ភ្នំគូលេនជារម្មណីយ៍ដ្ឋានវប្បធម៌ធម្មជាតិដ៏ល្បីល្បាញដែលពោពេញទៅដោយព្រៃព្រឹក្សាអ្នកតាវល្លិ៍ បក្សាបក្សី ម្រឹគីម្រឹគា សំលេងទឹកជ្រោះទ្រគោះលើថ្ម លាន់លឺឈូឆលម្អភ្នែកញាតិ និងជាទីសក្ការ:បូរជាសម្រាប់អ្នកមានជំនឿខាងព្រះពុទ្ធសាសនា និងព្រហ្មញសាសនា ដែលមានការគាំទ្រពីភ្ញៀវទេសចរណ៍ជាតិ និងភ្ញៀវទេសចរណ៍អន្តរជាតិ ឥឡូវក្លាយជាទីកន្លែងដែលមានហានីភ័យខ្ពស់ព្រោះតែការដ្ឋានបូមខ្សាច់ក្បែរជើងភ្នំប្រវត្តិសាស្ត្រមួយនេះ។
ការដ្ឋានបូមខ្សាច់មួយកន្លែងស្ថិតក្នុងភូមិស្គន់ ឃុំត្បែង ស្រុកបន្ទាយស្រី ខេត្តសៀមរាប ដែលអាជ្ញាធរ មន្ត្រីមន្ត្រីជំនាញ និងម្ចាស់ការដ្ឋាន ឆ្លើយផ្សេងៗពីគ្នា ចំពោះច្បាប់អនុញ្ញាតប្រកបអាជីវកម្មនៅទីនោះបូមខ្សាច់នៅទីនោះ។
កាលពីថ្ងៃទី០២ ខែកក្កដា ឆ្នាំ២០២១ អ្នកយកពត៌មានឱ្យ កាសែតកម្ពុជាសុវណ្ណភូមិ បានចុះទៅដល់ការដ្ឋានបូមខ្សាច់ខាងលើ ផ្តិតយករូបភាពបានបួនប្រាំសន្លឹកទាំងការភ័យខ្លាចព្រោះម្ចាស់ការដ្ឋាននៅទីនោះបានគំរាមកំហែងថា ហេតុអ្វីចូលដល់ការដ្ឋានគេដោយគ្មានការអនុញ្ញាត បែបនេះ ព្រោះការដ្ឋានគេមានច្បាប់ត្រឹមត្រូវ។ បន្ទាប់មកក្រុមអ្នកសារពត៌មានបានត្រឡប់មកផ្ទះលោក ឃី សុខុម មេភូមិស្គន់ ពេលនោះលោកមេភូមិប្រាប់ថា ”ការដ្ឋានបូមខ្សាច់នេះអត់មានច្បាប់អនុញ្ញាតនោះទេ“។
ថ្ងៃទី០៨ ខែកក្កដា ឆ្នាំ២០២១ ម៉ោង០៤រសៀល កាសែតកម្ពុជាសុវណ្ណភូមិ បានធ្វើបទសំភាសន៍ លោក អ៊ាប ថា មេឃុំត្បែងតាមទូរស័ព្ទ លោកមានប្រសាសន៍ថា ”ខ្ញុំបានឱ្យលោកមេភូមិ ឃី សុខុម ទៅសាកសួរខាងការដ្ឋានបូមខ្សាច់នេះហើយ ម្ចាស់គេឆ្លើយថា គេបានរត់ច្បាប់ហើយ តែច្បាប់មិនទាន់បានមកដល់ ខ្ញុំក៏ឆ្ងល់ដែរ បើច្បាប់មិនទាន់បាន ហេតុអ្វីហ៊ានប្រកបអាជីកម្មបូមខ្សាច់មុនច្បាប់អនុញ្ញាតអញ្ចឹង? លោកអ្នកកាសែតស្រាវជ្រាវខ្លួនឯងចុះ ព្រោះខ្ញុំតូចតាចណាស់“។
ថ្ងៃទី០៩ ខែកក្កដា ឆ្នាំ២០២១ ម៉ោង១១និង៣០នាទី ចាងហ្វាងកាសែតកម្ពុជាសុវណ្ណភូមិបានចុះទៅដោយផ្ទាល់ដល់ការដ្ឋានបូមខ្សាច់ខាងលើ ហើយមានបុរស់ម្នាក់បានចេញមុខអះអាងថា ខ្លួនជាម្ចាស់ការដ្ឋាន ហើយការដ្ឋានមានច្បាប់អនុញ្ញាតត្រឹមត្រូវ តែបុរស់រូបនោះគេមិនអនុញ្ញាតឱ្យអ្នកកាសែតមើលច្បាប់របស់គេទេ មិនតែប៉ុណ្ណោះសូម្បីតែឈ្មោះម្ចាស់ការដ្ឋានក៏គេមិនប្រាប់ លេខទូរស័ព្ទសម្រាប់ទំនាក់ទំនងក៏គេមិនឱ្យ ដោយគេប្រើពាក្យមួយឃ្លាចុងក្រោយថា ”បើលោកអ្នកកាសែតចង់ដឹងម្ចាស់ឈ្មោះអ្វី? ការដ្ឋាននេះមានច្បាប់ឬអត់? លោកទៅសាកសួរមន្ត្រីជំនាញទៅដឹងហើយ ខ្ញុំមិនជឿថាលោកធ្វើជាអ្នកកាសែតមិនស្គាល់ម្ចាស់ការដ្ឋានបូមខ្សាច់នៅវាលនេះនោះទេ“។
ម៉ៅ១២និង៣០នាទីរសៀល ថ្ងៃទី០៨ ខែកក្កដា ឆ្នាំ២០២១ដដែល ចាងហ្វាកាសែត កម្ពុជាសុវណ្ណភូមិ បានធ្វើដំណើរទៅដល់សាលាស្រុកបន្ទាយស្រី ហើយបានខលទូរស័ព្ទសាកសួរទៅលោក ឃឹម ហ្វីណង់ អភិបាលស្រុកបន្ទាយស្រី លោកអភិបាលស្រុកវ័យក្មេងរូបនេះបានប្រាប់តាមទូរស័ព្ទថា ”ខ្ញុំអត់នៅក្នុងសាលាស្រុកទេ ជាប់រវល់ចេញមកធ្វើការខាងក្រៅ តែការដ្ឋានបូមខ្សាច់នេះ ខ្ញុំពុំដែលដឹងទេ ចាំខ្ញុំចុះទៅមើលទីនោះផ្ទាល់។ លោក ឃឹម ហ្វីណង់ បានពន្យល់បន្ថែមថា ខាងសាលាស្រុកមិនមានសិទ្ធិចេញច្បាប់អនុញ្ញាតឱ្យការដ្ឋានបូមខ្សាច់ទេ នេះជាតួនាទីរបស់មន្ទីររ៉ែនិងថាមពល ខាងស្រុកបានត្រឹមតែត្រួតត្រាពីផលប៉ះពាល់នៅក្នុងស្រុកតែប៉ុណ្ណោះ“។
នៅរសៀលម៉ោង៣និង១០នាទី ថ្ងៃទី១៣ ខែកក្កដា ឆ្នាំ២០២១នេះលោក មាស ជូរ៉ានី ប្រធានមន្ទីររ៉ែ និងថាមពល ខេត្តសៀមរាប បានប្រាប់តាមទូរស័ព្ទថា ”កន្លែម្តុំនោះពីមុនមកមានការដ្ឋានបូមខ្សាច់មួយមានច្បាប់ តែម្ចាស់បានស្លាប់បាត់ទៅហើយ តែកន្លែងដែលបងអ្នកកាសែតប្រាប់ខ្ញុំនេះ ខ្ញុំដូចជាមិនស្គាល់ទេ សូមបងជួយផ្ញើរូបភាពការដ្ឋានបូមខ្សាច់ និងទីតាំងឱ្យខ្ញុំផង ខ្ញុំនឹងចុះទៅមើលដោយផ្ទាល់ ខ្ញុំសូមអរគុណហើយ ដែលបងបានរាយការណ៍ ទីតាំងបូមខ្សាច់ខាងលើប្រាប់ខ្ញុំឱ្យបានដឹង“។
អាជ្ញាធរដែនដី និងពលរដ្ឋនៅឃុំត្បែង មានការរិះគន់ថា មិនគួរណាសមត្ថកិច្ចពាក់ព័ន្ធ បណ្តោយឱ្យមានការដ្ឋានបូមខ្សាច់នៅក្បែរជើងភ្នំគូលេនយ៉ាងអាណាធិបតេយ្យដូច្នេះនោះទេ ពួកគាត់ព្រួយបារម្ភថា ខ្លាចសត្វពាហន:របស់ពួកគាត់ដើររកស៊ីធ្លាក់ក្នុងរណ្តៅបូមខ្សាច់នេះស្លាប់ ម្យ៉ាងវិញទៀត ពួកគាត់ព្រួយបារម្ភទៀតថា បើបូមយូរៗទៅ ខ្លាចតែរលំភ្នំគូលេនរាបដល់ដីទេក៏មិនដឹង។ ពួកគាត់បានសំនូមពរទៅអាជ្ញាធរខេត្តសៀមរាប និងមន្ត្រីជំនាញពាក់ព័ន្ធមេត្តា បញ្ឈប់ការដ្ឋានបូមខ្សាច់ក្បែរភ្នំគូលេននេះឱ្យអស់ទៅ ដើម្បីការពារសម្បត្តិរួម ទុកឱ្យកូនចៅជំនាន់ក្រោយបានមើលឃើញផង៕ ដោយ៖ ផ្លុងរ៉េត
.jpg)
.jpg)
.jpg)
.jpg)
.png)
.jpg)
.jpg)
