ឧញ្ញាសេះហោះម្នាក់ត្រូវបានសមត្ថកិច្ចឃាត់ខ្លូនបញ្ជូនទៅតុលាការ

ចៅ​ក្រមសាលាដំបូងខេត្តរតនគិរី លោក ស្រីជ័យ មាលា បានចេញដីការ​ឃាត់ខ្លួន​បុរស​ម្នាក់​ដែល​តាំង​ខ្លួន​ជា​ឧកញ៉ា។​

ការឃាត់ខ្លួនជន​សង្ស័យនេះដោយកម្លាំងកងរាជ​អាវុធហត្ថមូល​ដ្ឋាន​ក្រុង​បាន​លុង នៅ​​ព្រឹក​ថ្ងៃទី ២៧ ​ខែឧសភា ​ឆ្នាំ២០១៥​ ស្ថិត​​នៅភូមិ​ទេស​អន្លុង សង្កាត់បឹង​កន្សែង​ ក្រុងបានលុង​ខេត្តរតនគិរី។

យោងតាមកំណត់ហេតុកម្លាំង​កង​រាជអាវុធហត្ថក្រុង​បានលុងបានឲ្យដឹងថា អំពីករណី​ឆ​បោកនិង​ក្លែង​បន្លំ​ឯក​សារ​​សា​ធារណៈ ​​លោក​​វរៈ​សេនី​​យ៍ត្រី​ ហៃវ​ណ្ណារ៉ា មេបញ្ជាការកង​រាជអាវុធ​ហត្ថមូលដ្ឋាន​ក្រុងបាន​លុង​ ប្រាប់​ឲ្យដឹងថា កម្លាំង​របស់​លោក​អនុវត្ត​តាម​​ដីកា​រចេញ​​ដោយ​ចៅក្រម​លោក ស្រី​ជ័យ​ មាលា​ បង្គាប់​ឲ្យចាប់​ខ្លួន​បុរស​ម្នាក់​ឈ្មោះ ធី ហួត ភេទប្រុស ​អាយុ៣៥ឆ្នាំ ​ជន​ជាតិខ្មែរ​ មុខ​របរ​មិន​ពិត​ប្រា​កដ​ មាន​សុ្រក​កំណើត នៅឃុំមេមង ស្រុកមេមុត ខេត្តត្បូងឃ្មុំ។ 

លោកហៃ វណ្ណារ៉ា បានបញ្ជាក់ថាជនសង្ស័យនេះបានដើរតួជាឧកញ៉ាបង្អួតខ្លួនពេញខេត្តរតនគិរី​យើងនេះជាយូរមកហើយ ប៉ុន្តែកន្លងមកមិនទាន់ស៊ើបដឹងការពិត ទើបមិនទាន់ឈានដល់ការចាប់ខ្លួន លុះដល់មានដីការចេញដោយលោក ស្រីជ័យ មាលា  ចៅក្រមសាលា​ដំបូងខេត្ត​ ទើបមានវិធានការចុះអនុវត្ត​ដីការឃាត់ខ្លួន​ជនសង្ស័យខាង​លើនេះ។ 

សូមបញ្ជាក់ថា ជនសង្ស័យតាំង​ខ្លួនជាឧកញ៉ានេះ​ សមត្ថកិច្ចមិនបានបញ្ជាក់ប្រាប់​អ្នកកាសែតថា ឆបោកអ្នក​ណាខ្លះនោះទេ និងសម្ភារៈអ្វីខ្លះនោះឡើយ។

បច្ចុប្បន្នជនសង្ស័យត្រូវបានចៅក្រមចេញបញ្ជាអោយឃុំខ្លួនបណ្តោះអាសន្ននៅពន្ធនាគារភ្នំស្វាយនៅព្រឹកថ្ងៃ​ទី២៧​ ខែឧសភា​ ឆ្នាំ២០១៥​ដដែលនេះ​ ដើម្បីស្រាវ​ជ្រាវរកស្ថាន​ទំងន់ទោស​បន្ថែមចោទ​លើជននោះទៅតាម​ផ្លូវច្បាប់៕ ឡុង សៅ