កូនស្រីបង្កើតបណ្តេញ និងលើកកៅអីវាយឪពុកបណ្តាលអោយមានរបួសស្នាម

នៅព្រឹកថ្ងៃទី២៨ ខែឧសភា ឆ្នាំ២០២២នេះ លោក លី ហាំងសេង អភិជនម្នាក់នៅក្នុងខេត្តសៀមរាប ត្រូវបាន​កូនស្រីបង្កើតឈ្មោះ សេង ប៉ជូ ដែលមានវ័យ២៦ឆ្នាំ បានលើកកៅអីគប់ទៅលើ​រូបលោក បណ្តាលអោយមានរបូសស្នាម ហើយនាងបាន​ប្រើភាសាជេរប្រមាតទៅលើឪពុករបស់ខ្លួន ព្រមទាំងបណ្តេញឪពុកចេញពីផ្ទះ នៅមុខព្រះសង្ឃ និងមុខអតិថិជនជាច្រើននាក់។

យោងតាមប្រភពពីអតិថិជនអ្នកទិញផ្ទះល្វែងរបស់លោក លី ហាំងសេង នៅផ្លូវជន្លង ភូមិតាវៀន ស្ថិតក្នុងសង្កាត់សាលាកំរើក ក្រុងសៀមរាប បានប្រាប់កាសែតកម្ពុជាសុវណ្ណភូមិនៅព្រឹកដដែលនេះថា មូលហេតុដែលបណ្តាលអោយ​មាន​ហឹង្សានេះកើតឡើង ដោយសារតែកូនស្រីរបស់លោក​ លី ហាំងសេង បាន​បើកហាង​(បារ)​នៅលើ​ផ្ទះដែលពួកគាត់បានទិញរួច ហើយនៅព្រឹកថ្ងៃទី២៨នេះ សេង ប៉ជូ បាននិមន្តព្រះសង្ឃធ្វើ​ពិធីសូត្រមន្តឡើងហាងបើកថ្មី ទើបពួកគាត់សាកសួរទៅលោក លី ហាំងសេងថា “ហេតុអ្វីលក់ផ្ទះអោយពួកគាត់​ហើយ បែជាទៅធ្វើហាងលក់ដូរលើផ្ទះរបស់គាត់អញ្ចឹង”? លោក លី ហាំងសេង បាន​ឆ្លើយថា ”គាត់អត់ដឹងអីទេ អត់បានធ្វើហាងអីទេ“ ដើម្បីបញ្ជាក់ពួកគាត់ (អតិថិជនទិញផ្ទះ) បាន​នាំលោក លី ហាំងសេង ទៅដល់កន្លែងផ្ទះល្វែង ទើបឃើញកូនស្រីគាត់កំពុងធ្វើ​ពិធីសូត្រមន្តឡើងហាង ហើយលោក លី ហាំងសេង បានឃាត់កូន និងឃាត់ព្រះសង្ឃអោយឈប់សូត្រមន្ត ព្រោះផ្ទះនេះបានលក់ទៅអោយគេហើយ នេះជាហេតុផលបណ្តាលអោយ សេង ប៉ជូ មានការខឹងក្រេវក្រោធច្រឡោតតោតតូង យកដៃច្រានដេញឪពុកអោយចេញពីផ្ទះ ជេរផង ប្រមាតផង ដេញទាំងអតិថិជនផង ហើយលើកកៅទីបោកលើ​ឪពុក តែឪពុកគេផុត​បន្តិច របួសតែកំភួនដៃប៉ុណ្ណោះ។

លោក លី ហាំងសេង បានប្រាប់កាសែតកម្ពុជាសុវណ្ណភូមិនៅព្រឹកថ្ងៃទី២៨នេះ បន្ទាប់ពីកើតហេតុថា ”កូនស្រីខ្ញុំពិតជាបានវាយខ្ញុំអោយមានរបួសស្នាមមែន (មើលរូបភាព) ហើយខ្ញុំនឹងដាក់ពាក្យបណ្តឹងទៅតាម​ផ្លូវច្បាប់ ដើម្បីស្វែងរកយុត្តិធម៌“។

សេង ប៉ជូ កូនស្រីលោក លី ហាំងសេង បានប្រាប់កាសែតកម្ពុជាសុវណ្ណភូមិ នៅរសៀលថ្ងៃទី២៨ដដែលនេះថា ”នាងពុំបានវាយឪពុកអោយមានរបួសស្នាមដូចការចោទប្រកាន់នោះទេ នាងគ្រាន់តែ លើកកៅអីគប់ចោលតែប៉ុណ្ណោះ បើនាងមាន​បំណងវាយឪពុកមែន កណ្តាលមុខ ឬកណ្តាលក្បាល គ្មានខុសបន្តិចឡើយ“។ សេង ប៉ូជូន បានបន្ថែមថា ”ដីនេះផ្ទះនេះមិនមែនជារបស់ខ្ញុំមែន តែវាជាទ្រព្យសម្បត្តិ​របស់ម៉ាក់ខ្ញុំ និងប៉ាខ្ញុំ ហើយខ្ញុំជាកូនរស់នៅទីនេះយូរហើយ ហាងដែលខ្ញុំធ្វើគឺជាឃ្លាំង​ចាស់ បើអតិថិជន​ចង់បានផ្ទះយកលុយទៅបង់នៅធនាគារទៅបានផ្ទះហើយ ម្យ៉ាងវិញទៀត រឿងរ៉ាវដីផ្ទះនេះជាប់បណ្តឹង​នៅតុលាការ មានទាំងដីការក្សាការពារ ពុំទាន់ដាច់ស្រេចទេ គ្មានអ្នកណាអាចមកទាមទារបាន​ឡើយ។

យោតាមមាត្រា ២១៧ ក្រមព្រហ្មទណ្ឌនៃព្រះរាជាណាចក្រកម្ពុជា បទហឹង្សាដោយចេតនា បាបចែងថាៈ អំពើហឹង្សា​ប្រព្រឹត្ត​ដោយចេតនាទៅលើអ្នក​ដទៃ ត្រូវផ្តន្ទាទោសដាក់​ពន្ធនាគារពី ១ (មួយ) ឆ្នាំ ទៅ ៣ (បី) ឆ្នាំ និងពិន័យជាប្រាក់ពី ២ ០០០ ០០០ (ពីរលាន) រៀល ទៅ ៦ ០០០​ ០០០ (ប្រាំមួយលាន)​ រៀល៕ ដោយៈ ផ្លុងរ៉េត (រក្សាសិទ្ធិគ្រប់យ៉ាងដោយ កាសែតកម្ពុជាសុវណ្ណភូមិ)