តុលាការ​ចោទប្រកាន់​ម្ចាស់​ហាង​ម៉ាស្សា​អ៊ុតសក់​«​មី​កា​សា​»​ពីបទ​សញ្ចរ​កម្ម​

 លោកស្រី ចាន់ ស្រីណុច ហៅមុំ អាយុ៣៨ឆ្នាំមានទីលំនៅផ្ទះលេខ៣៨ ផ្លូវលេខ១៣៤ សង្កាត់ផ្សារចាស់ ខណ្ឌដូនពេញរាជធានីភ្នំពេញ ជាថៅកែហាងម៉ាស្សា អ៊ុតសក់មីកាសា ដែលល្បីល្បាញប្រមូលតារាស្រីស្អាតៗ ក្រោមរូបភាពផ្ដល់ជូនតុបតែងមុខ ផាត់មុខ អ៊ុតសក់ មិនគិតកម្រៃ ហើយត្រូវបានសមត្ថកិច្ចអាវុធហត្ថលើផ្ទៃប្រទេសបញ្ជូនមកតុលាការកាលពី វេលាម៉ោង៩ និង ៣០នាទីព្រឹកថ្ងៃទី២១ ខែកញ្ញា ឆ្នាំ២០១២។ រឿងក្ដីនេះត្រូវបានចាត់បញ្ជូនឲ្យលោក មាស ចាន់ពិសិដ្ឋ ព្រះរាជអាជ្ញារង អមតុលាការរាជធានីភ្នំពេញជាម្ចាស់ករណីធ្វើការសាកសួរ។

បន្ទាប់ពីធ្វើការសាកសួរ និង ផ្អែកលើរបាយការណ៍ស៊ើបអង្កេតបឋមរបស់ការិយាល័យស្រាវជ្រាវ បទល្មើសព្រហ្មទណ្ឌ និង ការិយាល័យប្រឆាំងអំពើជួញដូរមនុស្ស និងការពារអនីតិជនអាវុធហត្ថលើផ្ទៃប្រទេស ទើបលោកមាស ចាន់ពិសិដ្ឋ បានសម្រេចចោទប្រកាន់លោកស្រី ចាន់ ស្រីណុច ហៅមុំ ពីបទសញ្ចរកម្មតាមមាត្រា២៨៤នៃក្រមព្រហ្មទណ្ឌ ហើយបញ្ជូនសំណុំរឿង និងជនជាប់ចោទឲ្យចៅក្រោមស៊ើបអង្កេតចាត់ការបន្តតាមនីតិវិធី។

រហូតមកដល់ល្ងាចថ្ងៃដដែល លោកស្រីចៅក្រម សែម ស័ក្តិកូឡា ជាចៅក្រមស៊ើបអង្កេតរឿងក្ដីខាងលើកំពុងបន្តសួរចម្លើយលោកស្រីចាន់ ស្រីណុចពាក់ព័ន្ធទៅនឹងការចោទប្រកាន់ដោយផ្អែកទៅលើសកម្មភាពបទល្មើស ដែលកើតមាន។

យោងតាមមាត្រា២៨៤នៃក្រមព្រហ្មទណ្ឌអំពីបទសញ្ចរកម្មបានកំណត់ថា អំពើសញ្ចរកម្មគឺជាការទាញផលប្រយោជន៍ហិរញ្ញវត្ថុពីអំពើពេស្យាចារ របស់អ្នកដទៃ។ ជួយ ឬការពារអំពើពេស្យាចាររបស់អ្នកដទៃ ឬរៀបចំតាមគ្រប់មធ្យោបាយ នូវសកម្មភាពពេស្យាចារ។ ជ្រើសរើស ពង្រត់ ឬអូសទាញបុគ្គលណាមួយឲ្យធ្វើអំពើពេស្យាចារ។ ធ្វើការគាបសង្កត់លើបុគ្គលណាមួយដើម្បីឲ្យបុគ្គលនោះធ្វើពេស្យាចារ គឺជាអំពើសញ្ចរកម្មត្រូវផ្ដន្ទាទោសដាក់ពន្ធនាគារពី២-៥ឆ្នាំនិង ពិន័យជាប្រាក់ពី៤-១០លានរៀល។

គួរបញ្ជាក់ថាសមត្ថកិច្ចបានធ្វើការឃាត់ខ្លួនក្រុមមនុស្សពាក់ព័ន្ធ បទល្មើសជួញដូរផ្លូវភេទខាងលើកាលពីវេលាម៉ោង ១៧ និង៤៥នាទីល្ងាចថ្ងៃទី១៩ ខែកញ្ញា ឆ្នាំ២០១២ នៅទីតាំង២កន្លែងក្នុងសណ្ឋាគារស្រែលាភស្ថិតនៅសង្កាត់បឹងកក់១ ខណ្ឌដូនពេញ ដោយឃាត់ខ្លួនស្ត្រី៣នាក់មានទី១.ឈ្មោះ ចាន់ ស្រីណុច ហៅមុំ អាយុ៣៨ឆ្នាំ មុខរបរម្ចាស់ហាងអ៊ុតសក់មីកាសា នៅម្ដុំផ្សារចាស់(ជាមេខ្លោងជួញដូរផ្លូវភេទ) ទី២. ឈ្មោះ គឹម ស្រីនួន ហៅ នួន អាយុ២១ឆ្នាំមុខរបរនៅផ្ទះ(ជាអ្នកបម្រើផ្លូវភេទ) ទី៣. ឈ្មោះ ហេង ដាលីស ភេទស្រីអាយុ២៣ឆ្នាំ ជាជាងអ៊ុតសក់(ជាអ្នកបម្រើផ្លូវភេទ)ព្រមទាំងឃាត់រថយន្តមួយគ្រឿង ម៉ាក តូយូតាកាមរីបាឡែនគ្មានស្លាកលេខពណ៌ស្ករ។

ប្រតិបត្ដិការរបស់មន្ដ្រីកងរាជអាវុធហត្ថទទួលបានការសាទរពីលោក ជំទាវ ជាច្រើន ប៉ុន្ដែថា វាក៏មិនជាធ្វើឱ្យឧកញ៉ា ឬអ្នកមានលុយធំៗសប្បាយចិត្ដនោះ ដែរ។ មិនមែនមានន័យថា អត់ពីចែមុំ គ្មាននរណាស្នងតំណែង ឬគ្មាននរណារក ស៊ីដូចគាត់តាំងពីដើមរៀងមកនោះទេ ប៉ុន្ដែយុទ្ធសាស្ដ្រវ៉ៃស្មៅបង្អើលពស់មួយនេះ អ្នកដែលមានខ្លួន ប្រាកដជាភ័យខ្លាចជាមិនខាន។ បើយ៉ាងនេះ តើឱ្យលោកឧកញ៉ា អ្នកមានប្រាក់ត្រូវការភាពសប្បាយរីករាយទៅរកនៅទីណា?

ទៅរកទីណា ក៏រកចុះ ! អ្វីដែលនាយយើងចាប់អារម្មណ៍ គឺក្រុមតារាសម្ដែង ក៏ ដូចជាអ្នកសម្របសម្រួលកម្មវិធី មុខជាសម្រួលអណ្ដាត មុននឹងហាស្ដី និយាយ ថ្លែងអំណរគុណហាងផាត់មុខធ្វើសក់យ៉ាងនេះយ៉ាងនោះ។ អ្វីដែលនាយយើងចាប់ អារម្មណ៍ នឹងរំពឹងនោះគឺថា អំណឹះតទៅ អ្នកឡើងលើឆាកសម្ដែងមុខជាលែងក្លាយ ជាចំណាប់ខ្មាំងនៃហាងផាត់មុខធ្វើសក់នោះទៀតហើយ។ បើសិនជានៅតែបន្ដធ្វើ ទៀតនោះ ខ្លាចគេយល់ថា ហាងនោះកំពុងមានម៉ឺនុយសម្រាប់ឱ្យភ្ញៀវមើល ដូច ដែលតួកំពុងនៅលើឆាកនៃកញ្ចក់ទូរទស្សន៍ ក្រោមការផាត់មុខធ្វើសក់ដោយ ហាងមួយនេះ តើមានសម្រស់ប៉ុណ្ណា ៕

មានអ្នកធំនិងឧកញ៉ហើយអ្នកមានលុយធ្លាប់ស្គាល់អ្នកស្រីមុំដែលម៉ែយ៉ែមរបស់ ពួកគេខំរត់ខ្វែងដៃខ្វែងជើងដើម្បីជួយអន្តរាគមន៏ឲ្យដោះលែងតែទៅមិនរួច។ អស់លោកអ្នកមានលុយច្រើនៗអើយឈប់បំផ្លាញអនាគត់គេទៅប្រយ័ត្នត្រូវបាបកម្មដល់ខ្លួន។