លោកស្រីលីអ៊ុំអេង តំណាងអោយក្រុមហ៊ុន លីអ៊ុំអេង ស្ថិតនៅឃុំរំចេក ស្រុកបន្ទាយស្រី បានអះអាងយ៉ាងច្បាស់ថា អាជ្ញាធរខេត្ត ស្រុក ឃុំ សូរិយោដី និងមន្ត្រីពាក់ព័ន្ធ កំពុងតែនាំប្រជាពលរដ្ឋរាប់រយនាក់ទៅវាស់យកដីរបស់គាត់ទាំងបំពានផ្លូវច្បាប់អស់ប្រហែងជាងមួយរយហិកតា កាលពីថ្ងៃទី០១ ខែគុម្ភៈ ឆ្នាំ២០១៨ម្សិលមិញនេះ។
លោកជំទាវ លីអ៊ុំអេង បានប្រាប់កម្ពុជាសុវណ្ណភូមិកាលពីថ្ងៃទី០១ ខែគុម្ភៈ ឆ្នាំ២០១៨ម្សិលមិញថា ដីជាងបួនរយហិកតានេះ គាត់បានទិញអស់រយៈពេលជាង១៤ឆ្នាំហើយ តាំងពីសម័យ មិនទាន់មានផ្លូវហៃវ៉េមកម្លេះ(ផ្លូវលេខ៦៧)។ លោកជំទាវបន្តថា កាលពីសម័យលោក មឹង វុទ្ធ នៅជាចៅហ្វាយស្រុកបន្ទាយស្រី ហើយឯកឧត្តម ស៊ូ ភិរិន្ទ នៅជាចៅហ្វាយខេត្តសៀមរាប ធ្លាប់មានប្រជាពលរដ្ឋជាច្រើនលើកគ្នាមកប្តឹងថា គេបានទិញដីពីមនុស្សម្នាក់នៅក្នុងដីដែលជាកម្មសិទ្ធរបស់គាត់នេះ ហើយពលរដ្ឋខ្លះគេថា គេមិនបានលក់ដីអោយគាត់ទេ ការប្តឹងប្តល់ទាំងនេះហាក់ធ្វើអោយលោកជំទាវហត់ហើយឈឺក្បាលរហូតដល់គាត់បានសម្រេចចិត្ត កោះហៅពលរដ្ឋអ្នកប្តឹងប្តល់ទាំងនោះ មកយកលុយដើម្បីបញ្ចប់រឿងដល់ទៅពីរវគ្គ ដែលអស់ទឹកប្រាក់ជាង២០ម៉ឺនដុល្លារអាមេរីកកាំង ទើបរឿងនេះស្ងប់ស្ងាត់ ហើយតុលាការកំពូលនៅក្រុងភ្នំពេញក៏បានចេញសាលក្រមស្ថាពរទទួលស្គាលដីជាងបួនរយហិកតានេះជាកម្មសិទ្ធរបស់លោកជំទាវស្របច្បាប់ មានប្លង់កម្មសិទ្ធគ្រប់បែបយ៉ាង និងមានឯកសារគ្រប់គ្រាន់ផងដែរ។
លោកជំទាវបន្តថា ចុះហេតុអ្វីស្រាប់តែមកដល់សម័យឯកឧត្តម ឃឹម ប៊ុនសុង ឡើងជាចៅហ្វាយខេត្តសៀមរាប ស្រាប់តែមានពលរដ្ឋមកប្តឹងគាត់ទៀតថា គាត់រំលោភយកដីរបស់របស់រដ្ឋ ដែលពលរដ្ឋមិនបានលក់អោយទៅទិញ? លោកជំទាវគាត់ឆ្ងល់ថា គាត់ក៏ជាមនុស្សជារាស្រ្តខ្មែរ ពលរដ្ឋក៏ជាមនុស្ស ក៏ជារាស្ត្រខ្មែរ ហេតុអ្វីខាងខេត្ត ស្រុក ឃុំនាំគ្នាទៅជឿតែខាងពលរដ្ឋដែលទៅប្តឹងគាត់ដោយបាតដៃទទេ មេចបានមិនជឿគាត់ ព្រោះគាត់មានឯកសារគ្រប់គ្រាន់ដែលតុលាការកំពូលសម្រេចអោយ និងមានប្លង់កម្មសិទ្ធគ្រប់យ៉ាង ហើយក៏បានដោះស្រាយអោយពលរដ្ឋដែលលើកគ្នាមកតវ៉ាដល់ទៅពីរវគ្គ អស់លុយជាង២០ម៉ឺនដុល្លារ តាំងពីសម័យលោកស៊ូភិរិន្ទ? ហើយប្រជាពលរដ្ឋចេញមកពីណា មកតវ៉ាមិនចេះចប់មិនចេះហើយ? ឬមានអ្នកដែលចាំតែរៀបចំកម្មវិធីខូចៗបែបនេះនៅពីក្រោយខ្នង? លោកជំទាវចោទសួរទៀតថា តើខាងសាលាខេត្ត សាលាស្រុក សាលាឃុំ និងសូរិយ៉ោដី ធ្វើការទៅតាមផ្លូវច្បាប់ ទៅតាមឯកសារ ឬធ្វើការទៅតាមអ្នកប្តឹង បើទោះជាដីកម្មសិទ្ធស្របច្បាប់របស់គេក៏ដោយ អោយតែមានអ្នកប្តឹងត្រូវតែលើកទ័ពទៅវាស់យកដីរបស់គេ ទាំងម្ចាស់គេមិននៅយ៉ាងដូច្នេះឬ?
លោកជំទាវលីអ៊ុំអេងបានរិះគន់ថា បើអាជ្ញាធរក្នុងខេត្តសៀមរាប នៅបន្តធ្វើការរបៀបនេះទៀត អ្នកមានដីធំសម្រាប់ធ្វើស្រែចំការ ដាំដំណាំកសិឧស្សាហកម្ម អ្នកមានដីធំសម្រាប់ធ្វើរោងចក្រ អ្នកវិនិយោគទុនទាំងឡាយ បើមិនរលាយហិនហោចខ្លោចផ្សា នោះទើបជារឿងចម្លែង ព្រោះពួកគេធ្វើការទាំងងងឹតងងុល ពុលតាមសម្តីរបស់មនុស្សខូចៗមួយចំនួននៅថ្នាក់ក្រោម និងពលរដ្ឋខូចៗមួយក្រុមតូចដែលតែងតែដើររកលាភសការៈ របៀបដដែលទាំងនេះ។
លោកជំទាវបានបន្ថែមថា សូមអោយឯកឧត្តម ឃឹម ប៊ុនសុង អភិបាលខេត្តសៀមរាប លោកអភិបាលស្រុកបន្ទាយស្រី លោកមេឃុំ ខាងសូរិយោដី និងមន្ត្រីពាក់ព័ន្ធ មេត្តាត្រួតពិនិត្យឯកសាររបស់គាត់ ហើយសិក្សាសាច់រឿងដីនេះតាំងពីសម័យឯកឧត្តម ស៊ូភិរិន្ទ ផង កុំធ្វើអ្វីដោយអំណាច កុំធ្វើអ្វីដោយយកពលរដ្ឋមកធ្វើជាលេស កុំធ្វើអ្វីដែលប្រាសចាកពីផ្លូវច្បាប់ កុំធ្វើអ្វីដែលលំអៀងទៅរកភាគីម្ខាង កុំធ្វើអ្វីខុសពីគន្លងដែលព្រះពុទ្ធបាននែនាំ ដូចសុភាសិតមួយបានពោលថា ធ្វើល្អបានល្អ ធ្វើអាក្រកបានអាក្រក់ ហើយបានបាប និងធ្លាក់នរកអាវចីយ៍។
លោកជំទាវបានសំនូមពរទៅ សម្តេច ហ៊ុន-សែន នាយករដ្ឋមន្ត្រីនៃព្រះរាជាណាចក្រកម្ពុជាសម្តេចគតិព្រិទ្ធបណ្ឌិត ប៊ុន-រ៉ានីហ៊ុនសែន និងសម្តេច ស-ខេង មេត្តាជួយដល់គាត់ផង ហើយមេត្តាស្រាវជ្រាវស៊ើបអង្កេតក្រុមមនុស្សមានអំណាចមួយក្រុមនៅក្នុងខេត្តសៀមរាប ដែលកំពុងតែប្រើអំណាចលើសលុបជិះជាន់កៀបសង្កត់រូបគាត់ដែលជាស្រ្តីភេទ ហើយតែងតែរំលោភបំពានទៅលើដីធ្លីរបស់គាត់ម្តងហើយម្តងទៀតមិនចេះចប់មិនចេះហើយ។
ពាក់ព័ន្ធទៅនិងករណីដីធ្លីខាងលើនេះ លោក អ៊ឹម-អ៊ីង មេឃុំរំចេក បានប្រាប់តាមទូរស័ព្ទនៅរសៀលថ្ងៃទី០២ ខែគុម្ភៈ ឆ្នាំ២០១៨នេះថា កាលពីថ្ងៃទី០១ម្សិលមិញលោកពិតជាបានចូររួមវាស់វែងក្បាលដីអោយប្រជាពលរដ្ឋនៅក្នុងដីចំការស្វាយចំការចន្ទីរបស់លោកស្រីលីអ៊ុំអេងមែន តែលោកថាតួលេខបានប៉ុន្មាននោះលោកមិនច្បាស់ទេ សុំអោយសួរទៅខាងស្រុក ហើយលោកបានឆ្លើយទៀតថា លោកមិនបានចាំទេថា ពលរដ្ឋដែលទៅតវ៉ារឿងដីធ្លីនេះមានប៉ុន្មានគ្រួសារពិតប្រាកដ ព្រោះឯកសារនៅខាងមេភូមិគេអ្នកកាន់កាប់។
លោក សុ-ខុម អភិបាលរងស្រុកបន្ទាយស្រី បានប្រាប់កម្ពុជាសុវណ្ណភូមិតាមទូរស័ព្ទនៅរសៀលថ្ងៃទី២ដដែលនេះដែរថា កាលពីថ្ងៃទី០១ម្សិលមិញការចុះវាស់វែងដីជូនពលរដ្ឋស្ថិតក្នុងដីចម្ការដែលហុំព័ទក្នុងក្រវ៉ាត់ដីរបស់លោក ជំទាវលីអ៊ុំអេង បាន៣០ក្បាលដី ក្នុង១ក្បាលមានពី២ទៅ៣ប្លង់ ហើយមួយប្លង់ៗមានទំហុំមិនស្មើគ្នាទេ មានតូចមានធំ អាស្រ័យលើមេឃុំ និងប្រជាពលរដ្ឋដើរចង្អុលថាដីណាជារបស់គាត់។ លោកអភិបាលរងបន្តថា ដីដែលមានទំនាស់ជាមួយលលោកជំទាវនេះមានចំនួន៤៧គ្រួសារ។ លោកអភិបាលរងរូបនេះបានបន្ថែមថា ការវាស់វែងនេះគឺសម្រាប់ធ្វើឯកសារដាក់ទៅសាលាខេត្តតាម ស.ជ.ណ របស់លោកអភិបាលខេត្ត ឃឹម ប៊ុនសុង បន្ទាប់មកទើបខេត្ត និងបញ្ជូនឯកសារនេះសុំគោលនយោបានពីថ្នាក់លើ ឬរដ្ឋាភិបាលបន្តទៀត ដើម្បីយកដីពីជំទាវលីអ៊ុំអេងអោយទៅពលរដ្ឋ៤៧គ្រួសារដែលបានប្តឹងតវា៕ ដោយ៖ ផ្លុងរ៉េត
.jpg)
.jpg)
.jpg)
.png)
.jpg)
.jpg)
.jpg)
