប់បាត់បង់ជីវិតយ៉ាងអាណោចអាធម្មជាទីបំផុត ចោលសាច់ញាតិ ក្រុមគ្រួសារ ឪពុកម្ដាយ បងប្អូន ប្រពន្ធកូន ឲ្យរស់នៅកំព្រាវេទនាខ្លោចផ្សាខ្លាំងណាស់ តើករណីទាំងអស់នេះកើតឡើងមកពីដោយសាតែអ្វី? សូមសម្ដេច ទ្រង់ឯកឧត្ដម លោកជំទាវ ព្រមទាំងពុកម៉ែបងប្អូនប្រជាពលរដ្ឋទាំងអស់គ្នា ទូទាំងប្រទេសជួយគិតពិចារណាទៅតាមការគួរ។

ជាចុងក្រោយក្នុង​នាម​ខ្ញុំជាពលរដ្ឋខ្មែរ សូមអំពាវនាវទៅដល់ ឯកឧត្តម ស ថាវី អភិបាល​ខេត្តឧត្តរមានជ័យ នាយខណ្ឌរដ្ឋបាលព្រៃឈើខេត្តឧត្តរមានជ័ួ និង​សម្ដេចអគ្គមហាសេនាបតីតេជោ ហ៊ុន សែន សូមសម្ដេចជួយចាត់ការក្ដៅចំពោះ អាជ្ញាធរមូលដ្ឋាន សមត្ថកិច្ច និងមន្ត្រីជំនាញប្រចាំនៅឃុំអូរស្វាយ ស្រុកត្រពាំងប្រាសាទ ខេត្តឧត្ដរមានជ័យផងទាន ព្រោះសកម្មភាព ប្រជាពលរដ្ឋឡើងទៅកាប់​ឈើគ្រញូង នៅតែមានសកម្មភាពបន្តឥតស្រាកស្រាន ជារៀងរាល់ថ្ងៃដូចភ្លៀងរលឹមមិនដែលខានឡើយ និងដើម្បីជៀសវាងកុំឲ្យប្រជាពលរដ្ឋមានគ្រោះថ្នាក់ដោយប្រការណាមួយ។​ដោយ៖ ម៉េង ឈិនចិន