ស្ត្រីរងអយុត្តិធម៌ពីររូប ប្តឹងចៅក្រមម្នាក់និងក្រឡាបញ្ជីម្នាក់ទៅក្រសួងយុត្តិធម៌

ខេត្តព្រះវិហារ៖ លោកចៅក្រមម្នាក់​ និងក្រឡាបញ្ជីម្នាក់ទៀតនៃសាលា​ដំបូងខេត្តព្រះវិហារ​ ត្រូវបានស្ត្រីពីររូបដែលរង​អយុត្តិធម៌ក្នុងរឿងវិវាទដីធ្លី សម្រេចចិត្តដាក់ពាក្យប្តឹងទៅក្រសួងយុត្តិធម៍ ដើម្បីមានវិធានការផ្លូវច្បាប់ករណីលោកចៅក្រម និងលោកក្រឡាបញ្ជីលាក់បាំងឯកសារភស្តុតាងក្នុងសំណុំរឿង និងសាក្សី។

ស្ត្រីដែលជាដើមបណ្តឹងទី១ឈ្មោះ ទួន ចន្រ្ទា​ អាយុ​៥០​ឆ្នាំ មានទីលំនៅភូមិតាភុល សង្កាត់ស្វាយដង្គំ ក្រុងខេត្តសៀមរាប។ ស្រ្តីទី២ឈ្មោះ អៀង ងីម​ អាយុ៥៥ឆ្នាំ មានទីលំនៅភូមិចុងកៅស៊ូ សង្កាត់ស្លក្រាម ក្រុង-​ខេត្ត​សៀមរាប។

ចំណែកចៅក្រមស៊ើបសួរនៃសាលាដំបូងខេត្តព្រះវិហារ ដែលត្រូវស្ត្រីទាំងពីរខាងលើប្តឹងមានឈ្មោះ ជឹម សូជាថា ភេទប្រុស ​និងក្រឡាបញ្ជីឈ្មោះ កែវ បុលសម្បត្តិ​ ភេទប្រុស។

យោងតាមពាក្យបណ្តឹងនៅក្រសួងយុត្តិធម៌ លេខៈ798 ម៉ោង8និង50នាទី ចុះថ្ងៃទី២៣ ខែកញ្ញា​ ឆ្នាំ​២០២៤ របស់ស្ត្រីពីររូបខាងលើ​បាន​បង្ហាញថា​ សុំប្តឹងឈ្មោះ ជឹម សូជាថា ភេទប្រុស​ជាចៅក្រមស៊ើបសួរនៅសាលា​ដំបូងខេត្តព្រះវិហារ និងសុំប្តឹងឈ្មោះ កែវ បុលសម្បត្តិ​ ភេទ​ប្រុស​ ជាក្រឡាបញ្ជីនៅសាលាដំបូងខេត្តព្រះវិហារ។ ពាក់ពន្ធ័ករណីមិនកោះហៅសាក្សី និងបានដកពាក្យបញ្ចូលសាក្សីរបស់នាងខ្ញុំចេញពីសំណុំរឿង​ ដើម្បីលាក់បាំងសាក្សីរបស់នាងខ្ញុំក្នុងការស្វែងរកយុត្តិធម៍។ យោងតាមសំណុំ​រឿងព្រហ្មទណ្ឌលេខៈ៤៦៣ ចុះថ្ងៃទី១៨ ខែតុលាឆ្នាំ ២០​២៣​ របស់អយ្យការអមសាលាដំបូងខេត្តព្រះវិហារ​។

លិខិត​បញ្ជាក់ថា​ កាលពីថ្ងៃទី២៨ ខែកុម្ភ: ឆ្នាំ២០២៤ នាងខ្ញុំបានដាក់ពាក្យបញ្ចូលសាក្សីដែលមានវាយត្រាលេខចូល៥៤៥ រដ្ឋបាលសាលាដំបូងត្រឹមត្រូវ ក្នុងកម្មវត្ថុបញ្ចូលសាក្សីចំនួន០៥រូប​ដើម្បីអោយចៅក្រមស៊ើបសួរកោះហៅមកសាកសួរជាប្រយោជន៍ដល់នាង​ខ្ញុំស្វែងរកយុត្តិធម៍ និងភាពត្រឹមត្រូវក្នុងសំណុំរឿងព្រហ្ម​ទណ្ឌលេខៈ៤៦៣របស់អយ្យការអមសាលាដំបូងខេត្តព្រះវិហារ។ ផ្ទុយទៅវិញសំណុំរឿងលេខៈ៤៦៣ ចុះថ្ងៃទី១៨ ខែតុលា ឆ្នាំ២០២៣ របស់អយ្យការសាលាដំបូងខេត្តព្រះវិហារ​ លោកក្រឡាបញ្ជី កែវ បុលសម្បត្តិ និងចៅក្រម ជឹម សុជាថា មិនបានកោះហៅសាក្សីរបស់នាងខ្ញុំទៅសាកសួរនោះទេ ថែមទាំងដកលិខិតសុំបញ្ចូលសាក្សីរបស់នាងខ្ញុំចេញ​ ហើយបញ្ជូនរឿងទៅចៅក្រមជំនុំ​ជម្រះតែម្តង ក្នុងចេតនាអោយចៅក្រមជំនុំជម្រះភាន់​ច្រឡំ។

ក្រៅពីខ្លឹមសារក្នុងពាក្យបណ្តឹង លោកស្រី ទួន​ ចន្ទ្រា​ ក៍បានអោយដឹងតាមប្រពន្ធ័តេឡេក្រាមថា រឿងរ៉ាវបានកើតឡើងលើដីជម្លោះក្នុងភូមិស្រយង់ខាងជើង ឃុំស្រយង់​ ស្រុកគូលែន​ ក្នុងខេត្តព្រះវិហារ ហើយរូបគាត់​(ទួនចន្រ្ទា)​បានរកសាក្សីពីទីតាំងកើតហេតុដាក់ជូនតុលាការសម្រាប់ផ្តល់ព័ត៍មានពិត ប៉ុន្តែលោកចៅក្រមនិងក្រឡាបញ្ជីខាងលើ មិនកោះហៅសាក្សីទាំងនោះទៅសាកសួរទេ​ បែជាទៅហៅសាក្សីដែលនៅភូមិនិងឃុំផ្សេងសួរនាំទៅវិញ។ទង្វើរបស់មន្ត្រីតុលាការ​ ខេត្តព្រះវិហារទាំងពីរូបខាងលើ គឺត្រូវបានគេសង្ស័យថាមានគំនិតទុច្ចរិតនិងមានចេតនាលាក់បាំងព័ត៍មានដើម្បីអោយតុលាការដាក់ទោសកំហុសមកលើរូបគាត់(ទួន​ចន្រ្ទា) ។  

លោកស្រីទួន​ចន្រ្ទា​ បញ្ជាក់ថាក្រោយពេលផ្សព្វផ្សាយព័ត៍មាននេះហើយ ប្រសិនបើភាពយុត្តិធម៍នៅតែមិនមានចំពោះលោកស្រីទេនោះ លោកស្រីនឹងមិនថយ​ក្រោយឡើយ គឺបន្តប្តឹងទៅអង្គភាពប្រឆាំងអំពើពុក​រលួយ(ACU)​រហូតទទួលបាន​ភាពយុត្តិធម៍។ ប៉ុន្តែលោកស្រីរំពឹងថា ក្រសួងយុត្តិធម៍ នឹងមិនលើកលែងចំពោះមន្ត្រីប្រព្រឹត្តអំពើខុសច្បាប់នោះឡើយ។

សូម​បញ្ជាក់​ជូន​ថា​ ដើមចមដែលនាំអោយមានហេតុការណ៍ប្តឹងផ្តល់នេះកើតឡើង គឺផ្តើមចេញពីទំនាស់ដីធ្លីរវាងពលរដ្ឋ១ក្រុម និងស្ត្រីរងគ្រោះពីររូបជាដើមបណ្តឹងខាងលើ ដែលដីនោះមានទីតាំង​នៅក្នុងភូមិស្រយង់ខាងជើង ឃុំស្រយង់​ ស្រុកគូលេន ខេត្តព្រះវិហារ។

តាមការបញ្ជាក់របស់លោកស្រីទួនចន្រ្ទា ដីខាងលើនេះរូបគាត់បានកាន់កាប់តាំងពីឆ្នាំ២០០៨មានឯកសារត្រឹមត្រូវ។ ប៉ុន្តែនៅកំឡុងឆ្នាំ២០១៧មានជន​ខិលខូច១ក្រុមលួចធ្វើលិខិតកាន់កាប់(ក្លែង)​ជាន់លើប្លង់របស់គាត់​ ដែលជាលក្ខណ:ឃុបឃិតគ្នាជាប្រពន្ធ័​នៅឆ្នាំ២០១៩ ពេលជម្ងឺកូវិដ19 រាតត្បាត​ ក្រុមជនខាងលើបានលួចសាងសង់ខ្ទមនៅលើដីរបស់គាត់។ ទួនចន្រ្ទាបញ្ជាក់ថា ខ្ញុំជាម្ចាស់ដីដាក់សាក្សីគេមិនហៅទៅសាកសួរ​ បែជាហៅសាក្សីភាគីរំលោភកាន់​កាប់ដីទៅសាកសួរទៅវិញ នេះហើយហេតុផលដែលនាំអោយមានការប្តឹងផ្តល់ បែបនេះ។

អង្គភាពសារព័ត៌មានយើងពុំទាន់អាចសុំការពន្យល់ពីលោកចៅក្រម ជឹម សូជាថា និងលោកក្រឡាបញ្ជីឈ្មោះ កែវ បុលសម្បត្តិ​ បានទេព្រោះគ្មានលេខទូរស័ព្ទសម្រាប់ធ្វើការទំនាក់ទំនង។ អង្គភាពសារព័ត៌មានយើងរងចាំការបកស្រាយបំភ្លឺរាល់ម៉ោងធ្វើការពីថ្ងៃចន្ទដល់ថ្ងៃសុក្រ៕ ផ្លុង រ៉េត