នៅលើលោកនេះគ្មានអ្វីទៀងទាត់នោះទេ ជីវិត កើតចាស់ឈឺស្លាប់ វាជាច្បាប់របស់ធម្មជាតិទៅហើយ តែក៏មានរឿងរ៉ាវអកុសល្យខ្លះ ធ្វើអោយជីវិតមនុស្សរស់ពិបាកជាងស្លាប់ទៅទៀត ដូចជាលោកគ្រូភ្លេងម្នាក់ពិការភ្នែកទាំងសងខាង មានជីភាពក្រលំបាក ហើយថែមទាំងជំពាក់ប្រាក់ធនាគារជាច្រើនទៀតផង។
លោក កេត ចន្ត្រា មានវ័យជាងហាសិបឆ្នាំ អតីតជាគ្រូភ្លេងសម័យ មានស្រុកកំណើតនៅឯខេត្តកណ្តាល បច្ចុប្បន្នរស់នៅ ភូមិបុស្សក្រឡាញ់ សង្កាត់ជ្រាវ ក្រុងសៀមរាប ខេត្តសៀមរាប និងមានឧត្តមភរិយាម្នាក់ឈ្មោះ នួន សាមិន ដែលជាអតីតអ្នកចម្រៀងសម័យ ហើយមានកូនពីរនាក់ប្រុសម្នាក់ស្រីម្នាក់។
រសៀលម៉ោងប្រាំសូរិយារៀបអស្តង្គត់ ថ្ងៃទី១៣ ខែតុលា ឆ្នាំ២០១៩ ក្បែខ្ទមស្បូវដ៏កម្សត់មួយ លោកគ្រូ កេត ចន្ត្រា បានរៀបរាប់ប្រាប់ ចាងហ្វាងកាសែតកម្ពុជាសុវណ្ណភូមិ ទាំងទឹកភ្នែករលីងរលោកថា លោកស្រលាញ់វិស័យសិល្បៈ តាំងតែពីក្មេង រហូតដល់សម័យប៉ុលពត លោកចេះដេញហ្គីតា អោយប៉ុលពតស្តាប់ ដល់សម័យចប់សង្គ្រាម លោកដេញហ្គីតា តាមភូមិដើម្បីប្តូរបាយ ប្តូរយកអង្ករសម្រាប់ចិញ្ចឹមជីវភាពគ្រួសារ លុះដល់ឆ្នាំ១៩៨៦ លោកបានក្លាយជាគ្រូភ្លេង បង្រៀនសិស្សអោយចេះដេញហ្គីតា។ លោកគ្រូបានបន្តថា គ្រោយមកលោកបានបង្រៀនសិស្សជាច្រើននៅប្រទេសកម្ពុជាដូចជានៅ ខេត្តបាត់ដំបង ខេត្តសៀមរាប ខេត្តកំបង់ធំ និងសិស្សមកពីខេត្តនានាទៀតផង មិនតែប៉ុណ្ណោះលោកគ្រូធ្លាប់បានទៅប្រលងភ្លេងយកពានរង្វាន់នៅឯប្រទេសថៃផងដែរ តែសម័យនោះគ្មាន ទូរទស្សន៍ គ្មានបណ្តាញសង្គម សម្រាប់ចាក់ផ្សាយដូចសពថ្ងៃនេះទេ។ លោកគ្រូក៏ធ្លាប់ចូលរួមលេងភ្លេងនៅរាជធានីភ្នំពេញ ហើយធ្លាប់បានលេងអោយផលិតកម្ម SM KSM និងនៅតាមឆាកផ្សេងៗ ទាំងនៅរាជធានី តាមបណ្តាខេត្ត និងនៅតាមសណ្ឋាគារក្នុងក្រុងសៀមរាប។ លុះដល់ឆ្នាំ២០១២ លោកគ្រូបានងងឹតភ្នែក បន្ទាប់ពីបកភ្នែករួច ហើយតាំងពីពេលនោះមកស្បៃអន្ធកាលបានឈានចូលមកក្នុងជីវិតលោកគ្រូ និងក្រុមគ្រួសារ។ និយាយទាំងអួលដើមក ហែហមអមជាមួយទឹកភ្នែករលីងរលោង លោកគ្រូវបានប្រាប់ទៀតថា ”លោកគ្រូអស់សង្ឃឹមក្នុងជីវិតហើយ កាលពីងងឹតភ្នែកដំបូង លោកគ្រូចង់សម្លាប់ខ្លួន តែអ្នកគ្រូ (ភរិយា) អង្វអោយលោកគ្រូខំរស់បន្តទៀត លោកគ្រូបានយកប្លង់ដីទៅបញ្ចាំធនាគារជាងបីម៉ឺនដុល្លារអាមេរីក និងខ្ចីលុយបងប្អូនកូនចៅអស់ជាច្រើនថែមទៀត ដើម្បីស្វែងរកពេទ្យព្យាបាលភ្នែក តែជាអកុសល្យ ភ្នែកក៏មិនជា ធនាគារក៏ជំពាក់ មុខរបរក៏គ្មាន តើអោយលោកគ្រូសង្ឃឹងអីទៀត រាល់ថ្ងៃបានព្រឹកខ្វះល្ងាច សង្ឃឹមលើអ្នកគ្រូ លក់ម្អូបអាហារនៅផ្ទះ ថ្ងៃខ្លះបាន ថ្ងៃខ្លះក៏អត់ បានអ្នកស្គាល់ ហើយអតីតកូនសិស្ស គេមកជួយទិញម្ហូប ហើយអោយលោកគ្រូដេញហ្គីតា អោយពួកគាត់ស្តាប់ ពួកគាត់បានជូនថវិការលោកគ្រូ ខ្លះប្រាំដុល្លារ ខ្លះដប់ដុល្លារ គ្រាន់ទិញចំណីអោយមាន់ អោយក្ងាន ទុកលក់បានកម្រៃខ្លះ តែលោកគ្រូមិនដឹងជាវេទនាដល់ពេលណាទេ“។
រីឯអ្នកគ្រូ នួន សាមិន ដែលជាឧត្តមភរិយារបស់លោកគ្រូ កេត ចន្ត្រា បានរៀបរាប់ថា គាត់ធ្លាប់ប្រលងជាប់លេខ១ផ្នែកចម្រៀងសម័យនៅខេត្តបាត់ដំបងតាំងពីឆ្នាំ ១៩៨៧មកម្លេះ កាលនោះអ្នកគ្រូមានអាយុទើបតែ១៧ឆ្នាំ។ ក្រោយៗមកអ្នកគ្រូវបានក្លាយអ្នកចម្រៀងប្រចាំខេត្តបាត់ដំបង និងធ្លាប់បានទៅច្រៀងនៅក្រសួងមហាផ្ទៃ អោយសម្តេច ទ្រង់ឯកឧត្តមស្តាប់ ជាពិសេសអ្នកគ្រូធ្លាប់ច្រៀងអោយសម្តេចហ៊ុនសែនស្តាប់ទៀតផង រហូតដល់សម្តេចពេញចិត្ត ហើយមានប្រសាសន៍ថា ”ច្រៀងក៏ពិរោះ រូបសម្ភស្សក៏បាន ដាក់ឈ្មោះ នួន សាមិន មិនពិរោះទេ ដូរដាក់ កូលាបបាត់ដំបងវិញទៅបានពិរោះ“។ បទចម្រៀងដែលអ្នកគ្រូបានច្រៀងមានច្រើនបទ តែកាសែត កម្ពុជាសុវណ្ណភូមិបានដកស្រង់ខ្លះៗពី យូធូប (YouTube) មានដូចជា បទ ផ្គរលាន់គគ្រឹគ បទកម្លោះប្រពន្ធបួន បទសត្វចាបយំចេប បទចង់បានប្តីក្មេង និង បទផ្កាកប្បាស ជាដើម។
លោកគ្រូ កេត ចន្ត្រា និង អ្នកគ្រូ នួន សាមិន បានលើកម្រាមដៃ១០ អំពាវនាវដល់សម្តេច ទ្រង់ ឯកឧត្តម លោកជំទាវ ពុកម៉ែបងប្អូន លោកតាលោកយាយ សប្បុរសជនទាំងក្នុងនិងក្រៅប្រទេស ជាពិសេស សម្តេចតេជោ ហ៊ុន សែន និងសម្តេចគតិព្រឹទ្ធបណ្ឌិត ប៊ុនរ៉ានី ហ៊ុនសែន មេត្តាជួយពួកគាត់ផង ព្រោះពេលនេះពួកគាត់មានទុក្ខលំបាកជាពន់ពេក ភ្នែកក៏ពិការ មុខរបរក៏គ្មាន ថែមទាំងជំពាក់លុយធនាគារ ជាងបីម៉ឺនដុល្លារអាមេរីក ទៀតផង៕ ដោយ៖ ផ្លុង រ៉េត
.jpg)
.jpg)
.jpg)
.png)
.jpg)
.jpg)
