កម្លាំងចម្រុះចុះឃាត់គ្រឿងចក្រកាយដីលក់ក្រោមលេសថាធ្វើបារាយណ៍

វេលាម៉ោង៤រសៀល ថ្ងៃទី៣០ ខែមិនា ឆ្នាំ២០១៩នេះ កម្លាំងចម្រុះដែលដឹកនាំដោយលោក សុ ថុល នាយករដ្ឋបាលសាលាខេត្តសៀមរាប កម្លាំងស្នងការនគរបាលខេត្តសៀមរាបដែលដឹកនាំដោយ ឯកឧត្តម ម៉ក ធារា ស្នងការរងខេត្តសៀមរាប និងកម្លាំងអធិការនគរបាលក្រុងដឹកនាំដោយលោក ណុប សារ៉ាក់ ព្រមទាំងចូលរួមដោយ ប្រធានមន្ទីរកសិកម្មខេត្ត តំណាងប្រធានមន្ទីររ៉ែនិងថាមពលខេត្ត អាជ្ញាធរដែនដី បានចុះឃាត់គ្រឿងចក្រជាច្រើន ក្នុងសង្កាត់ជ្រាវ ក្រុងសៀមរាប ដែលលោក ក្អោប រ៉ន ចៅសង្កាត់ជ្រាវ លោក គង់ បឹប ក្រុមប្រឹក្សាសង្កាត់ និងលោក គង់ មង្គល ប្រធានសហគមន៍ជ្រាវ បានជួលយកមកជីកយកដីលក់ ក្រោមលេសថាធ្វើបារាយណ៍របស់ សម្តេចព្រះសង្ឃរាជ ទេពវង្ស។

លោកស្នងការរង និងលោក សុ ថុល បានមានប្រសាសន៍ថា សុំអោយផ្អាកការជីកកកាយដីខាងលើនេះសិន ចាំមានច្បាប់គ្រប់គ្រាន់ ចាំធ្វើបន្តទៀត។

ចំណែកខាងមន្ទីររ៉ែនិងថាមពល បានមានប្រសាសន៍ថា តាមច្បាប់រ៉ែនិងថាមពល មាត្រា៣៥ ត្រូវពិន័យ ១ថ្ងៃ១៥០ម៉ឺនរៀល (១លានកន្លះ) ព្រោះការជីកកកាយនេះគ្មានច្បាប់អ្វីទាំងអស់៕ ដោយ÷ផ្លុងរ៉េត