លោកឧត្តមសេនីយ៍ត្រីម្នាក់ថា៖ អ្នកកាសែតមួយចំនួនសរសេរព័ត៌មានបំភ្លើសនិងប្រើសម្តីគ្មានវិជ្ជាជីវ:

កាលពីរសៀថ្ងៃទី០១ ខែកក្កដា ឆ្នាំ២០២១ម្សិលមិញ មានអ្នក​កាសែតក្នុងខេត្ត​សៀមរាប​មួយ​ចំនួន​បាន​សរសេរ​ព័ត៌មាន​បង្ហោះ​តាម​បណ្តាញ​សង្គម​ហ្វេស​ប៊ុគ​ដោយ​រិះគន់ថា លោកឧត្តមសេនីយ៍ត្រី ភឹង ចិន្តារ៉េត ស្នង​ការ​រងទទួល​ផែន​ព្រហ្មទណ្ឌ​នៃ​ស្នង​ការ​នគរបាល​ខេត្តសៀមរាប ជាអ្នក​នៅ​ពី​ក្រោយ​ខ្នង​ហាង​បញ្ចាំមួយកន្លែង​ស្ថិត​ក្នុង​ភូមិ​តាវៀន សង្កាត់​សាលាកំរើក​ ក្រុង​សៀមរាប។

នៅព្រឹក​ថ្ងៃទី០២ ខែកក្កដា ឆ្នាំ២០២១នេះ លោកឧត្តមសេនីយ៍ត្រី ភឹង ចិន្តារ៉េត បាន​មានប្រសាសន៍​តាម​ទូរស័ព្ទប្រាប់ កាសែត​កម្ពុជា​សុវណ្ណភូមិ​ថា មួយជីវិតរបស់លោក​មិន​ចេះរក​ស៊ី​បើក​ហាង​បញ្ចាំ ឬកាង​ហាង​បញ្ចាំដូច​ការ​ចោទ​ប្រកាន់​នោះ​ទេ។  លោកឧត្តមសេនីយ៍ត្រីរូបនេះបាន​បន្តទៀតថា កាលពីម្សិល​មិញ​លោក​មិន​ស្រួលខ្លួន​សុខភាពមិន​សូវ​ល្អ ទើប​មិន​បាន​តប​តជា​មួយ​អ្នក​ដែល​សរសេរព័ត៌មាន​រិះ​គន់​លោក​​​តាមបណ្តាញ​សង្គម​ទាំង​នោះ។ លោកឧត្តមសេនីយ៍ត្រីបាន​បន្ថែម​ទៀតថា មាន​អ្នក​កាសែតខ្លះ​ប្រើ​ភាសាអសុរោះ ខ្វះវិជ្ជាជីវ: សុទ្ធតែលោក​ជញ្ជក់ឈាមរាស្ត្រជាដើម ធ្វើ​ឱ្យ​លោក​បាត់បង់កិត្តិយស ព្រោះ​តែការគិតខុសរបស់​អ្នក​កាសែត​មួយ​ចំនួនសរសេរតាម​គ្នា​ដោយ​គ្មាន​ប្រភព​និង​ឯកសារភស្តុតាង​ច្បាប់​លាស់យ៉ាង​ដូច្នេះ។

លោក ចាន់ ប៊ុនហុង ដែល​ត្រូវ​បាន​អ្នកកាសែតសរសេរ​​រិះគន់​កាល​ពីម្សិល​មិញ​ថា លោក​បើកសា​ខា​​ហាង​បញ្ចាំ​យក​ការ​ប្រាក់​ខ្ពស់កប់ពពក($100យក​ការប្រាក់$20ក្នុងមួយខែ)ស្ថិត​ក្នុង​នៅភូមិ​តាវៀន​ខាងលើនេះ ក៏បាន​ប្រាក់​តាម​ទូរស័ព្ទនៅ​ព្រឹក​ថ្ងៃទី០២ដដែលនេះថា ហាង​បញ្ចាំនោះ​មិន​មែន​ជារបស់​លោកទេ លោក​បាន​បិត​ហាង​បញ្ចាំប្រហែលមួយ​ឆ្នាំហើយ លោក​មិន​ជាប់​ពាក់ព័ន្ធក្នុង​ករណីខាង​លើ​នេះទេ វាជាការ​យល់​ច្រឡំ​របស់​ក្រុម​អ្នក​សារព័ត៌មាន​ទាំង​នោះតែប៉ុណ្ណោះ។

លោក ម៉េង ហួត ចាងហ្វាងកាសែតសៀមរាបថ្មី បាន​ប្រាប់​កាសែតកម្ពុជាសុវណ្ណភូមិនៅព្រឹកថ្ងៃទី០២កក្កដានេះថា បានជាលោក​ហ៊ានបង្ហោះ​ព័ត៌មានតាមហ្វេសប៊ុគ ព្រោះ​លោក​មាន​បណ្តាញ​រាយ​ការណ៍​ប្រាប់​លោកច្បាស់លាស់អំពីហាងបញ្ចាំនេះ តែបន្តិក្រោយ​មក​កាល​ពីថ្ងៃទី០១ម្សិលមិញ​ខាង​សមត្ថកិច្ច​ខលទូរស័ព្ទ​​សុំ​ឱ្យ​លោក​លុបអត្ថបទវិញ​សិន​។ លោកម៉េងហួតបាន​បន្ថែមថា នៅព្រឹក​ថ្ងៃទី០២កក្កដា ឆ្នាំ២០២១នេះ ខាងនគរបាល​ប៉ុស្តិ៍ស្លក្រាម​បាន​កោះ​ហៅ​លោក​ទៅ​បំភ្លឺ តែលោក​ក៏ពុំ​ទាន់​ដឹងថា ខាង​នគរបាល​ប៉ុស្តិ៍ស្លក្រាម​គេចង់​សាកសួរពីរឿងហេតុ​អ្វីនោះទេ។

លោក ទៀវ សំអុល ចាហ្វាងគេហទំព័រថ្ងៃថ្មី បាន​ប្រាប់​តាម​ទូរស័ព្ទនៅ​ព្រឹក​ថ្ងៃទី០២នេះផងដែរថា លោក​បាន​ឃើញ​លោក​ម៉េង​ហួត ចុះផ្សាយស្មាន​ថា ជាព័ត៌មានពិត​ ក៏ចាប់យក​ព័ត៌មាននោះ​មក​ផ្សាយ​បន្ត តែក្រោយ​មក​លឺថាជាព័ត៌មានមិន​ពិត​ក៏សម្រេចចិត្ត​ផ្សាយ​បក​ស្រាយ​វិញតាំង​តែពី​ម្សិល​មិញ​បាត់​ទៅហើយ។

យោង​តាម​ខ្សែអាត់​សំលេង​មួយ​របស់​ពលរដ្ឋ​ដែល​ធ្លាប់​រងការ​គៀបសង្កត់​ពី​ហាង​បញ្ចាំ​នៅក្រោយ​ផ្សារលើ​ធំថ្មីនេះ បាន​អះអាងថា ”ម្ចាស់​ហាង​បញ្ចាំនេះមាន​ខ្សែស្រឡាយ​អ្នក​ធំ​ ធ្លាប់​ថត​រូប​ជាមួយ​ថ្នាក់​ដឹកនាំធំៗ ម្យ៉ាង​វិញ​ទៀតប្រើ​អំណាច​ក្នុង​ការ​រកស៊ីដូចជា៖
          ១.ខ្ចី$100 យកការប្រាក់ $20ក្នុងមួយខែ
          ២.បង់ការយឺត១ថ្ងៃពិន័យ​$១៥
          ៣.បង់យឺត២ថ្ងៃពិន័យ$៤៥
          ៤.ខានបង់២ខែ ទៅរឹបអូសយកទ្រព្យសម្បត្តិ​​​ដល់ផ្ទះ ឬ ស៊ី​ដាច់របស់បញ្ចាំនោះតែម្តង​ ហើយ​ការ​រឹបអូសម៉ូតូដល់ផ្ទះ​ (ការបញ្ចាំកាដគ្រី) ជូន​ទៅរឹបអូស​ខ្លួន​ឯង ជូន​បញ្ជាឱ្យ​កង​កម្លាំង​ទៅ​រឹបអូសជំនួសក៏មាន។

ពលរដ្ឋ​ដែល​ជួប​ការ​លំបាក​ក្នុង​សម័យ​កាល​​កូវីដ១៩ ដែល​បាន​យក​ទ្រព្យ​សម្បត្តិ​ទៅ​ដាក់​បញ្ចាំតាម​ហាង​បញ្ចាំ ស្នើ​សុំ​ដល់​សមត្ថកិច្ចពាក់ព័ន្ធ និងអាជ្ញាធរគ្រប់ជាន់ថ្នាក់ ក្នុង​ខេត្តសៀមរាប មេត្តាជួយ​ត្រួត​ពិនិត្យ​អំពីតម្លៃការប្រាក់ និងច្បាប់​ទំលាប់ ឱ្យបាន​សម​ស្រប​ទៅ​តាម​ផ្លូវ​ច្បាប់ផង កុំឃើញ​ពួកគាត់​ធ្លាក់អណ្តូងហើយ​ ទំលាក់ថ្មថែមពីលើ៕ ដោយ៖ ផ្លុងរ៉េត