លោក កឹមសុខា ត្រូវបានព្រះរាជអាជ្ញាជូនដំណឹងទៅរដ្ឋសភានៅព្រឹកមិញនេះពាក់ព័ន្ធរឿងកោះហៅ២លើកមិនចូលខ្លួន

លោក សៀង សុខ ព្រះរាជអាជ្ញាសាលាដំបូងរាជធានីភ្នំពេញ នៅព្រឹកថ្ងៃសុក្រ ទី២៧ ខែឧសភា ឆ្នាំ២០១៦នេះបានផ្ញើលិខិតមួយច្បាប់ទៅរដ្ឋសភា ដោយរាយការណ៍ថាលោក កឹម សុខា បានប្រព្រឹត្តបទល្មើសជាក់ស្តែងដោយមិនចូលខ្លួនតាមការកោះហៅរបស់តុលាការចំនួន២លើក ។

តំណាងអយ្យការនៃសាលាដំបូងរាជធានីភ្នំពេញបានចោទប្រកាន់លោក កឹម សុខា ពី បទបដិសេធក្នុងការចូលខ្លួន ដោយលោកអាចប្រឈមជាប់ពន្ធនាគារពី១ខែទៅ៦ខែ បើរកឃើញកំហុស ។

នៅក្នុងលិខិតមួយរបស់តុលាការចុះថ្ងៃទី២៦ ខែឧសភា ឆ្នាំ២០១៦ ព្រះរាជអាជ្ញាបានរៀបរាប់ពីការចោទប្រកាន់លោក កឹម សុខានិងអង្គច្បាប់មួយចំនួន ។ លោក សៀង សុខ ថាលោកបានបញ្ជូនសំណុំរឿងនេះទៅចៅក្រមស៊ើបសួរដើម្បីចាត់ការតាមនីតិវិធីច្បាប់ ។ រដ្ឋសភាបានទទួលលិខិតរបស់តុលាការនៅព្រឹកថ្ងៃសុក្រនេះហើយ៕ ប្រភព​ដើម​ទាំង​ស្រុង​ពី ខេមបូ-ប្រេស