រដ្ឋាភិបាលស៊ីរី យល់ព្រមទទួលសំណើរ បទឈប់បាញ់

រដ្ឋាភិបាលស៊ីរី បានយល់ព្រមទទួលនូវសំណើរអនុវត្តន៍បទឈប់បាញ់ ក្នុងអំឡុងនៃបុណ្យ អ៊ីដ អាល់ អាថា ដែលសំណើរនេះត្រូវបានធ្វើឡើងដោយលោក Lakhdar Brahimi ប្រេសិតពិសេសរបស់អង្គការសហប្រជាជាតិ និងសម្ព័ន្ធអារ៉ាប់ ប្រចាំនៅប្រទេស ស៊ីរី។

នេះបើយោងតាមការលើកឡើងរបស់ លោកNabil al-Arabi ប្រធានសម្ព័ន្ធអារ៉ាប់បានឲ្យដឹងកាលពីថ្ងៃពុធ ទី២៤ ខែតុលា ឆ្នាំ២០១២កន្លងទៅនេះ ក្នុងអំឡុង នៃកិច្ចប្រជុំ ជាមួយលោក Brahimi នៅក្នុងទីក្រុង កាអ៊ីរ៉ូ។យោងតាមទីភ្នាក់ងារសារព័ត៌មាន ចិនស៊ិនហួ ចុះថ្ងៃទី២៥ ខែតុលា ឆ្នាំ២០១២នេះបានឲ្យដឹងដោយលើកឡើងនូវសំដីរបស់លោក Brahimi ថាអាជ្ញាធរប្រទេសស៊ីរី នឹងលើកឡើងពីបទឈប់បាញ់គ្នានេះក្នង សេចក្តីថ្លែងការ នាថ្ងៃព្រហស្បតិ៍ ទី២៥ ខែតុលា ឆ្នាំ២០១២នេះ។លោក Brahimi បានបន្តថា ប្រសិនបើបទឈប់បាញ់នេះអាចទទួលបានជោគជ័យ នោះវិធានការណ៍ផ្សេងទៀត នឹងត្រូវបានធ្វើជាបន្តទៀត។

ប្រេសិតពិសេសរូបនេះ ក៏បានបញ្ជាក់ផងដែរថា លោកបានធ្វើការទាក់ទងជាមួយក្រុមប្រដាប់អាវុធជាច្រើនក្នុងប្រទេស ស៊ីរី ហើយស្ទើរគ្រប់ក្រុមនៃអ្នកប្រដាប់អាវុធទាំងនោះយល់ព្រមតាមសំណើរនេះគួរបញ្ជាក់ថា អគ្គលេខាធិការរបស់សម្ព័ន្ធអារ៉ាប់ លោក Al-Arabi បានធ្វើកិច្ចប្រជុំព្រឹកថ្ងៃពុធ ទី២៤ ខែតុលា ឆ្នាំ២០១២កន្លងទៅនេះជាមួយលោក Brahimi និងលោក Jimmy Carter អតីតប្រធានាធិបតីសហរដ្ឋអាមេរិក និងប្រធានក្រុម EIG ដែលបានធ្វើឡើងនៅទីបញ្ជាការប្រចាំសម្ព័ន្ធអារ៉ាប់ ដោយផ្តោតការយកចិត្តទុកដាក់ទៅលើការវិវត្តន៍ថ្មីៗ នៃវិបត្តិនៅប្រទេស ស៊ីរី៕