ណាតូៈ ការប្រើប្រាស់​អាវុធគីមីនៅស៊ីរី​ជារឿងមិន​អាច​ទទួល​យក​បាន​នោះទេ

អគ្គលេខាធិការអង្គការណាតូ លោក Anders Fogh Rasmussen បាននិយាយកាលពីថ្ងៃសុក្រ ទី១៤ ខែមិថុនា ឆ្នាំ២០១៣នេះថា ការប្រើប្រាស់អាវុធគីមី ក្នុងប្រទេសស៊ីរី ជារឿងមិនអាច ទទួលយកបាននោះទេ ហើយក៏បាន រំលោភទៅលើច្បាប់អន្តរជាតិផងដែរ។

ទីភ្នាក់ងារសារព័ត៌មាន ចិនស៊ិនហួ ចុះថ្ងៃទី១៥ ខែមិថុនា ឆ្នាំ២០១៣នេះបានឲ្យដឹងដោយលើកឡើងនូវសំដី របស់លោកប្រាប់ទីភ្នាក់ងារសារព័ត៌មានថា បញ្ហានេះបានអូសទាញការចាប់អារម្មណ៍យ៉ាងខ្លាំង។

លោកបានបន្តថា សហគមន៍អន្តរជាតិ បានបញ្ជាក់ច្បាស់ថា ការប្រើប្រាស់អាវុធគីមី ជាទង្វើ ដែលមិនអាចទទួល យកបានឡើយ ហើយក៏បានរំលោភបំពាន លើច្បាប់អន្តរជាតិផងដែរ។

មេដឹកនាំរបស់អង្គការណាតូ មួយនេះបានបង្ហាញការស្វាគមន៍ចំពោះ ការលើកឡើងរបស់សហរដ្ឋអាមេរិក។ លោកបានបន្ថែមថា រដ្ឋាភិបាល ស៊ីរី គួរណាស់តែអនុញ្ញាតឲ្យអង្គការសហប្រជាជាតិធ្វើការស៊ើបអង្កេត ក្នុងប្រទេស ស៊ីរីដើម្បី ស៊ើបអង្កេតបញ្ហានេះ ឆ្លើយតបនឹងការសេចក្តីរាយការកន្លងមក

លោក Rasmussen បានបង្ហាញការជឿជាក់ថា លោកនៅតែបន្តជឿជាក់ថា ដំណោះស្រាយនយោបាយ ជាផ្លូវតែមួយគត់ សម្រាប់រដ្ឋាភិបាល ស៊ីរី និងក្រុមភាគីពាក់ព័ន្ធ គ្រប់ភាគី។ គួរបញ្ជាក់ថា ការលើកឡើងនេះ ត្រូវបានធ្វើឡើង បន្ទាប់ពីសេតវិមាន បានប្រកាសថា រដ្ឋាភិបាល ស៊ីរី បានប្រើប្រាស់អាវុធគីមីដើម្បីកម្ចាត់ក្រុមបះបោរ។