ដំណឹងបាត់កូនស្រី

លោក ឈាង ចិន ត្រូវជាឪពុក និងម្តាយឈ្មោះ ម៉ែន ម៉ាច បច្ចុប្បន្នរស់នៅភូមិ​ថ្លុកអណ្តូង សង្កាត់ស្លក្រាម ក្រុងសៀមរាប បានបាត់កូនស្រីវ័យ១៥​ឆ្នាំម្នាក់ឈ្មោះ ឈាង ស្រីខួច ដែល​មាន​ភិនភាគដូច​ក្នុង​រូបភាព នៅចំណុចផ្លូវ​៦០ម៉ែត្រ កន្លែងលក់ប៉ើតប៉ោង កាលពីវេលាម៉ោង៦និង៣០នាទី ថ្ងៃទី៦ ខែធ្នូ ឆ្នាំ២០២១។

យោងតាមប្រភពអ្នក​លក់ប៉ើតប៉ោងក្បែរគ្នានៅផ្លូវ៦០ម៉ែត្របាន​ប្រាប់លោក ឈាង ចិន ដែល​ជាឪពុកថា ដំបូងក្មេងស្រីឈ្មោះ ឈាង ស្រីខួច បានយកប៉ើតប៉ោងទៅផ្ញើជាមួយគាត់បន្ទាប់ពី​នាង​បាន​និយាយទូរស័ព្ទរួចបន្តិច ហើយ​ប្រហែលមួយស្របក់ក្រោយមក​ឃើញ​មានបុរស​ម្នាក់វ័យ​ប្រហែល​ជាង​២០ឆ្នាំ ជិះម៉ូតូម៉ាក​វីវ៉ាពណ៍ខ្មៅ ក្មានស្លាកលេខ បាន​មក​ឌុប​កូន​ស្រីគាត់​ទៅ​បាត់។

នៅពេល​ឪពុក​មក​ដល់​កន្លែងកើតហេតុបាត់​កូន​ស្រីពីកន្លែងលក់ប៉ើតប៉ោង ឃើញ​តែ​ប៉ើតប៉ោង ទើប​សាកសួរអ្នក​លក់ជិតគ្នាបានដឹង​ហេតុផល​ក៏ប្រញាប់ទៅរាយការណ៍ជូន​នគរបាលប៉ុស្តិ៍ភ្លាមៗ នៅថ្ងៃដដែល តែជាអកុសល្យ រហូតដល់ថ្ងៃនេះនៅតែគ្មានដំណឹងពីកូនស្រីគាត់នៅឡើយ។

លោក ឈាង ចិន បានបន្ថែមថា តាំងពីថ្ងៃបាត់កូនស្រី គាត់តែងតែខល​ទូរស័ព្ទទៅកូន​ស្រីរបស់គាត់ជានិច្ច តែគ្មានអ្នក​លើក​ទទួល តែចាយដន្យនៅព្រឹកថ្ងៃទី១០ ខែធ្នូ ឆ្នាំ២០២១នេះលោកខល​ទៅកូន​ស្រីម្តងទៀតនាងលើកទទួលតែលឺសម្លេងមនុស្សប្រុសក្រហឹមសូរ ហឹះ ហើយ​ក៏បិតទូរស័ព្ទបាត់ទៅ។

លោក ស៊ិន ណារ៉ា មេប៉ុស្តិ៍នគរបាល សង្កាត់ស្លក្រាម ក្រុងសៀមរាប បាន​ប្រាប់​តាម​ទូរស័ព្ទនៅព្រឹក​ថ្ងៃទី១០ ខែធ្នូ ឆ្នាំ២០២១នេះថា លោក​ពុំទាន់បានទទួល​ពត៌មាននៅឡើយទេ ប្រហែល​ខាង​ជន​រងគ្រោះមក​រាយការណ៍ជូន​កូន​ចៅរបស់លោក ចាំមើល​សាកសួរមើលសិន។

ឪពុកម្តាយក្មេងស្រីដែលបាន​បាត់ខ្លួន បាន​លើក​ម្រាម​ដៃដប់ស្នើសុំសមត្ថកិច្ចគ្រប់ជាន់ថ្នាក់ក្នុង​ខេត្តសៀមរាប មេត្តាជួយស្វែងរក​កូនស្រីជូនពួក​គាត់​ផង​ព្រោះថា ពួកគាត់កំពុង​ព្រួយ​បារម្ភពីកូនស្រីគាត់​ខ្លាំងណាស់៕ ដោយ៖ ផ្លុងរ៉េត